SUPLEMEN PA MAMRE GBKP TGL. 3 - 9 MARET 2024

Pdt. Larena br. Sinuhadji (Nd. ReyRapha Tarigan)

Teks : Perb. Rasul 20:30-35

Tema : ERDIATE RAS ERPEMERE

Tujun : Gelah Mamre :

1) Ngangka erti erdiate erpemere i bas konteks perpulungen si pemena

2) Ngasup ndalanken mottona “Erdiate & Erpemere”

Penaruh

Tema kerna “Erdiate ras Erpemere” akap kami enggo rusur sibahas i bas PA Mamre GBKP. Adi la kami silap baru denga bulan Agustus tahun si lepas tgl. 20 - 26, lit Bahan PA Mamre si membahas kerna tema “Erdiate ras Erpemere.” Ertina secara positif tema enda rusur sibahas gelah ngingetken man kam kerina Mamre kami gelah ergiah-giah i bas erdiate ras erpemere labo terjeng motto ngenca, tapi tuhu-tuhu nggeluh i bas keseharian Mamre ijapa pe kam ringan, i bas si e jadi kesaksin man kalak si enterem kerna kemulian gelar Dibata i bas Yesus Kristus. 

Mpebagesi Teks

Ogenta sendah lit i teruh judul perikop “Kata-kata perpisahan i bas Paulus nari man Pertua-pertua i Epesus.” Kenca enggo pembarken Berita Si Meriah kerna Yesus Kristus sebage Tuhan ras Juruselamat i piga-piga ingan i Propinsi Asia (Epesus, Makedoni, Akaya, Troas, Miletus) iterusken Rasul Paulus perdalanenna ku  Jerusalem. Sope berkat ku Jerusalem Miletus nari, idilo Paulus pertua-pertua Epesus guna nehken kata-kata perpisahan.

Lit piga-piga pesan penting si isehken Rasul Paulus man pertua-pertua Epesus. Tapi i bas kesempaten enda hanya fokus ku bas ay. 30-35. Paulus ngingetken pertua-pertua gelah metenget nandangi pihak-pihak si atena ncedaken perpulungen, termasuk kalak si ngajar alu pengajaren si la tuhu. I bas si e Paulus ngatakenca gelah erjaga-jaga janah nginget kerina si enggo iajarken Paulus. Janah i bas ogenta pe Rasul Paulus mereken teladan man pertua-pertua Epesus i bas hal-hal si sifatna materi i bas pelayanen. I bas dahin-dahin pelayanen si ilakonenna, khususna i bas dahin meritaken Berita Si Meriah, labo idarami Paulus kinibayaken entah pe keuntungen secara materi. Amin pe situhuna i bas kapasitas ras jabatenna sebage rasul, banci nge idatkenna kinibayaken entah pe keuntungen secara materi. Tapi la ilakokenna. Sebalikna justru Paulus mejingkat erdahin guna keperlun geluhna ras teman-temanna bage pe guna nampati kalak musil.

Rikutken Perb. Rasul 18:3 itulisken maka dahin sampingan Paulus e me erbahan tenda. Ikataken dahin sampingan (part time) erkiteken dahin utamana e me meritaken Berita Si Meriah. Ertina banci ikataken enggo lanai lit waktu si terbuang percuma i bas kegeluhen Paulus sebab i tengah-tengah kesibuken dahinna sebage per-Berita Si Meriah, adi lit sitik waktu luang, i je maka ipakekenna waktu si lit e guna erbahan tenda, mungkin guna idayaken entah pe guna media pelayanenna. I jenda nari tentu turah penungkunen, apakah Paulus la ngaloken hakna sebage sekalak rasul? Rikutken 2 Kor. 11:8-9 Paulus ngaloken tunjangan arah perpulungen-perpulungen nari guna keperlun geluhna bage pe guna keperlun pelayanenna. Tapi i bas si e, labo lit paksaan i bas perpulungen-perpulungen mereken dukungen materi, kerinana ibereken perpulungen alu sukarela ras meriah ukur.

Jadi kai maksudna i jenda mejingkat Paulus erdahin? Si pemena maksudna jelas maka Paulus labo jelma perkisat, labo Paulus milih-milih dahin, janah labo Paulus tipe kalak si suka menunda-nunda pekerjaan. Kai pe dahin si lit i lebe-lebena mis idahikenna alu tutus ras mejingkat. I bas waktuna er-Berita Si Meriah, mis idahikenna alu tutus ras mejingkat. I bas waktuna melayani perpulungen, mis idahikenna alu tutus ras mejingkat. I bas waktuna erbahan tenda, mis ibahanna alu tutus ras mejingkat. Labo nggit Paulus jadi beban perpulungen i bas ia ndahiken dahin pelayanenna bage pe guna ncukupken keperlun geluhna. Apai ka memanfaatken jabatenna guna mpepulung kinibayaken.

