SUPLEMEN PJJ GBKP TGL. 18 - 24 PEBRUARI 2024

Pdt. Larena br. Sinuhadji (Nd. ReyRapha Tarigan)

NGIKUTKEN YESUS JADI AJAR-AJARNA (Matius 4:18-22)

[Pemilihen Calon Pertua ras Calon Diaken bas Sektor]

Mengikuti atau berjalan di belakang seseorang pasti membawa akibat atau dampak. Kegeluhennta pasti lit perubahenna, ras pe perubahen e tergantung ise si man ikutenken. Umpamana, adi siikutken pemusik entah seniman, enggo pasti lit perubahen bas kita, waktu tidur (kadang tidak tentu jam tidur dan bangunnya), kebiasaan, rsd. Bage pe adi kita ngikutken Tuhan Yesus sabage Tuhan ras Juruselamatta, enggo pasti melala perubahen bas dirinta. Prioritas geluhna, sikap geluhna, kepedulianna, biak-biakna enggo pasti melekat bas kita, adi siikutken Tuhan Yesus bas geluhta. 

Teksta Matius 4:18-22 ibere judul “Jesus ndilo empat kalak penjala nurung.” Kenca ibegi Yesus maka Johanes peridiken enggo ipenjaraken, maka lawes Yesus ku Galilea. Janah Galilea me pusat pelayanen Tuhan Yesus. Ibenaken Yesus ngajar nina “Jeralah i bas dosandu nari, sabab kinirajan surga enggo ndeher.” Janah asum Yesus erdalan-dalan i tepi Danau Galilea, idahNa dua kalak si sembuyak si sangana njala nurung, e me Simon si igelari Petrus ras Andreas. Emaka nina Tuhan Yesus, “Mari ikutken Aku, maka Ku ajari kam ndilo kalak si deban jadi ajar-ajarKu.” Si luar biasa, minter itandingken kalak e jalana ras ikutkenNa Yesus.  Bage pe asum iterusken Yesus erdalan, idahNa ka dua kalak si sembuyak e me Jakub ras Johanes anak Sebedeus. Kalak enda pe sangana bas perahu ras bapana sangana pesikap jala. Asum idilo Yesus ia duana, minter itadingkenna perahu e, bage pe itadingkenna bapana ras ikutkenna Yesus.

Lit piga-piga poin penting rikutken perikopta:

1. Yesus berinisiatif ndarami ajar-ajarNa janah tanggung jawabta e me ngueken pendilo Tuhan alu nggit ndalani setiap prosesna. Emaka asum Tuhan millih kita, si perlebe sipersiapken e me pusuhta, dirinta guna nggit ipakeNa jadi perkakasNa.
2. Pendilo Yesus enda labo erpalasken ukuren doni enda, tapi erpalasken misi keleng ate Dibata nandangi kerina manusia. Sebab adi siidah status sosial Simon, Andreas, Jakup ras Johanes, e me kalak si biasa-biasa saja, penjala nurung ngenca, labo kalak si meganjang kedudukenna i bas strata masyarakat Yahudi.
3. Tujun pemilihen e me ndalanken misi Yesus e me ngajari ajar-ajarNa ras ndilo kalak si deban jadi ajar-ajarNa. Utama mengikut Yesus! Yesus ndilo ajar-ajarNa si pemena lebe arus nggit erlajar bas IA nari. Mau diperlengkapi gelah banci jadi pengajar man kalak si deban. Enggo pasti la kita mampu kita jadi pengajar si mehuli, adi erlajar pe kita kisat.
4. Tek ajar-ajar e nandangi pendilo Yesus amin pe lenga itandaina ise Yesus enda. Emaka kenca enggo ibegina pendilo Yesus, minter itadingken ajar-ajarNa kerina pendahin ras keluargana. Kai si ilakoken ajar-ajar enda banci sinen sebage simbolisasi pertobaten, e me nadingken masa lalu bengket ku bas kegeluhen si mbaru. Tapi banci ka inen sebage simbolisasi komitmen si tuhu-tuhu nandangi pendilo Dibata guna jadi alatNa. Komitmen si tuhu-tuhu i jenda berkaiten ras keputusen ajar-ajar njadiken pendilo Yesus sebage prioritas si utama i bas kegeluhen. Si menarik i jenda, la lit ituriken kerna keragu-raguan ajar-ajar e nandangi kegeluhenna (nafkah ras keluargana). Sebage manusia biasa tentuna merupaken hal si wajar adi lit keraguan entah pe kekuatiran nandangi kegeluhen i bas doni enda. Tapi i bas Markus 10:29-30 je ajar-ajar iyakinken Yesus kerna pemenuhen kebutuhen geluh i bas Dibata nari. I bas ngaloken pendilo Dibata, si niperluken e me kiniteken, entah pe beriman bahwa Dibata pasti ncukupi kerina si nibutuhken ajar-ajar e guna kegeluhenna.
5. Asum Tuhan ndilo kita, pasti Tuhan mperlengkapi kita, emaka ula kita mbiar ras aru ateta. Usur kel sibegi ras sibelasken, “Kalau Tuhan yang mengutus pasti Tuhan yang mengurus.” Kalimat enda labo terjeng sikap melaskenca, tapi perlu iimani bas geluhta. Erkiteken ngikutken pendilo Tuhan bas geluhta usur kel kita tawar-menawar ras situasi si nihadapi kita. Terkadang ngikutken pendilo Tuhan e adalah jika ada waktu yang tersisa. Emaka ‘di kenca la lit waktu dekahen la pernah sermon ras absen melayani, umpamana. Si penting nggit kita asum kita iperlengkapiNa alu erbahage-bage hal, subuk kursus, belajar pribadi, saat teduh. Termasuk iperlengkapiNa kita alu kesehaten, semangat, sukacita guna melayani rsd.

Hal si penting rikutken bahanta i bas paksa enda si banci sirenungken e me, Dibata si ndilo kita e me Dibata si erkuasa, adi Dibata si enggo berinisiatif ndilo kita jadi alatNa berarti enggo isikapken Dibata kai-kai saja si nibutuhken kita guna ndalanken misiNa bage pe guna kegeluhenta i doni enda. E maka si niperluken i jenda e me kinitekenta, yakin kita maka Dibata nemani ras mperlengkapi kita i bas kita ndalanken misiNa. Memang enda labo hal si murah guna ndalankenca. Lit jatuh bangunna. Ajar-ajar Yesus pe lit paksana ragu-ragu, bahkan nadingken Yesus sanga Yesus lit i bas kiniseran, tapi i bas kitab Injil ras Perb. Rasul, teridah bahwa pada akhirna ajar-ajar e ipake Dibata jadi alatNa guna pembarken Berita Si Meriah. Si paling penting i jenda, e me nggit kita erproses ngikutken peraten Dibata alu cara Dibata memproses kita i bas kegeluhenta. Emaka asum Tuhan ndilo kita arah pemilih Bakal Calon bas sektor, nintalah “Enda aku Tuhan, suruhlah Aku” (Yes. 6:8).