SUPLEMEN PJJ GBKP TGL. 11 - 17 PEBRUARI 2024

Pdt. Larena br. Sinuhadji (Nd. ReyRapha Tarigan)

MILIH PEMIMPIN SI BUJUR (Jesaya 3:1-12)

[PEMILU]

Penaruh

Mungkin rusur sibegi kuan-kuan enda, “Bila ingin mengetahui karakter seseorang, berilah dia kekuasaan.” Kuan-kuan enda ikataken sekalak presiden Amerika Serikat si tergelar Abraham Lincoln. Adi sioge biografi kerna Abraham Lincoln enda, akap kami ia sekalak pemimpin si bujur. Ikataken i bas Wikipedia bagenda nina, “Abraham Lincoln adalah Presiden Amerika Serikat ke-16, yang menjabat sejak 4 Maret 1861 sampai terjadi pembunuhan terhadap dirinya 15 April 1865. Dia memimpin bangsanya keluar dari Perang Saudara Amerika, mempertahankan persatuan bangsa, dan menghapuskan perbudakan. Namun, saat perang telah mendekati akhir, dia menjadi presiden AS pertama yang dibunuh.” Jadi pemimpin si bujur labo hal si murah erkiteken enggo pasti melala tantangen si man hadapen. PJJ sendah i bas rangka persiapenta milih pemimpin si bujur i bas PEMILU 2024.

Mpebagesi Kata Dibata

Nabi Yesaya melayani i tengah-tengah bangsa Israel i bas jaman pemerentahen raja Usia, Jotam, Ahas ras Hiskia (bdk. Yesaya 1:1), antara tahun 740 - 687 SM, kurang lebih 50 tahun dekahna. Rikutken tradisi, ikaitken ras Heber 11:37, nabi Yesaya mate erkiteken ibunuh sekalak raja Israel.

Perikop si jadi ogenta sendah masuk ku bas kumpulen nubuaten kerna Yehuda (Juda) ras Jerusalem, bindu 1 - 12. I bas Alkitab TB-LAI perikop ogenta sendah masuk ku bas sada perikop si mbelin (ay. 1-26) alu judul “Hukuman TUHAN terhadap orang-orang yang menyesatkan bangsa itu.” Sedangken i bas Alkitab BIMK ras bhs. Karo, ay. 1-26 ibagi ku bas telu perikop alu judul “Jerusalem rontang dingen serbut” (ay. 1-12), “TUHAN ngerunggui bangsaNa” (ay. 13-15), ras “Persinget kerna ukumen man diberu-diberu Jerusalem” (ay. 16-26). I bas judul-judul e ndai banci sigambarken isi perikop ay. 1-26 secara garis besar, Jerusalem rontang dingen serbut erkiteken kinilabujuren pemimpin-pemimpinna, janah kedungenna pemimpin-pemimpin si la bujur ndai datken ukumen i bas Dibata nari.

Nubuaten isehken biasana gelah jadi persinget bangsa Israel sedar ras bertobat, entah pe gelah bangsa e selalu mawas diri, ras tetap ersukuten erkemalangen man Dibata. Nubuaten i bas ogenta sendah isehken nabi Yesaya man bangsa Israel, maka lit paksana pagi bangsa e rontang ras serbut. Kondisi rontang ras serbut enda teridah benaken ay. 4, i ja lit pagi “pemimpin-pemimpin danak-danak,” ertina pemimpin-pemimpin si lenga siap jadi pemimpin. Pemimpin-pemimpin karbitan si lenga tasak guna jadi pemimpin. Pemimpin-pemimpin si lenga terkuasaina dirina. I bas terj. BIMK nina, “Mereka akan memerintah dengan sewenang-wenang.”

I bas ay. 5  ituriken, lit paksana pagi pemimpin-pemimpin si dahinna nipui. I bas terj. BIMK nina, “saling menindas.” La lit etika, tata krama ras sopan santun i bas diri pemimpin-pemimpin si nguda denga. Lanai mehamat man kalak si tuan asangken ia. “Kalak si la meherga megombang man kalak si ermulia,” enda mungkin maksudna pejabat-pejabat pemerintahan enggo lanai lit wibawana i lebe-lebe rakyatna.

I bas ay. 6 ras 7 ituriken maka lit paksana pagi para pemimpin la nggit berkorban guna rakyatna. Kekuasaan ras materi ngenca si jadi perayaken, adi la lit keuntungen materi man bana maka erpenulak ia jadi pemimpin. Janah nepotisme pe merajalela.

