SUPLEMEN PJJ GBKP TGL. 9 - 15 JUNI 2024

Pdt. Larena br. Sinuhadji (Nd. ReyRapha Tarigan)

NGASUP NGALOKEN PILIHEN TUHAN - Ulangen 31:7-8 & 34:9

[Ngaloken Ulih Pemilihen Pertua Diaken GBKP Periode 2024 - 2029]

Penaruh

Lit kuan-kuan si ngatakenca nina, “Hidup ini adalah pilihan.” Memang payo hidup ini adalah pilihan erkiteken setiap saat kita iperhadapken man pilihen-pilihen, baik pilihen si murah mutuskenca bage pe pilihan si rumit, dilematis, bagi memakan buah simalakama. I bas kita mutusken pilihen si apai si ipilih kita tentu lit pertimbangen-pertimbangen entah pe kriteria-kriteria si ipake kita i bas muat sada keputusen. Umpamana milih baju, kriteriana tentu si ukurenna sue ras ukuren badanta. Milih calon teman geluh, tentu harus si sada kiniteken. Milih pendahin, tentu si sue ras keahlianta. Ras pilihen-pilihen si debanna. Tapi kenca enggo siputusken siapai si ipilih kita, maun-maun la kap cocok nina perbulangenta, ndeharanta, entah pe anak-anakta, sebab ia pe lit kriteriana entah pe pertimbangenna masing-masing.

I bas kesempaten enda radu ras kita erlajar kerna pilihen Dibata ikaitken ras proses Pemilihan Pertua Diaken GBKP Periode 2024 - 2029.

Mpebagesi Ogen

Si jadi ogenta sendah, Ul. 31:1-8 lit i teruh judul perikop “Josua jadi gancih Musa.” Arah judul enda enggo banci sidat inti perikop, e me proses suksesi kepemimpinen Musa nari ku Josua. Ul. 34:9 nuriken kerna Josua si secara definitif jadi pemimpin bangsa Israel kenca kematen Musa. Adi sioge Ul. 31 ayat 1 nari lit piga-piga hal si menarik kerna Musa sebage pemimpin bangsa Israel.

Si pemena, bagi si enggo radu ras siteh, Musa e me sekalak pemimpin si itunjuk Tuhan guna mbebasken bangsa Israel i bas penindasen bangsa Mesir ras mimpin bangsa e ndarat Mesir nari ku taneh Kanaan. Tapi i bas perdalanenna Musa la banci bengket ku taneh Kanaan erkiteken la patuh nandangi perentah Tuhan (Ul. 32:51-52; Bil. 20:2-13). I bas ay. 2-3 ituriken, ngerana Musa man bangsa Israel, isedarina maka dirina enggo metua janah iingetna perentah Tuhan maka la banci ia bengket ku taneh Kanaan. Emaka sue ras perentah Tuhan i bas Bil. 1:38, ikataken Musa maka Josua pagi si gantiken ia mimpin bangsa e bengket ku taneh Kanaan. Lang situhuna banci saja Musa berkeras, maka tetap ia si jadi pemimpin bangsa e, tapi perban tuhu-tuhu isedarina keterbatasenna emaka irelakenna posisina sebage pemimpin man kalak si lebih mampu.

Si peduaken, sebage pemimpin si lebih senior asangken Josua, Musa mpegegehi Josua, mereken semangat entah pe motivasi, sue ras si enggo iperentahken Tuhan man bana (Bil. 1:38). I bas ay. 5, ikataken Musa man Josua maka Dibata pasti naluken bangsa-bangsa si lit i Kanaan erkiteken enggo iendesken Dibata bangsa-bangsa e man Josua. I bas si e harus tek Josua maka Dibata si mpengasup Josua mimpin bangsa e bengket ku Kanaan. Emaka nina Musa man Josua i lebe-lebe bangsa Israel i bas ay. 6-8 “Tetapkenlah ukurndu janah teklah. Ula kam mbiar. Ula bene ukurndu. Tuhan Dibatandu kap si mabai kam, si nemani kam ras ngarak-ngarak kam. La kam juru ibahanNa, ras la kam itadingkenNa. Sebab enggo erpadan Dibata maka negeri e pasti idatkenndu.”

Si peteluken, adi siperdiateken rekam jejak Josua, memang layak ia menjadi pemimpin nggantiken Musa. Janah tek pe Musa nandangi ia sebab enggo ididikna Josua jadi sekalak pemimpin si mehuli ras erkemalangen man Dibata. I bas ayat-ayat enda banci sinen rekam jejak Josua: Kel. 17:9-14; 24:13; 32:17; Bil. 13:1-33. I bas si e banci siidah teladan sekalak pemimpin si peduli nandangi kesinambungan kualitas kempimpinen si mehuli seh makana enggo ipersiapkenna alu mehuli calon-calon pemimpin masa depan. Ertina banci saja Musa labo peduli nandangi ise pagi si nggantiken ia. Janah i bas sisi si deban teridah sekalak calon pemimpin si nggit ia alu meteruk ukur erlajar man pemimpin si enggo senior. Janah teridah pe sekalak pemimpin si secara konsisten erkemalangen man Tuhan i bas diri Josua (Jos. 24).

