SUPLEMEN PA MORIA GBKP TGL. 23 - 29 JUNI 2024

Pdt. Larena Sinuhadji (Nd. ReyRapha Tarigan)

HARGANAS (Hari Keluarga Nasional)

Si Man Ogen : Mazmur 128:1-6

Tema : JABU SI MALANG MAN TUHAN

Tujun : Gelah Moria :

- Nuriken ulu kemalemen ate e me i bas Dibata nari

- Naksiken tanda-tanda kemalemen ate arah perukuren, pengerana ras perbahanen

Metode : Studi kasus

Penaruh

Tema, tujun, ras si man ogen i bas PA-ta sendah enggo pernah sibahas i bas PA Mamre Tgl. 2 - 8 Juni 2024 si lepas. E maka i bas kesempaten enda, iulihi kami bahan renungen si enggo pernah ibahan kami man kam kerina Moria GBKP. Amin pe enggo rusur sibahas topik kerna jabu-jabu kalak si tek si erkemalangen man Dibata, baik i bas PJJ bage pe PA-PA Kategorial, arapen kami ula sempat kita bosan guna terus erlajar membentuk jabu-jabu si erkemalangen man Tuhan. 

Mpebagesi Si Man Ogen

Masmur 128 e me salah sada ende-enden ziarah si iendeken tupung bangsa Israel berkat ku Rumah Pertoton Tuhan i Jerusalem. Masmur 128 e me ende-nden kerna pasu-pasu Tuhan man isi jabu. Sada ketedehen ate, kalak si berkat ersembah man Tuhan ku Jerusalem ndatken pasu-pasu i bas Tuhan nari i bas jabuna. Masmur 128 enda ncidahkenca maka jabu e me unsur si penting si jadi pondasi bangsa Israel. I bas Masmur 128 enda icidahken kegeluhen jabu si ideal sue ras peraten Dibata. Adi mehuli geluh perjabun kalak Israel enggo pasti bangsa e pe ipasu-pasu Dibata.

Inti i bas perikop enda e me sangap kalak si malang man Tuhan si nggeluh ngikutken kerina perentahNa (Bhs. Ind.: “Berbahagialah setiap orang yang takut akan TUHAN, yang hidup menurut jalan yang ditunjukkanNya”). Ayat enda iulihi sekali nari i bas ay. 4, “Bage me pasu-pasu Tuhan man kalak si malang man baNa” (Bhs. Ind.: “Sesungguhnya demikianlah akan diberkati orang laki-laki yang takut akan TUHAN”). Ertina kesangapen (kebahagiaan) i bas jabu ibenaken i bas sekalak perbapan si malang man Tuhan, si nggeluh ngikutken perentah Tuhan. Dalan Tuhan si ikutken labo dalanta. Adi kita, kadang pintas, instan, cepat, la nggit susah, labo siakap masalah la sentudu bagi si ngena ate Tuhan, si penting berhasil, sukses.

Kai saja dage kebahagiaan (kesangapen) man kalak si malang man Tuhan, entah pe  ulih kalak si nggeluh ngikutken perentah Tuhan? Piga-piga hal icidahken i jenda :

Si pemena, ipanna me ulihna latih, sangap nggeluh mehuli sikerajangenna (“Apabila engkau memakan hasil jerih payah tanganmu, berbahagialah engkau dan baiklah keadaanmu”). Tuhu-tuhu ternikmatisa ulih latih e ras tuhu-tuhu maba kinulin, maba kemalemen ate. Secara tersirat lit i je ungkapen pengataken bujur ras erlajar mencukupken diri arah ulih latih bekas Tuhan si merekenca, seh makana tuhu-tuhu maba sukacita, maba kiniulin arah kai si enggo ibereken Tuhan i bas kinilatihen erdahin.

Si peduaken, ndeharana bali ras anggur si meramis i sekelewet mejana. Anggur e me sada buah si cukup penting i Israel. Sada inemen si ibutuhken dingen mereken keriahen. Bage me iarapken ndehara si tuhu-tuhu jadi penolong, mereken keriahen kempak perbulangen ras seisi jabu.

