SUPLEMEN PA MAMRE GBKP TGL. 23 - 29 JUNI 2024

Pdt. Larena Sinuhadji (Nd. ReyRapha Tarigan)

Teks : Matius 25:14-30

Tema : NGGELUH SETIA

Tujun : Gelah Mamre :

1) Meteh pentingna erti kesetiaan i lebe-lebe Dibata

2) Mamre ngasup nggeluh setia man Tuhan alu terteki, ertanggung jawab dingen berupaya nggeluh alu sedalanen kata ras perbahanen

Penaruh

Setia i bas KBBI ertina: berpegang teguh dalam pendirian dan janji, patuh, dan taat. Setia e me salah sada karakter si mehuli i bas ulih Kesah Si Badia (buah Roh). Janah setia masuk ku bas salah sada tata nilai i bas Garis Besar Pelayanan GBKP. Si niarapken kita pe i bas geluhta si tep-tep wari e me kesetiaan ndeharanta i bas perjabunta. Kesetiaan anak-anakta i bas ndalanken pedah-pedah orang tuana. Kesetiaan si erdahinta i bas ndahiken tugas tanggung jawabna. Rsd. Amin pe situhuna rusur ka kita la setia nandangi teman-temanta manusia bage pe Dibata.

I bas PA-ta sekali enda radu ras kita erlajar kerna nggeluh setia i lebe-lebe Dibata bage pe i lebe-lebe manusia. 

Mpebagesi Ogen

Teksta sendah nuriken kerna perumpamaan telu kalak juak-juak, si ibereken tuanna erta-ertana gelah ipokokken juak-juak e. Sekalak-sekalak iberekenna rikutken kengasupen juak-juak e. Deba iberekenna 5 talenta, 2 talenta ras sekalak nari 1 talenta. Juak-juak si iberken 5 ras 2 talenta minter ilipatgandakenna alu ia erbahan usaha. Sedangken si 1 talenta, ibunikenna saja duit tuanna ndai. Kedungenna, juak-juak si ndatken 5 ras 2 talenta ipujiken tuanna kenca enggo ia mulih. Labo hasilna ipujikenna, tapi i bas ia banci mpertangungjawabken duit si enggo ibereken tuanna ndai. Teridah maka duana juak-juak enda, e me kap juak-juak si tutus, mejingkat, mehuli, setia dingen bujur. Erkiteken tutus kalak enda i bas hal si kitik maka ipercayaken tuanna ka si terbeliden.

Sedangken juak-juak si ibereken 1 talenta, lenga pe isungkun tuanna enggo leben ia mandangi tuanna, ibahanna lebe alasenna engkai makana la iusahakenna duit si enggo ibereken tuanna ndai. Merawa tuanna enda ndai, sabab ia juak-juak si jahat ras pekisat. E maka iukum me juak-juak enda ndai, isampetken ku bas ingan si gelap, i ja tangis me ia dingen mesui kel akapna.

Arah perumpamaan enda isingetken mulihi kita kerna piga-piga hal. Si pemena, enggo ibereken Dibata man banta talenta. Talenta si lit i bas kita e banci iertiken karunia, kebeluhen i bas hal-hal tertentu, kesehaten, erta kebayaken, ras kerina bentuk si deban pasu-pasu si ipercayaken Dibata man banta. I bas si e patut kita menyadari kai-kai saja si enggo ipercayaken Dibata man banta.

Si peduaken, kerina talenta ndai ibereken Dibata sue ras kapasitas si lit i bas kita, entah pe sue ras kengasupenta. Emaka ula kita merasa terintimidasi i bas kai pe si ipercayaken Dibata man kalak si deban. Adi enggo isedari kita talenta kai saja si enggo ipercayaken Dibata man banta, kataken bujur man Dibata, bersyukur atas apapun talenta yang sudah Tuhan percayakan kepada kita. Kenca si e, fokus kita ku talenta entah kai pe si enggo ipercayaken Dibata man banta.

Si peteluken, kerina talenta, entah kai pe si enggo ipercayaken Dibata man banta harus ikelola alu setia ras ertanggung jawab. Tek kita adi tuhu-tuhu bertanggung jawab kita i bas kerina talenta si enggo ipercayaken Dibata man banta, ibereken Dibata kepercayaan i bas hal si deban.