Si peempatken, adi sioge ogenta sendah, la lit ituriken maka erpenulak bangsa e nandangi Josua si nggantiken Musa. Ertina bangsa e tuhu-tuhu ngaloken pilihen Tuhan man Josua. Adi sioge pe kitab Josua, memang teridah maka bangsa e tuhu-tuhu mendukung kepemimpinen Josua seh ku kedungenna (Jos. 24).

Versi Audio Silahkan Klik : https://youtu.be/VTTa5IWiqt4

Pengkenaina

Adi sikaitken ras tema PJJ-ta sendah, lit telu pihak si ngasup ngaloken pilihen Tuhan. Si pemena e me Musa, ngasup ia ngaloken kenyataan maka ia la banci bengket ku taneh Kanaan. Padahal enggo latih iarak-arakna bangsa e Mesir nari. Tapi erkiteken bage nge perentah Tuhan, patuh Musa ngikutken peraten Tuhan. Janah nggit ia merelaken jabatenna sebage pemimpin man penerusna e me Josua. Si peduaken e me Josua. Memang i bas ogenta sendah labo ituriken uga ekspresi Josua kenca enggo itehna maka ia si nggantiken Musa mimpin bangsa e. Tapi arah turi-turin selanjutna seh ku kitab Josua, kenca enggo ialokenna jabaten pemimpin, idalankenna alu mehuli jabate e seh ku kedungenna. Si peteluken e me bangsa Israel. Tandana maka ngasup bangsa e ngaloken pilihen Dibata e me idukungna Josua mimpin bangsa e seh ku taneh Kanaan.

PJJ-ta sendah i bas rangka mpegegehi kerina kita ngawani perpulungen si enggo milih calon-calon Pertua Diaken GBKP periode 2024 - 2029, si ratana enggo ilaksanaken i bas minggu pemena ras si peduaken bulan Juni enda sue ras jadwal si enggo ibahan Moderamen GBKP. Man Runggun-runggun bage pe Panitia-panitia si enggo ndalanken kerina tahapen alu mehuli sue ras aturen-aturen i bas gerejanta bage pe menjunjung tinggi nilai-nilai demokrasi, akap kami seharusna ise pe kita ngasup ngaloken kai pe ulihna i bas pemilihen e, sebab tek kita maka Dibata si milih serayan-serayanNa arah kerina tahapen si enggo sidalani i bas pemilihen periode enda.

Man bandu calon-calon si lenga terpilih i bas periode enda, ula sempat kitik ukurndu. Harus tetap berpikir positif ras tetap semangat, sebab melala denga bidang-bidang pelayanen si deban si banci silakoken tanpa harus lit gelar pertua entah pe diaken. Bagi bangsa Israel si ngasup ngaloken pilihen Tuhan, marilah sitotoken ras sidukung kerina calon si enggo terpilih i bas periode enda. Adi la lit dukungen arah kita nari perpulungen enggo pasti pelayanen pe la banci maksimal.

Man bandu calon-calon si enggo terpilih, mari radu ras kita erlajar arah Musa ras Josua. Si pemena, Musa enggo mereken teladan man banta kerna pemimpin si tuhu-tuhu nggit ia mengkritisi dirina sendiri, itehna kai saja si jadi kelemahenna, janah isedarina pe keterbatasenna. Kenca enggo itehna kai si jadi kelemahenna ras keterbatasenna, lit si ilakokenna guna menanggulangisa. Sebab maun-maun lit serayan si la nggit introspeksi diri, ngelakoken otokritik terhadap kualitas ras kuantitas pelayanenna. Janah lit ka si ngakukenca kai-kai saja si jadi kekurangenna tapi la lit perobahen, kisat erlajar, rsd.-na. I bas si e tentu harus nggit kita berobah ku si mehuli. Enda akap kami sada kesempaten si ibereken Tuhan guna mbuktikenca maka kam kerina memang layak terpilih jadi Serayan Tuhan i GBKP.

Si peduaken, erlajar kita arah Josua. Ilakokenna tugas tanggung jawabna sebage sekalak pemimpin alu mehuli seh ku kedungenna. Finishing well. Enggo radu ras siteh maka Josua enda e me sekalak tokoh Alkitab si menam sempurna. Adi sioge kitab Josua, la lit sitik pe kesalahen si ibahanna sebage sekalak pemimpin Israel. Kai kuncina? Kuncina tetap ia ersukuten man Dibata, patuh nandangi perentah Dibata, nggeluh erkemalangen man Dibata. Sebage sekalak pemimpin, Josua labo terjeng ngasup mimpin bangsana, tapi i bas jabuna pe, ngasup ia mabai jabuna nggeluh erkemalangen man Dibata.