I bas ay. 8 seh 12 ituriken maka la lit nari spiritualitas bage pe moralitas i bas diri para pemimpin. Perbahanenna ngelawan Tuhan, la nari mbiar man Dibata, la nari mela ngelakoken dosa i lebe-lebe kalak si enterem, jahat perbahanenna, mbungaken sen, ras ibabaina rakyat ku dalan si papak. Si enda kerina si erbahanca Jerusalem ras Juda runtuh.

Tapi i bas ay. 10 lit je janji Dibata man kalak si bujur e me dat kemalemen ate, si mehuli reh man bana, janah banci inanamina ulih pendahinna. I bas terj. BIMK nina, “Mereka akan bahagia dan selamat. Mereka akan menikmati hasil jerih payahnya.” Amin pe paksa si e kalak si bujur itindas ras datken erbage-bage kiniseran erkiteken perbahanen pemimpin-pemimpin si la bujur.

I bas ay. 11 lit je ituriken janji ukumen Dibata man pemimpin si jahat (la bujur). I bas terj. BIMK nina, “Celakalah orang jahat! Mereka akan diperlakukan seperti mereka telah memperlakukan orang lain.”  

Versi Audio Silahkan Klik : https://youtu.be/92MdHvNetfs

Pengkenaina

PJJ-ta sendah i bas rangka ersikap kita guna milih pemimpin-pemimpin i bas negaranta. Pemilihan presiden wakil presiden. Wakil-wakil rakyat i bas DPR, DPRD, DPD. Kerna pedoman i bas kita milih pemimpin i negaranta akap kami enggo rusur sidatken kita setiap 5 tahun sekali entah pe setiap lit Pilkada. Biasana pedoman si idatken kita, kritis i bas kita milih pemimpin, sidarami rekam jejakna, pilih pemimpin si rekam jejakna mejile, la pernah terlibat kasus-kasus kriminal entah pe pelanggaran HAM, la pernah terlibat i bas Narkoba, rsd. Si rusur sibahas i bas PJJ bage pe PA-PA Kategorial e me pemimpin si erkemalangen man Dibata. I bas kesempaten enda mulihi kita isingetken guna milih pemimpin si bujur.

Adi rikutken ogenta sendah, kriteria pemimpin si bujur e me, si pemena lebe, pilihlah pemimpin si secara kedewasaan (fisik, psikis, mental) siap untuk menjadi seorang pemimpin. Si peduaken, pilihlah pemimpin si lit i bas ia etika, tata krama, sopan santun. Adi i bas dunia politik lit istilah “fatsun politik.” I bas salah sada situs ijelasken nina, “Menurut Kamus Besar Bahasa Indonesia (KBBI) Fatsun diartikan sopan santun, etika. Fatsun politik adalah etika politik yang santun. Santun dalam arti mampu memberikan pembelajaran sekaligus pendewasaan dalam menyampaikan pendapat kepada khalayak umum. Etika politik memberikan ruang sekaligus cara bahwa dalam menyelesaikan masalah politik, tahapan proses sampai dengan pengambilan keputusan akhir tetap harus memberikan orientasi pembelajaran bagi publik melalui fatsun politik. Si peteluken, pilihlah pemimpin si nggit erkorban guna rakyatna. Ertina, pemimpin e enggo selesai dengan dirinya sendiri. La nari lit i bas ia ambisi guna datken kekuasaan ras kekayaan materi entah pe i bas istilah si nai, pilihlah pemimpin si anti korupsi, kolusi, ras nepotisme. Si peempatken, pilihlah pemimpin si secara spiritualitas erkemalangen man Dibata, mbiar man Dibata, janah moralitasna mehuli. La lit i bas ia rekam jejak perbahanen-perbahanen si la mehuli di masa lalu.

I bas si e marilah kita ertoto, gelah ipengasup Dibata kita jadi pemilih-pemilih si cerdas ras erkemalangen man Dibata. La tergoda politik uang. La tergoda politik transaksional. Pang kita membela hak pilih kita amin pe lit ancamen entah pe lit si mengintimidasi. Pang kita melaporkan kecurangan-kecurangan. Ertoto kita man Dibata gelah kerina proses PEMILU banci erdalan alu mehuli, langsung, umum, bebas, rahasia, jujur dan adil. Kerina petugas si enggo itentuken guna ertugas banci ertugas alu mehuli, mbiar man Dibata. Situasi bangsa ras negaranta aman sope ras kenca PEMILU ilaksanaken. Si paling penting, ula sempat kita golput. Sebab bagi nina Romo Magnis, “Pemilu bukan hanya untuk memilih pemimpin yang baik, tetapi untuk mencegah yang jahat berkuasa.” Dibata si mpegegehi kita.