SUPLEMEN PA MAMRE GBKP TGL. 30 JUNI - 6 JULI 2024

Pdt. Larena Sinuhadji (Nd. ReyRapha Tarigan)

Teks : Johanes 15:13-15

Tema : MPERDIATEKEN KEPERLUN TEMAN

Tujun : Gelah Mamre :

1) Meteh maka nggeluh harus mperdiateken teman

2) Ngasup mbangun sinergi i bas konteks eksternal guna kemulian Dibata

Penaruh

Piga-piga waktu si lepas lit sada istilah si viral i bas media sosial, e me “bestie.” Bestie enda asal katana e me “best friend” entah pe sahabat. Adi i bas bahasa Karo nina “teman” entah pe “kandu-kandu.” Sahabat ertina teman dekat, lebih dekat dari hanya sekedar teman biasa. I bas bhs.Yunani lit kata “filia” si ertina cinta kasih persahabatan. Adi sitelusuri lit sekitar 83 kata “sahabat” i bas Alkitab Terjemahan Baru (TB-LAI), ertina hubungan persahabatan, karakter bersahabat, entah pe unsur-unsur persahabatan e me bagin si penting i bas Pustaka Si Badia. I bas kesempaten enda radu ras kita erlajar kerna karakter sahabat sue ras ogenta sendah.

Mpebagesi Teks

Teks ogenta sendah lit i teruh judul perikop “Yesus kap batang anggur si tuhu-tuhu,” i bas terj. TB-LAI “Pokok anggur yang benar.” Batang anggur entah pe pokok anggur eme anding-andingen erkiniteken si tuhu-tuhu man Dibata i bas Yesus Kristus. 

Erpalasken Ese. 15:1-8; 19:10-14; Jes. 5:1-7; ras Mas. 80:9-17, perikop enda banci ikataken antitesis Israel sebage bangsa pilihen Dibata. Pedoman Penafsiran Alkitab Injil Yohanes i bas LAI nari ngatakenca, “Di dalam Yoh. 15:1 ini Yesus digambarkan sebagai pokok anggur yang benar dengan maksud untuk mempertentangkanNya dengan Israel. Israel telah ditanam Allah sebagai “pokok anggur yang benar,” namun yang merosot akhlaknya dan menjadi tidak berguna.” Ertina perikop enda secara garis besar ngatakenca, ula min bagi bangsa Israel si mengaku dirina bangsa pilihen Dibata tapi la ngasup ncibalken dirina sebage bangsa pilihen Dibata. Salah sada tandana bangsa pilihen Dibata e me erkeleng ate nandangi sesama manusia.

Lit dua kata kunci akap kami i bas ogenta sendah e me “sahabat” ras “kasih.” Sibenaken lebe pembahasenta i bas ay.15 nari. I bas Pedoman Penafsiran Alkitab Injil Yohanes i bas LAI nari, ayat enda iterjemahken, “Aku tidak lagi menyebut kalian hamba/pelayan, sebab hamba/pelayan tidak tahu urusan tuannya. Kalian Kusebut sahabat, sebab semua yang Kudengar dari [Allah] BapaKu sudah Kusampaikan kepada kalian.” I bas ayat enda jelas, kerina kalak si enggo ngaloken keselamaten i bas Yesus Kristus arah kinitekenna, enggo iangkat derajatna i bas budak nari jadi sahabat. Kenangkihen pola relasi enda akap kami ndauh kel jarakna. I bas sekalak juak-juak entah pe budak nari nangkih jadi sahabat. Sekalak sahabat tentu itehna kel kai si jadi sura-sura sahabatna. Kita enda kerina sahabat Dibata, adi bage tentu enggo iteh kita kai si jadi sura-sura Dibata. Rikutken ogenta sendah, kai saja si jadi sura-sura Dibata?

