SUPLEMEN PJJ GBKP TGL. 28 JAN. - 3 PEB. 2024

Pdt. Larena br. Sinuhadji (Nd. ReyRapha Tarigan)

MAKE PEMERE DIBATA GUNA KINIULIN (1 Petrus 4:7-11)

Evaluasi Sasaran Pelayanan GBKP Tahun 2023

Penaruh

Syalom mejuah-juah man banta kerina kekelengeni Tuhan perpulungen GBKP i japa pe kam ringan. Selamat Tahun Baru 2024! La tergejap enggo kurang lebih sada bulan kita bengket ku bas tahun si mbaru enda. Tahun perkuah ate Dibata, i ja GBKP ibere Dibata denga kesempaten guna bengket ku bas tahun pelayanen si mbaru e me “Berkarya dan berguna untuk orang lain.” Leben sipenangkih puji-pujin ras pengataken bujurta man Dibata erkiteken sasaran pelayanan GBKP tahun si lepas 2023 enggo silaksanaken alu mehuli. Tentu i jah i je melala denga kekurangen, tapi paling tidak enggo silumbaken man banta gelah menjadi subjek aktif pelayanen i bas gerejanta masing-masing.

Emaka i bas PJJ perdana sendah i bas tahun 2024, silakoken evaluasi sasaran pelayanan GBKP tahun si lepas, e me “Jemaat menjadi pelaku aktif pelayanan.” Lit kuan-kuan si ngatakenca, “Hanya keledai yang jatuh ke lubang yang sama dua kali.” Ertina selaku makhluk si rukur, evaluasi e me sada proses si penting si harus ilakoken, gelah siteh kai saja si perlu man pekenan guna peningkaten kualitas geluhta. Evaluasi e me sada kegiaten si alkitabiah, banci sioge umpamana Kej. 1:31, i ja Dibata ngenen mulihi kerina si enggo ijadikenNa, janah ikatakenNa “sungguh amat baik!” Si deban umpamana turi-turin 70 ajar-ajar si itutus Yesus i bas Luk. 10:17-20, i ja Yesus ngelakoken evaluasi kerna dahin-dahin pelayanen si enggo ilakoken 70 ajar-ajar ndai. Bage pe i bas Perb. Rasul 6:1-7 i ja rasul-rasul ngelakoken evaluasi pelayanen man perpulungen kalak si tek si enggo mbalu.

Sope kita ngelakoken evaluasi, mari radu ras sirenungken Kata Dibata i bas PJJ-ta sendah. 
 
Mpebagesi Kata Dibata

Rasul Petrus mereken pergegeh man perpulungen kalak si tek si merap marpar i 5 provinsi Kerajaan Romawi, e me: Pontus, Galatia, Kapadokia, Asia Kitik, ras Bitinia, kira-kira tahun 60-63 Masehi. Perpulungen paksa si e mengalami erbage-bage perbeben ras kiniseran si mberat erkiteken kinitekenna man Yesus Kristus. Mungkin kadar perbeben ras kiniseran i bas tep-tep wilayah ndai bervariasi. Lit si mberat kel, lit ka si labo mberat, rsd. Tapi ratana perpulungen kalak si tek i wilayah 5 propinsi ndai ngenanami perbeben ras kiniseran erkiteken gaya hidupna si berbeda asangken masyarakat pada umumna. I tengah perbeben ras kiniseran si mberat e, lit perpulungen si enggo lanai ngasup ndalani kegeluhen si tep-tep wari, emaka kurang pedas iakapna kerehen Yesus si peduakaliken, gelah pedas pulah atena i bas perbeben ras kiniseran si mberat ndai. Emaka surat enda tuhu-tuhu iarapken Petrus jadi pedoman ras pergegeh man perpulungen si sangana kote kiniteken bage pe kegeluhenna paksa si e.

Rasul Petrus ngatakenca i bas ay. 7 nina, “Kerina si nasa lit enggo ndeher kedungenna. Dage kuasailah dirindu janah petenenglah ukurndu gelah ngasup kam ertoto.” I bas tafsiren LAI ayat enda banci iterjemahken, “Segala sesuatu yang ada sekarang ini akan segera berakhir. Karena itu tetaplah berpikir tenang dan waspadalah, supaya kalian dapat berdoa dengan baik.” I bas ayat enda Petrus ngajuk perpulungen gelah ula fokus ku kerehen Tuhan si peduakaliken sebab e enggo pasti bakal terjadi, tapi fokuslah ku kai-kai saja si banci denga simaksimalken i bas waktu si lit. I bas si e, hal si penting si pemena si harus ilakoken e me tetap ertoto alu kualitas ras kuantitas si terbaik. Ertina ertoto e ilakoken alu ukur si teneng tapi tetap metenget.

Hal penting si peduaken si harus silakoken e me sikeleng-kelengen sada ras si debanna. Ay. 8 i bas tafsiren LAI banci siterjemahken, “Yang paling penting, kalian harus tetap saling mengasihi dengan sungguh-sungguh. Dengan begitu, kalian selalu siap untuk mengampuni orang yang berbuat jahat kepada kalian.” Kualitas ras kuantitas kekelengen harus semakin itingkatken seh ku tingkat tertinggi e me ngasup ngalemi (mengampuni) kalak si jahat man banta. Wujud nyata sikeleng-kelengen selanjutna ikataken Rasul Petrus i bas ay. 9 ras 10, e me metemue alu meriah ukur, saling melayani, ras sisampat-sampaten. Ay. 10 i bas tafsiren LAI iterjemahken bagenda nina, “Kalian masing-masing telah menerima pemberian dari Allah. Kelolalah semuanya itu dengan baik. Karena itu, pakailah anugerah pemberian itu untuk saling menolong sesama kalian.”

