SUPLEMEN PA MAMRE GBKP TGL. 7 - 13 JULI 2024

Pdt. Larena Sinuhadji (Nd. ReyRapha Tarigan)

Teks : Jakup 3:13-18

Tema : PENTAR DINGEN ERPENGANGKAN

Tujun : Gelah Mamre :

1) Meteh kerna pentar dingen erpengangkan bagi ngena ate Tuhan

2) Ngelakoken kebujuren (Tata Nilai Kejujuran) i bas kegeluhenna

Penaruh

Kebujuren e me salah sada ciri kalak si erkiniteken. Ertina, kalak si erkiniteken man Tuhan teridah bujur i bas geluhna si tep-tep wari. Tetapi kinatana mekatep kiniteken iertiken hanya berkaiten ras hubungenta secara vertikal ras Tuhan saja tapi kurang teridah i bas moralitas kegeluhen si tep-tep wari.

Erbahan si bujur e me sada tindaken si erbahanca Tuhan senang ras kalak si deban pe senang. Kebujuren e me sikap lurus hati, tidak berbohong. Jujur pe banci ikataken la curang, ndalanken erbage hal sue ras seharusna. Makatep pe ikataken kalak si berintergritas e me utuh, sue si ibelasken ras si ilakoken. Labo gampang ndalanken kebujuren. Bahkan lit ungkapen si ngatakenca, “Jaman saiki, sing jujur, ajur” (jaman sekarang, yang jujur akan hancur). Ertina, kalak si ngelakoken kebujuren pasti mbue kel tantangenna. Rikutken bahan PA-ta sekali enda, iarapken kebujuren menjadi kebiasaan bahkan menjadi salah sada karakter Mamre GBKP.

Mpebagesi Teks

Garis besar Surat Jakup e me ajar si erguna si isehken man kerina kalak si tek si merap marpar kesilang i perantauan. Jakup mpergunaken perumpamaan-perumpamaan si jelas guna nerangken uga kin harusna perlagu langkah kalak Kristen. Arah dampar kiniteken Kristen icakapkenna pe piga-piga tema e me: kerna kinibayaken, kemusilen, percuban, lagu langkah si mehuli, cian ate, kiniteken ras perbahanen, cakap manusia, kepentaren, perubaten, megombang, ukur meteruk, kerna nalahken kalak, ngerana meganjang, kinigenggengen, ras ertoto. Tangkas ikataken i bas surat enda, maka kiniteken si tuhu-tuhu harus rikut ras perbahanen.

Adi sioge bindu 3 ay. 1 nari, Rasul Jakup mereken persinget man pengajar-pengajar si ngajari perpulungen-perpulungen kalak Kristen Yahudi si enggo tersebar i darat Israel paksa si e, gelah nehken pengajaren si payo sue ras Kata Dibata. Janah kai si iajarken e arus sue ras pengeranana bage pe perbahanenna (ay. 1-2). Sebab ngajari e me salah sada karunia Kesah si Badia si lit guna mbangun kiniteken perpulungen (bdk. Roma 12:6-7; 1 Kor. 12:27-31). Lebih lanjut Rasul Jakup mereken penjelasen kerna dilah si arus banci ikendaliken alu payo sue ras Kata Dibata bage pe kiniteken man Yesus Kristus, gelah kai pe si iajarken bage pe si ikataken, banci mpeturah si mehuli i bas perpulungen bage pe mbangun kiniteken perpulungen.

Berikutna, adi sioge seh ay. 18, maka teridah lit denga biak-biak cian ate ras ngukurken kepentingen diri sendiri i bas perpulungen kalak si tek paksa si e. Biak-biak si la mehuli enda banci ka mpeturah ranan-ranan si la payo, si kedungenna banci mabai perpulungen ku bas erbage-bage perubaten ras perjengilen (ay. 16). E maka persinget kerna dilah enda pe itujuken man perpulungen si lit denga i bas ia biak-biak cian ate ras ngukurken kepentingen diri sendiri, gelah perpulungen e pe banci menyadari maka kiniteken man Kristus arus mabai perobahen i bas pengerana bage pe perbahanen. Sebab arah pusuh ras perukuren si bersih si ipalasi Kata Dibata ras kiniteken man Kristus turah pengerana bage pe perbahanen si mehuli sue ras peraten Dibata.  