I bas ay. 14 ikataken, nina, “Kam teman-temanKu adi idalankenndu kai si Kupedahken man bandu.” I bas terj. Pedoman Penafsiran Alkitab Injil Yohanes LAI nari nina, “Kalau kalian melakukan apa yang Kuperintahkan kepadamu, maka kalian sahabat-sahabatKu.” Sebage sahabat-sahabat Dibata, kita iajuk gelah ndalanken, ngelakoken, melakukan, kerina si jadi sura-sura Dibata.

I bas ay. 13 ikataken, nina, “Labo lit keleng ate si belinen asangken keleng ate kalak si nggit ngasamken kesahna guna teman-temanna.” I bas terj. Pedoman Penafsiran LAI nari nina, “Jika seseorang mati demi sahabat-sahabatnya, itu menunjukkan bahwa ia begitu mengasihi mereka sehingga kasihnya itu sudah tidak lagi dapat lebih besar dari itu.” Enda encidahkenca keleng ate Kristus si mate i kayu persilang guna kerina kita si ikelengiNa. Tapi i bas sisi si deban, ayat enda encidahkenca pengorbanen si meganjangna kel si banci ilakoken sekalak sahabat nari guna sahabat-sahabatna. Ertina sebage sahabat-sahabat Dibata, iajuk kita kerina gelah rela entah pe nggit erkorban kai pe sebage resiko ngelakoken kerina si jadi sura-sura Dibata. Khususna i bas kita engkelengi kalak si deban si labo sahabatta bahkan kalak si jahat perbahanenna man banta.

Versi Audio silahkan klik : https://youtu.be/pRtLaQoQrDQ

Pengkenaina

Tema ras tujun PA-ta sendah akap kami mulihi ngingetken kam kerina Mamre kerna motto Mamre “Erdiate ras erpemere.” Kalak si erpemere lenga tentu erdiate, tapi kalak si mediate enggo pasti erpemere, erkiteken palas i bas kita mediate e me keleng ate Kristus si proaktif reh man banta setiap saat. Arah kesah si ikesahken kita setiap detik, arah ndehara ras anak-anak si ipelemiken Dibata man bandu, arah pendahin ras rezeki si ialokenndu, arah keriahen ras dame sejahtera si igejapkenndu, ras melala nari pasu-pasu Dibata i bas kegeluhenndu. I bas si e kam pe iajuk gelah erdiate ras erpemere secara proaktif, la nari ngukurken guna diri sendiri, janah la nari man iah-iahenken.

I bas ogenta sendah radu ras kita erlajar kerna biak bersahabat nandangi kalak si deban. Karakter bersahabat enda icidahken alu erkeleng ate ras ngelakoken si ngena ate Dibata. Sekalak sahabat tentu sekalak si mediate (peduli) nandangi keperlun kalak si deban. I bas si e sensitifitasta (kepekaan) si harus sitingkatken. Ibenaken i bas rumahta sekalak-sekalak, mari radu ras sitingkatken kepekaannta nandangi keperlun isi jabu. Keperlun i jenda tentuna labo terjeng si sifatna materi, erta, sen, rsd. Tapi perhatian, sapaan, sentuhan kasih, ikut merasakan, memberi pujian, semangat, rsd. Adi enggo sibiasaken i bas rumahta masing-masing, tingkatken ku level perpulungen i Gereja. Adi enggo alu mehuli silakoken i tengah-tengah perpulungenta, tingkatken ka ku level lingkungen masyarakat sekitarta. I bas si e tentu arapenta tujun si peduaken i bas PA-ta sendah banci terwujud.

Bagem akap kami si banci siorati i bas PA-ta sendah. Mamre erdiate ras erpemere labo terjeng i bas lingkungen keluarga ras Gereja saja, tapi i bas lingkungan masyarakat sekitar pe Mamre harus erdiate ras erpemere. Secara kelembagaan Kategorial Mamre Runggun akap kami enggo banci erbahan aksi kasih nandangi masyarakat si membutuhken i sekitar Gerejanta masing-masing. Dibata si mpengasup kam kerina Mamre guna erkeleng ate, erdiate ras erpemere, sebab kam kerina sahabat Dibata.