SUPLEMEN PA MORIA GBKP TGL. 9 - 15 JUNI 2024

Pdt. Larena Sinuhadji (Nd. ReyRapha Tarigan)

Moria Jadi Pasu-pasu Man Anak Stunting & Obesitas

Si Man Ogen : Keluaren 16:16-21

Tema : SUE RAS SUKATENNA

Tujun : Gelah Moria :

- Mbandingken perbahanen kalak Israel si patuh ras si la patuh ndalanken aturen Dibata

- Nikapken keperlun isi jabu asa sukatenna

Metode : Studi kasus ras aksi

Penaruh

Salah sada perbedaan antara keinginan ras kebutuhan e me, kebutuhan lit batasna, sedangken keinginan la lit batasna. Kalak si lebih mengutamaken keinginan biasana kurang-kurangen lalap. Umpamana, enggo pe lit ukurenna asa kai sada wari kita man, tapi erkiteken kurang-kurangen lalap, banci sepuluh kali sada wari kita man. Rikutken kebutuhenta sada mobil enggo bias guna keperlunta setiap wari, tapi erkiteken sinen jiranta lit telu mobilna, kita pe situkur mobilta dua nari amin pe situhuna labo merupaken kebutuhenta.

Sebalikna, lit ka kalak si sangat perhitungan (pelit) seh makana untuk kebutuhan pokokna pe la iperdiatekenna. Umpamana, mbelang juma sawitna, melala senna, tapi bajuna e e lalap la pernah siganti. Setiap wari bubur ngenca panna, padahal ngasup nge ia nukur pangan-pangan si deban. Ras melala contoh-contoh si deban. I bas si e labo berarti keinginan e la mehuli, tapi si idealna, ngasup kita mengendalikan keinginan, i bas sisi si deban labo ka kita pelit, janah si pentingna ngataken bujurlah man Dibata i bas kai pe si enggo ipercayakenNa man banta.

I bas kesempaten enda radu ras kita erlajar kerna mencukupkan diri, khususna i bas kai pe si inkonsumsi kita ras keluarganta rikutken ogenta sendah. Janah PA-ta sendah i bas rangka keikutsertaanta Moria memberantas stunting ras obesitas. Stunting terjadi erkiteken kekurangan gizi, sedangken obesitas terjadi erkiteken kelebihan berat badan.

Mpebagesi Si Man Ogen

Ogenta sendah akap kami enggo rusur sibegi entah pe sioge, kerna Manna ras Leto, i bas terj. BIMK nina “Manna dan burung puyuh.” I bas judul perikop enda enggo banci sisimpulken secara garis besar maka isi perikop enda nuriken kerna pangan-pangan si ibereken Dibata man bangsa Israel i gurun pasir gelah bangsa e la kelihen, e me Manna ras Leto. Tapi i bas terj. TB-LAI judul perikop enda e me “Manna, Sabat” ertina lit penekanen kerna aturen Sabat entah pe wari ersembah si biasa ilakoken bangsa e tep-tep wari peenemken (Sabtu).

Adi sioge benaken ay. 1 ogenta sendah, lit piga-piga hal si menarik akap kami si banci radu ras sirenungken. Si pemena, kerna bangsa Israel si jungut-jungut nandangi keberadaan dirina. Enggo pe ipulahi Dibata i bas penindasen bangsa Mesir nari alu tanda-tanda sengget, la ngasup bangsa e ngataken bujur man Dibata janah la tek bangsa nandangi kuasa Dibata si luar biasa. Ertina, Dibata si isembah bangsa Israel e ngasup ncukupken kerina kebutuhen geluhna. Enda akap kami si harus leben siimani maka Dibata si isembah kita ngasup ncukupken kerina si nibutuhken kita. Ertoto mindo man Dibata gelah icukupkenNa kebutuhen geluhta, e nge si seharuna ilakoken bangsa Isarel asangken jungut-jungut.