I bas ogenta sendah, kalak si pentar teridah min buahna kepentarenna e i bas pengkebet geluhna si tep-tep wari. Sabab bena-benana kepentaren e me kap erkemalangen man Tuhan Dibata. Banci jadi, lit perpulungen mengaku diri pentar ras erpengangkan, tapi la sedalanen ras perbahanenna. Jakub alu tegas ngatakenca kalak si lit bas ia kepentaren harus bersih pusuh peratenna, nggit erdame, lemah lembut, la megogo, dem perkuah ate, la erayo-ayo ras tangkas ukur tangkas kata. Memang payo, labo lit kita si sempura, tapi paling tidak selaku kalak si enggo idemi Kesah Si Badia, asa bancina nggeluh bas kita biak-biak si mehuli ras si e kerina lit bas proses kegeluhen. Kebalikenna adi bas ukurta lit cian ate, pengilas, dirina saja iranakenna, si e jelas labo kepentaren i bas Dibata nari tapi biakna biak doni, biak binatang, biak setan.

Versi Audio Silahkan Klik : https://youtu.be/A9dFp1OAeHg

Pengkenaina

Tema si seh man banta ngajuk kam kerina Mamre gelah pentar dingen erpengangkan. I bas terj. Alkitab BIMK nina, “Orang yang bijaksana dan berbudi.” Erpengangkan e me terjemahen kata “berbudi.” Berbudi akar katana “budi” si ertina: alat batin yang merupakan paduan akal dan perasaan untuk menimbang baik dan buruk; tabiat; akhlak; watak; perbuatan baik; kebaikan; daya upaya; ikhtiar; akal. Berbudi labo terjeng mehuli bas saja, tapi banci inanami kalak si lit i sekelewtna arah kerina pengkebet geluhna.

Arah ogenta sendah, mulihi kita ipersingeti gelah kepentaren ras pengangkan kerna Kata Dibata si rusur irananken kita e harus teridah arah pengkebet geluhta. Kai si terjadi i bas perpulungen paksa Surat Jakup enda itulisken ula sempat terjadi i bas geluhta. Memang murah adi kita ngerana kerna Kata Dibata, tapi harus tetap siinget maka Kata Dibata e tuhu-tuhu nggeluh adi silakoken. Arah pengalamen perpulungen kalak si tek paksa si e, radu ras kita metenget kerna bahaya dilah. Ula sempat terjadi arah pengerananta ceda ukur kalak, terjadi perpecahen, permusuhen, rsd. Apai ka i bas jaman medsos gundari enda, perlu kita hati-hati erbelas i bas medsos. Arah dilahta nari teridah maka kita kalak si pentar ras erpengangkan kerna Kata Dibata. Emaka pakelah dilahta guna nuriken kepentaren i bas Dibata nari, pakelah dilahta guna memotivasi ras mpegegehi kalak si deban. 

Kerna tujun si peduaken i bas PA-ta sendah, iajuk kam kerina Mamre gelah ngelakoken kebujuren i bas geluhndu kai pe resikona. Memang menyatakan kebenaran alu kejujurenta melala kel tantangenna, tapi harus tek kita Kesah Si Badia pasti nampati kita i bas kita ngelakoken kebujuren. Secara khusus i bas Garis Besar Pelayanan (GBP) GBKP, maka salah sada i bas 5 Tata Nilai si ianggap paling relevan guna ihayati, igumuli, isosialisasiken ras ipraktekken terus-menerus seh makana enggo jadi kebiasan ras karakter e me Kejujuran. I teruh enda itulisken kami mulihi kerna Tata Nilai Kejujuran.

Panduan Perilaku : 
• Hati yang lurus, tidak berbohong atau berkata apa adanya
• Tidak curang atau mengikuti aturan yang berlaku
• Tulus ikhlas, tidak munafik atau bermuka dua

Kata Kunci :
• Integritas
• Bersih
• Transparan
• Terus terang
• Bertanggung jawab

Perilaku yang dianjurkan :
Senantiasa bersikap jujur, sesuai antara perkataan yang diucapkan dengan perbuatan.

Dibata si mpengasup kam kerina Mamre GBKP guna ngelakokenca.