Hal penting si peteluken, kai pe si ilakoken output-na harus guna kemulian gelar Dibata. Ay. 11 i bas tafsiren LAI nari, banci iterjemahken bagenda nina, “Kalau seseorang berbicara, dia harus ingat bahwa dia sedang menyampaikan perkataan Allah. Kalau seseorang menolong orang lain, dia harus melakukannya dengan kekuatan dari Allah. Semua yang kalian lakukan haruslah dapat membuat orang meninggikan Allah. Yesus Kristus-lah yang membuat semua itu bisa terjadi. Dialah yang berkuasa dan patut dipuji selama-lamanya. Amin!” Guna si e tentuna leben harus lit pengakun i bas dirinta maka Dibata-lah ngenca si erkuasa i bas geluhta ras Dibata ngenca si patut isembah. I bas si e Dibata si mpengasup kita jadi usihen man sekelewetta. Kai pe si ibelasken ras si ilakoken kita membangun, memotivasi, membawa energi positif, maba kiniersadaan ras Kristus, janah gelar Dibata imuliaken arah kehadirenta i japa pe kita ringan.

Versi Audio Silahkan Klik : https://www.youtube.com/watch?v=-N8wRbWXK-Q

Pengkenaina

Arah Kata Dibata i datas lit telu hal si harus tetap silakoken selaku kalak si tek jaman gundari enda. Si pemena, kai pe si terjadi i bas geluhta, ertoto ula sempat tading. Jadilah tiang doa untuk diri sendiri sebelum menjadi tiang doa untuk orang lain. Maksudna jelas, relasi-ta ras Dibata harus tetap terjalin alu mehuli arah pertotonta. Emaka marilah sipesikap kualitas ras kuantitas ertotonta, alu ukur si teneng tapi tetap metenget, sebab kerehen Dibata si peduakaliken (entah pe kematenta) banci terjadi kapan saja dan di mana saja.

Si peduaken, kai pe si terjadi i bas geluhta, keleng ate Kristus ula sempat bene i bas dirinta. Keleng ate Kristus e me palas i bas kita engkelengi diri sendiri bage pe engkelengi kalak si deban. Keleng ate Kristus si mpengasup kita ngaloken kalak si deban alu tulus, keleng ate Kristus si mpengasup kita nampati kalak si deban, keleng ate Kristus si mpengasup kita ngataken bujur man Dibata, keleng ate Kristus si mpengasup kita makeken kerina pemere Dibata alu mehuli guna kiniulin kalak si deban, janah puncakna, keleng ate Kristus mpengasup kita ngalemi kalak si jahat man banta.

Si peteluken, kai pe si terjadi i bas geluhta, ula sempat kita lupa identitasta selaku kalak si enggo ngaloken keselamaten i bas Yesus Kristus. I bas si e harus lit pengakun i bas dirinta maka Dibata i bas Yesus Kristus ngenca si isembah ras erkuasa i bas geluhta. Emaka Dibata si mpengasup kita jadi usihen man sekelewtta si kedungenna maba kemulian man Dibata.

Tema si seh man banta i bas PJJ-ta sendah, ipalasi Kata Dibata khususna ay. 10, nina, “Sekalak-sekalak selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, harus nggunaken pemere e guna kiniulin kalak si deban.” Dalam rangka evaluasi sasaran pelayanan GBKP tahun 2023, “Jemaat menjadi pelaku aktif pelayanan.” Hal si pemena si akap kami banci jadi bahan evaluasi e me kerna durasi sasaran pelayanan. Mungkin lebih mejile adi durasi sasaren pelayanen labo sada tahun tapi dua tahun gelah kai ateta si iarapken icapai banci tercapai alu maksimal. Janah kai pe si ibentuk kita i bas sasaren pelayanan e banci lebih pajek, entah pe lebih mengakar.

Si peduaken, kerina tim pelayanen si enggo ibentuk harus tetap sipertahanken bahkan lebih sitingkatken lebih variatif gelah kerina jemaat ikut muat bagin i bas pelayanen la lit si tading-tading. Roster entah pe jadwal pelayanen harus tetap lit gelah ula sempat tim-tim si enggo terbentuk mandek bahkan ngadi.

Si peteluken, pembinaan-pembinaan si berkaiten ras peningkaten kesadaren jemaat i bas jadi pelaku aktif i bas pelayanen harus tetap lit gelah palas kiniteken semakin paguh.

Terakhir, tema i bas PJJ-ta sendah ngajuk kita gelah ngataken bujur man Dibata i bas kerina pemere (karunia-karunia Roh Kudus) si enggo ipercayaken Dibata man banta. Marilah sikembangken pemere-pemere e guna kiniulin gerejanta. Janah pindolah gegeh i bas Dibata nari gelah ipengasupNa kita makeken pemere-pemere e guna kemulian gelar Dibata.