Si peduaken, Dibata mereken Manna man bangsa Israel asa si nibutuhken bangsa e si tep-tep wari. Lit ukuren si itentuken kira-kira 2 liter (seri ras 1,5 kg). Ay. 16-18 ncidahkenca maka kalak Israel mpepulung Manna sue ras si nibutuhken i bas masing-masing jabu, ertina kebutuhen tep-tep jabu berbeda. I bas si e la lit ise pe si kekurangen janah la lit ise pe si kelebihan, cukup kerinana. Ncukupken diri sue ras kebutuhen e akap kami si rusur jadi masalah erkiteken sibanding-bandingken kebutuhenta ras kebutuhen kalak si deban. Kai si terjadi i bas ay. 20 ncidahkenca maka lit kalak Israel si mbandingken kebutuhenna ras kebutuhen kalak si deban, emaka ipepulungna lebih asa si nibutuhken, piah dungna enggo ceda Manna ndai la nari banci sipan, janah merawa Musa man bana. Tapi banci ka siantusi maka kalak Israel si mpepulung lebih asa si nibutuhken e ndai, erkiteken mbiar ia, labo tek nandangi pemeliharaan Dibata. Poin si peduaken enda akap kami banci jadi renungen man banta kerna mencukupkan diri sue ras kebutuhenta.

Versi Audio Silahkan Klik : https://youtu.be/myTyufsK_hU

Pengkenaina

Melala contoh si deban i bas Pustaka Si Badia kerna mencukupkan diri. I bas Padan Si Ndekah, kitab Kuan. 30:8-9 ngajarken kerna nggeluh alu rasa cukup gelah ula sempat arah kelebihen entah kekurangen icurnaken gelar Dibata. I bas Padan Si Mbaru Rasul Paulus ngajarken prinsip nggeluh mencukupkan diri. I bas Pilipi 4:11 ikataken Paulus nina, “…Sabap aku enggo erlajar encukupken alu kai si lit i bas aku.” I bas 1 Tim. 6:6-8 Paulus ngajarken ncukupken diri alu nakan ras uis si lit. Janah i bas 2 Kor. 8:14-15 Rasul Paulus ngajarken prinsip keseimbangan gelah sada ras si debanna banci saling mencukupkan.

Tuhan Yesus i bas Pertoton Tuhan ngajarken kerna “Bereken nakan si cukup i bas wari si sendah enda.” Lit dua antusenna, si pemena, gelah tek kita nandangi pemeliharaan Dibata i bas geluhta. Si peduaken gelah fokusta ula terjeng ku hal-hal si sifatna materi, lit hal si lebih penting asangken materi doni enda e me relasinta ras Dibata arah KataNa.

PA-ta sendah ngajuk kita pernanden entah pe Moria gelah metenget nandangi bahaya kelebihan ras kekurangan alu nikapken keperlun isi jabu asa sukatenna. Bage pe kepedulianta nandangi anak-anak si stunting bage pe obesitas. Tapi sope si e, leben Moria harus beluh mencukupkan dirina sendiri, entah pe nikapken keperlun dirina asa sukatenna. Sebab adi la beluh kita mencukupkan diri sendiri enggo pasti la kita ngasup nikapken keperlun isi jabu asa sukatenna. Umpamana sisuruh anak-anakta ula rusursa jajan pangan-pangan si la sehat i bas kedai, tapi iidah anak-anak rusursa ka kita belanja barang-barang si situhuna labo jadi kebutuhenta. Silarang anak-anakta ula mbuesa man, tapi kita pe kelebihan berat badan. Sisuruh perbulangenta teratur man, tapi kita pe ate-ateta man. Sisuruh perbulangenta nggeluh sehat, tapi rumahta pe la sikap, kotor. Ras melala contoh-contoh si deban.

E maka i bas si e man banta kerina pernanden entah pe Moria, mari radu ras kita erlajar kerna mencukupkan diri dalam segala hal, gelah alu bage beluh ka kita nikapken keperlun isi jabu asa sukatenna. Janah i bas si e marilah kita mediate nandangi bahaya stunting bage pe obesitas man anak-anakta. Man banta Moria si gundari sangana natang tuah, harus tuhu-tuhu siperdiateken perpanndu, ula sempat anak si lit i bas bertin kekurangen gizi. Bage pe man banta Moria si lit denga anak-anakta si kitik, entah pe usia-usia sekolah, siperdiateken perpanna gelah ula sempat kurang gizi entah pe obesitas. Mehuli adi i bas gerejanta lit klinik, banci si-check secara rutin kondisi kesehaten anak-anakta. Mari sikembangken budaya mencukupkan diri dalam segala hal, berdoa cukup, ngoge Pustaka cukup, ngikuti kegiaten-kegiaten gereja cukup, man minem cukup, berkomunikasi ras isi jabu cukup, me time cukup, rsd.-na. Dibata si mpengasup kita.