Versi Audio Silahkan Klik : https://youtu.be/prhe6T5M6G4

Pengkenaina

Perumpamaan kerna talenta enda akap kami enggo rusur sibahas baik i bas PJJ bage pe i bas PA-PA Kategorial, hampir setiap tahun. Ertina kerna ogenta sendah akap kami labo mesera guna ngantusisa. Adi sikaitken ras tema bage pe tujun i bas PA sendah, iajuk kam kerina Mamre gelah si pemena, menyadari maka keleng ate Dibata e luar biasa i bas kegeluhenndu. Enggo ipercayaken Dibata erbage-bage hal si mehuli i bas kegeluhenndu: ndehara, anak-anak, pendahin, keduduken, jabaten, erta kebayaken, kesehaten, kade-kade, teman meriah, rsd.-na. I bas si e kerina, patutlah kam ngataken bujur man Dibata, sebab Dibata alu setia lalap mereken pasu-pasuNa man bandu.

Si peduaken, adi enggo sipercayaken Dibata kerina hal si mehuli i bas geluhta, kai si harus ibahan kita? I bas penungkunen e, iajuk kam kerina Mamre gelah menjaga dan mengelola kepercayaan si enggo ibereken Dibata alu mehuli. Adi enggo ipercayaken Dibata ndehara ras anak-anak, kelengilah alu tutus. Adi enggo ipercayaken Dibata man bandu pendahin, dahikenlah alu tutus. Adi enggo ipercayaken Dibata man bandu jabaten keduduken, pakekenlah alu mehuli, ula manfaatken keduduken entah jabaten e guna hal-hal si la mehuli si la ngena ate Dibata. Adi enggo sipercayaken Dibata erta kebayaken, sikelola alu mehuli, ula sempat kam ndabuh ku bas sifat merangap, pelit, ras hal-hal si la ngena ate Dibata. Melala denga contoh si deban, si intina erlajarlah setia menjaga dan mengelola kepercayaan si enggo ibereken Dibata man bandu. Enda akap kami menjawab tujun si peduaken PA-ta sendah, Mamre ngasup nggeluh setia man Tuhan alu terteki, ertanggung jawab dingen berupaya nggeluh alu sedalanen kata ras perbahanen. I bas si e tentu labo ngasup kam adi mengandalken gegeh kebeluhenndu, emaka pindolah gegeh i bas Dibata nari gelah ipengasupNa kam kerina Mamre kami ngelakoken sue ras tujun si peduaken PA-ta sendah.

Si peteluken, mehuli akap kami adi siulihi uraian kerna Tata Nilai Kesetiaan si lit i bas GBP GBKP i teruh enda. 

Deskripsi: Menjadi penatalayan yang dapat dipercaya, setia dan diandalkan dalam setiap tugas pelayanan (Ul. 7:9; 2 Tim. 2:13; Rat. 3:22-24)

Panduan perilaku:

• Berpegang teguh pada janji dan komitmen
• Bertanggung jawab atas tugas, keputusan dan tindakan yang dilakukan
• Rela berkorban untuk tujuan yang lebih besar
• Menjaga nama baik organisasi dan sesama

Kata-kata kunci:

• Tulus
• Dapat dipercaya
• Dedikasi (rela berkorban)
• Kontribusi

Kalimat afirmasi: “Kami memegang teguh kepercayaan yang diberikan Allah kepada kami untuk setia pada perintah dan firman-Nya”

Perilaku yang dianjurkan:

• Berperilaku dan bertindak selaras dengan perkataan
• Menjadi seseorang yang dapat dipercaya dan bertanggung jawab

Alu bage rikutken bahan PA-ta sendah, erpenganyaklah kam kerina Mamre kami i bas tetap setia man Dibata ras wujudnyatakenlah arah perbahanenta si tep-tep wari gelah kam kerina jadi Mamre si ertanggung jawab ras terteki i bas kai pe. Tuhan-lah si tetap nampati kita ndalankenca bagi si ngena ateNa.