SUPLEMEN PA MORIA GBKP TGL. 16 - 22 JUNI 2024

Pdt. Larena Sinuhadji (Nd. ReyRapha Tarigan)

Pesta Iman Anak & Remaja (PIARA) GBKP

Si Man Ogen : Lukas 2:41-52

Tema : TAMBAH PEMETEH RAS KINITEKEN

Tujun : Gelah Moria :

- Nggargari perbahanen Yusuf ras Maria i bas ngarak-ngarak Yesus

- Nikapken keperlun anak sope berkat ku PIARA

Penaruh

La tergejap i bas bulan Juli tahun 2024 enda bakal silaksanaken Pesta Iman Anak & Remaja (PIARA) GBKP. PIARA e me salah sada bentuk pembinaan man anak-anakta si berusia tanggung ras remaja, si enggo silaksanaken benaken tahun 1995 nari, ertina i bas tahun 2024 enda enggo 7 kali silaksanaken PIARA. Arah PIARA enda tentuna iarapken reh tambahna pemeteh ras kiniteken anak-anakta, selain tentuna banci saling sitandan ras anak bage pe remaja i bas runggun-runggun si deban nari sebelang-belang GBKP. Tentu meriah anak-anakta erkiteken enggo reh tambahna teman-temanna.

PA-ta sendah i bas rangka mendukung pelaksanaan PIARA GBKP tahun 2024 enda, gelah banci erdalan alu mehuli.

Mpebagesi Si Man Ogen

Keluarga Yusuf e me keluarga si taat beribadah, dingen saleh. Hal enda banci siidah i bas ayat-ayat sope si jadi perikopta. Yesus isunatken umur waluh wari (ay. 21), ipersembahken man Tuhan i Rumah Pertoton i Yerusalem (ay. 22-23) ras i bas perikopta Yesus enggo ibaba orang tuaNa, Maria ras Yusuf, guna ngikuti perayaan Pasah. Perayaan Paskah enda enggo semal iikuti Maria ras Yusuf setiap tahun, janah erkiteken usia Yesus enggo 12 tahun (anak Taurat) maka ibaba orang tuaNa Yesus berkat ku Yerusalem guna ngikuti perayaan Paskah enda ndai. Kenca dung perayaan e, mulih Maria ras Yusuf, tapi Yesus tading i Yerusalem. I jenda me mulai turah persoalen. La sedar orang tua Yesus maka Yesus tading i Yerusalem, akapna kin sangana erdalan ras kalak si enterem. Sabab memang biasa kalak enda kerina erdalan secara rombongen, anak kuta, ras teman-temanna. Kenca enggo sada wari je maka enggo sedar Maria ras Yusuf, idaramina Yesus ku kade-kade ras temanna. Perban lalap la jumpa, maka mulihken Yusuf ras Maria ku Yerusalem guna ndaramisa. Banci siidah i jenda kepedulian si luar biasa i bas Yusuf ras Maria daramina seh dat, bahkan mulihken ku Yerusalem. La nari ukurina latih.

Puji Tuhan i bas wari peteluken idapetina Yesus sangana kundul ras guru-guru agama Yahudi i Rumah Pertoton. Alu tutus ibegiken Yesus pengajaren guru-guru e, janah isungkuniNa pe. Janah adi nungkun guru-guru e man Yesus, ijabapNa alu dem kepentaren, si erbahanca mamang ate kalak kerina si megi jawaben Yesus. Orang tuana sendiri pe mamang ngidah kepentaren Yesus. Emaka nina Maria “O Anakku, engkai maka bagenda perbahanenNdu man kami? Aku ras bapaNdu enggo ndarami Kam alu aru ate.” Tuhu-tuhu cemas kel Maria asum la nari idahna anakna. Tapi jawaben Yesus mungkin banci ikataken kurang sopan tapi situhuna lugas (tepat, to the point), “Engkai maka idaramindu Aku? La kin ietehndu Aku arus i Rumah BapangKu?" Walau pe situhuna arah jawaben Yesus icidahkenNa atena maka selain IA anak Yusuf ras Maria, IA pe Anak Dibata. Kenca dung si e, maka radu mulih Yesus ras orang tuaNa ku Nasaret. Enda nuduhkenca maka Yesus tetap patuh selaku anak, ibegikenNa kata orang tuaNa. Yesus reh belinna dingen reh tambahna pemetehNa, janah reh tambahna pe ngena ate Dibata ras manusia.