Si peduaken, rikutken Fil. 4:11-13 & 1 Tim. 6:8 jelas maka beluh Paulus mengelola kiniliten materi alu mehuli seh makana finansial si lit i bas ia banci ipergunaken secara efektif ras efisien guna pelayanen bage pe guna keperlun geluhna. Selain beluh ia mengatur si lit i bas ia, Paulus pe beluh mengatur waktu alu mehuli seh makana la lit waktu si terbuang percuma.

Si peteluken, tek Paulus maka Dibata pasti ncukupken kerina keperlun geluhna (bdk. Fil. 4:19). Akap kami enda si jadi palas kiniteken maka pang Paulus ngatakenca i bas ay. 35 nina, “Malemen kap ate mere asangken ngalo.”

Versi Audio silahkan klik : https://youtu.be/cAPrGybUopw

Pengkenaina

Tema PA sendah merupaken motto Mamre GBKP. Akap kami enggo nge kerina kita metehsa erti ras maksud motto enda. Adi rikutken konteks perpulungen si pemena i bas jaman Rasul Paulus jelas maka erdiate ras erpemere merupaken ciri khas perpulungen kalak si tek si la lit ijumpai i bas komunitas-komunitas si deban. Ciri khas enda salah sadana si erbahanca jumlah kalak si tek man Yesus Kristus terus meningkat, banci sioge i bas Perb. Rasul 2:44-47. Janah i bas ogenta sendah pe tetap isingetken Paulus maka pertua-pertua harus jadi usihen i bas erdiate ras erpemere alu mejingkat erdahin guna nampati kalak musil, sue ras ajaren Kristus, malemen kap ate mere asangken ngalo (ay. 35). Kenca enggo pertua-pertua jadi usihen enggo pasti perpulungen pe ikut muat bagin i bas erdiate ras erpemere.

Rikutken ogenta sendah, Paulus mereken teladan man banta, khususna man kam kerina kekelengen kami Mamre, kerna pengelolaan kiniliten ras pengelolaan waktu si mehuli seh makana banci sipakeken guna erdiate ras erpemere.

Si pemena lebe akap kami, harus lit lebe pemahamen erpalasken kiniteken i bas dirinta maka kerina si lit i bas kita e me anugerah Dibata man banta, labo erkiteken gegeh beluhta. I bas si e ipengasup Dibata kita ngataken bujur i bas kerina si lit i bas kita. Janah teklah kita bagi Paulus, Dibata pasti ncukupken kerina kebutuhen geluhta.

Si peduaken, mejingkat bagi Paulus i bas ndahiken kai pe dahin si ipercayaken Dibata man bana. Mejingkat ertina labo perkisat, la milih-milih dahin, janah la menunda-nunda pekerjaan. Kai pe dahin si lit i lebe-lebeta mis dahiken alu tutus ras mejingkat. I bas waktuna erdahin bas kantor, erdahinlah alu tutus ras mejingkat. I bas waktuna melayani i Gereja, layanilah alu tutus ras mejingkat. I bas waktuna mperdiateken anak-anak ras isi jabu, perdiatekenlah alu tutus ras mejingkat. Ula sempat kam kerina Mamre jadi beban kalak si deban i bas ndahiken dahin-dahin guna ncukupken keperlun geluh, aktualisasi diri, bage pe dahin pelayanen. Erdiate ras erpemere labo banci ilakoken alu maksimal adi la lit kinijingkaten ras ketutusen i bas dirinta.

Si peteluken, beluh mengelola kiniliten materi alu mehuli seh makana finansial si lit i bas Mamre banci sipergunaken secara efektif ras efisien guna pelayanen bage pe guna keperlun geluhna. Selain beluh ia mengatur si lit i bas Mamre, kam pe beluh mengatur waktu alu mehuli seh makana la lit waktu si terbuang percuma.

Si peempatken, metenget nandangi pengaruh doni enda si banci encedaken kiniteken man Dibata. Kai saja pengaruh doni jaman gundari enda si banci encedaken Mamre? Game online, judi online, sex online, investasi instan tapi bodong, pinjaman online, rsd. Adi Mamre enggo terjebak hedonisme, konsumerisme, materialistis, ingin serba instan, rsd.-na., enggo pasti lanai banci erdiate ras erpemere. Emaka pindolah gegeh i bas Dibata nari gelah ipengasupNa kam kerina pulah i bas pengaruh doni enda.