Si peteluken, anak-anakna bali ras tunas batang saitun. Buah saitun jadi pangan dingen minakna jadi tambar, minak penangkuhen man imam, banci jadi parfum, rsd. Ertina, anak-anakna tuhu-tuhu mereken kebahagiaan man keluarga sebab tuhu-tuhu erguna kehadirenna bas jabu e. Cawir metua, maka sempat siidah kempu-kempu.

Versi Audio Silahkan Klik : https://youtu.be/efZmOWPAeQ0

Pengkenaina

Jabu si sempabu (harmonis) si erkemalangen man Tuhan, e me sura-suranta tupung kita erjabu ras ipasu-pasu Tuhan. Labo lit bas kita si erjabu gelah rontang jabunta, walau pe bas perdalanenna jabu e lit ketidakbahagian, rayung bahkan sirang bas perjabun. Tapi sebage kalak si tek sura-suranta, pertotonta, jabu e me jabu si bahagia, si harmonis, si jadi pasu-pasu (berkat) man sekelewetta. Janah enda si mehulina ibenaken i bas perbapan sebage imam i tengah-tengah keluarga. Labo berarti la lit i je peran ndehara. Sabab melala nge siidah, tutusen ndehara ras anak-anak erkemalangen man Tuhan asangken bapa e sendiri. Ertina adi perbapan lenga beluh, pernanden harus berinisiatif mengambil peran, ula sempat sidalih-dalihen entah pe ngadi guna mabai isi jabu nggeluh erkemalangen man Tuhan ras ndalanken si ngena ate Tuhan. Em akap kami peran kita Moria entah pe ndehara e me menjadi penolong, menjadi tiang doa i bas keluarga, si menyempurnaken kebahagiaan e.

Anak-anak jadi pasu-pasu man keluarga. Arah perbahenna, prestasina, kinitekenna jadi tambar si periahken ukur man orang tua ras kalak si deban. Sabab melala gundari anak-anakta erbahanca gulut orang tuana, latih orang tuana. Penungkunenna, anak lebe mehamat man orang tua, entah orang tua lebe si ngkelengi anak ras ididikna anak na alu mehuli? Enggo pasti kita lebe mendidik anak-anakta alu mehuli, kita orang tuana jadi usihen si mehuli mabai anak-anakta erkemalangen man Tuhan. Anak memang keturunanta, tetapi sifatna, karakterna labo erkiteken keturunan, e sitik ngenca pengaruhna. Si buena erkiteken usihna kita. E maka la banci lang, benaken kitik-kitik nari sibabai anak-anakta ku si mehuli, gelah karakter mehuli lit bas ia, mentalna tangguh. Bahkan, benaken bas bertin nari pe enggo sitanamken karakter jujur, adil, disiplin, mehuli, ertanggung jawab, peduli, rsd. Si lebih penting i bas si e kerina, orang tua arus arus jadi teladan, usihen. Adi usur idahna hal-hal si la mehuli si ilakoken orang tuana, enggo pasti sedikit banyak anak-anakta meniru kai si ilakoken orang tuana.

I bas 29 Juni 2024 enda negaranta mperingeti Hari Keluarga Nasional (Harganas) si pe-31-ken alu tema “Keluarga Berkualitas Menuju Indonesia Emas,” ertina menjelang Indonesia Emas tahun 2045 iarapken kerina kita keluarga Indonesia gundari nari, semakin meningkatkan kualitas kegeluhen keluarganta masing-masing. Baik dari segi fisik, psikis, mental, ras spiritual. Emaka selaku Moria mari radu ras sitingkatken keikutsertaanta i bas menghasilkan generasi penerus si berkualitas. Tema ras tujun PA-ta sendah ngajuk kita kerina Moria gelah naksiken tanda-tanda kemalemen ate arah perukuren, pengerana ras perbahanen, janah jadikenlah e teladan i tengah-tengah jabuta, i japa pe kita ringan. Dibata si mpegegehi ras mpengasup kita kerina Moria GBKP guna ngelakokenca.