Pesan kai si banci sidat kita arah perikop enda? Si pemena, orang tua Yesus tuhu-tuhu mediate nandangi kiniteken anakNa, selain i bas jabu pe iajarken kerna Firman Tuhan, ipetandankenna pe kerna Rumah Pertoton ras tradisi-tradisi si semal irayaken. Melala orang tua si genduari lalai (absen, la peduli) guna mabai anakna geluh erkiniteken man Tuhan, subuk i tengah jabu bage pe mabai ku Gereja benaken kitik-kitik nari. Banci jadi awalna anakta la nggit sebab riahen akapna nonton TV entah main game, tapi otoritas tetap lit bas kita orang tua, tupung anakta kitik denga. Sabab ‘di kenca enggo galang sisuruh entah sipaksa ia ku Gereja enggo pasti erlangna.

Si peduaken, Yusuf ras Maria sebage orang tua si mereken tanggung jawab ras kemandirian man Yesus sekaligus tuhu-tuhu aru ate asum la nari idahna anakna. Lit orang tua la berekenna kepercayaan ras kemandirian man anakna. Alu alasen terlalu sayang ras mbiar erkiteken pengaruh jaman, orang tua memproteksi anakna secara berlebihan. Piah dungna anak bertumbuh menjadi manja ras kurang mandiri. Lit ka orang tua si sama sekali la peduli kerna pergaulan, ras kebutuhen anakna. Anak-anak bertumbuh kurang kasih sayang, piah dungna jadi terbawa arus jaman anak-anakta.

Si peteluken, Yesus tetap i bas bimbingen orang tuana si tuhu-tuhu mperdiateken subuk kerna kebutuhen jasmani, rohani, karakterna, mentalna, si erbahanca ngena ate Dibata ras manusia (bdk. ay. 40, “Anak e reh belinna dingen reh gegehna; pentar IA janah tetap ipasu-pasu Dibata”).

Versi Audio Silahkan Klik : https://youtu.be/ARXppSvHdDU

Pengkenaina

Erbage-bage cara orang tua jaman gundari enda guna ngarak-ngarak anak-anak, rikutken fase perkembangenna ras sifatna. Kai pe carana, si paling penting seimbang sibereken kai si jadi kebutuhenna, subuk kulana, pertendin, karakterna, mentalna. Janah si menguntungken jaman genduari melala informasi kerna parenting (menjadi orang tua si mehuli) subuk arah sosial media, buku-buku, ceramah parenting bage pe materi i bas PA Moria. Ertina, nampati kita sebage orang tua uga arusna ndalanken tanggung jawabna gelah reh ulina wari lepas wari.

Tanggung jawab e pe icidahken arah mereken kesempaten man anak-anakta terlibat i bas kegiaten-kegiaten Gerejawi, khususna si kentisik nari ilakoken se-GBKP e me PIARA (Pesta iman anak ras remaja). Sada kegiaten si banci membangun kiniteken, nambahi pemeteh, kemandirian ras nambahi teman (bersosialisasi) man anak-anakta. Belajar untuk mau berbagi, menjaga kesehaten dengan makan dan istirahat yang teratur, rsd. Ertina, adi ikutina alu tutus, tentu mbue manfaatna man bana bage pe man temanna si debanna si la ikut si banci ka ibagikenna.

Sue ras tujun si peduaken PA-ta sendah, radu ras kita isingetken gelah nikapken kerina si niperluken anak-anakta guna ngikuti PIARA. Baik anak-anak i bas rumahta, bage pe anak-anak i bas gerejanta, si ikut atena ku bas PIARA tahun enda. Emaka mari radu ras sidukung kegiaten enda, alu tetap notokenca kegiaten enda banci erdalan alu mehuli, sibereken pedah si mehuli man anakta gelah tutus mengikuti kerina rangkaian acara, sidukung arah dana. Ula siambati anak-anakta bertumbuh ku arah si mehuli. Mari siusih teladan si enggo idalanken Yusuf ras Maria i bas ngarak-ngarak Yesus. Dibata si mpengasup kita Moria.