SUPLEMEN PA MORIA GBKP TGL. 18 - 24 PEBRUARI 2024

Palas Teologi Perjanjian Baru

Ogen : Lukas  1:29-38 

Tema : NGENDESKEN DIRI JADI PERKAKAS DIBATA

Tujun : Gelah Moria :

- Nuriken kuga pendilo Dibata man Maria

- Nuratken perbahanen si jadi pasu-pasu i bas erbage-bage dampar

Penaruh

Arah PA-ta minggu si lewat enggo sipelajari ras sisiksiki palas Kata Dibata bas Padan Si Ndekah kerna sasaren pelayanenta 2024 e me “Berkarya dan berguna bagi orang lain.” Sebage umputenna PA minggu enda, sipelajari ras sisiksiki ka Palas Kata Dibata bas Padan Si Mbaru nari. Alu tema “Ngendesken diri jadi perkakas dibata.” Ngendesken diri (menyerahkan diri), berarti la nari kita si erkuasa i bas dirinta tapi man sosok pribadi ku ja kita ngendesken dirinta. 

Gambaren si murah ialoken kalak Jahudi asum ia jadi budak. La nari ia si erkuasa nandangi dirina tapi tuan/nyonya si enggo nukur ia. Emaka i bas PA-ta sekali enda erlajar kita arah sekalak diberu si sangat menginspirasi geluhta e me Maria. 

Mpebagesi Pengangkan Kerna Ogen

Judul i bas perikopta e me “Berita ketubuhen Jesus.” Ras bahan enda semal  sirenungken entah sikhotbahken i bas masa-masa Natal. I ja Tuhan nuruh sekalak Malekat Tuhan si tergelar Gabriel ku kuta Nasarert (ingan Jesus ipebelin, bdk. Yoh. 1:46, perkataan Natanael si merendahken Nasaret, “Banci kin si mehuli reh i Nasaret nari?). Gabriel isuruh ndahi sekalak si nguda-nguda tergelar si Maria ras ia enggo ertunangen ras sekalak anak perana si tergelar Jusuf kesusuren Raja Daud. 

Perkataan awal Malekat jelas, maka Tuhan ras Maria janah enggo iberekenNa pasu-pasuNa si mbelin man Maria. Perkataan Malekat e tuhu-tuhu erbahanca campur aduk i bas diri Maria, antara senang, bingung, rsd., seh makana nungkun ia bas ukurna. Sada dampar, enggo pasti senang, sabab Tuhan ras Maria ras iberekenNa pasu-pasuNa si mbelin. Ise pe kita pasti meriah ukur asum ibereken Tuhan pasu-pasuNa si mbelin banta. Bingung, tersungkun bas ukurna kai situhuna erti kata e? Janah ituriken Malekat, maka mehuli me kulana dingen ipupusna sekalak anak dilaki gelar anak pe enggo ikataken e me Jesus. Anak e, e me Anak Dibata si meganjangna kal. Tuhan Dibata pagi njadiken IA jadi Raja bagi ninina Daud, janah IA me pagi Raja man kesusuren Jakub seh rasa lalap; KinirajanNa la erkeri-kerin.

Megi si e enggo pasti Maria nungkun, “Uga  banci jadi e man bangku, sabab aku si nguda-nguda denga?” Erbage resiko i lebe-lebena terpampang jelas. Enggo pasti isirangken Jusuf tunangenna. Keluarga ras tunangenna enggo jadi imbangna. Janah enggo pasti mate nari ia. Sebab jelas ukumenna, adi lit si nguda-nguda mehuli kulana ope erjabu, maka ia ibenteri alu batu. Malekat Tuhan mpetetap ukur Maria. Mehuli kula Maria labo erkiteken perbahanen sekalak dilaki. Mehuli kula Maria erkiteken Kesah Si Badia janah kuasa Dibata ringan i bas ia. Guna tole meyakinken Maria, ituriken Malekat man bana maka kade-kadena Elisabet enggo 6 bulan mehuli kulana, aminna gia ia enggo metua, ras ikataken kalak la banci mupus (mandul). 

Sebab la lit si metahat man Dibata. Perkataan Malekat Tuhan tuhu-tuhu mpetetap ukur Maria, la nari ia ragu ras mbiar ngaloken pasu-pasu Tuhan si mbelin guna jadi perkakasNa. Minter iayukenna, “Kuendesken diringku man Tuhan, janah jadilah i bas aku bagi si ikatakenndu e” (bhs. Ind., “Kata Maria: “Sesungguhnya aku ini adalah hamba Tuhan; jadilah padaku menurut perkataanmu itu”). Isedari Maria maka ia tuhu-tuhu hamba Tuhan, i ja Tuhan si erkuasa i bas geluhna. Kai pe resiko rikut tantangen si bakal ialamina maka enggo ia siap menanggungsa. Maria enggo mereken geluhna secara total man Tuhan guna ipake Tuhan rikutken si ngena ateNa. Uga akap Tuhan si mehulina e me alu taat (patuh) idalankenna i bas kegeluhenna.

Pengkenaina

Tema “Ngendesken diri jadi perkakas Dibata.” Kita idilo ras iarapken Dibata ngendesken dirita man baNa, erkiteken kita bekas tinepaNa ras enggo kita iselamatkenNa. Kita itepa Dibata guna tujunNa, guna jadi alatNa i bas KinirajanNa. Maksud ras tujun Dibata nepa kita ras mereken kegeluhen man banta e me gelah kita mpermuliaken IA. Gelah kita jadi pasu-pasu man kalak si deban ras doni enda, sue ras visi GBKP “Kita jadi aron Dibata si jadi pasu-pasu man doni enda.” Alu kata si deban, geluhta erguna ras ernanam si mehuli man sekelewetta. Emaka ola kita lupa e. Kuja pe kita ras kai pe ateta sidahiken ras silakoken, bahanlah maka kita erguna man kalak si deban. Guna si e endeskenlah dirita man Dibata saja. Endesken dirita jadi perkakasNa. Ola kal siendesken dirita jadi alat si salah, si jahat, si la payo dingen la mehuli. 

Semangat sipakeken dirinta jadi perkakas Dibata si erguna. Bandingken ras bimbingan PA Moria, reh rusurna perkakas e sipake tentu reh telapna, reh terpakaina dingen reh buena gunana. Kebalikenna, adi la rusur ipake perkakas e, tentu reh tumpulna dingen reh cedanna (bagi perkakas dapur). Bage pe kita Moria, semakin siendesken geluhta man Tuhan jadi perkakasNa rikutken talenta ras gegehta, reh luar biasana kuasa Tuhan erdahin bas kita. Geluhta la sia-sia. Emaka si penting asum enggo siendesken geluhta man Tuhan, arus lit keriahen ukur, kesadaren bas dirinta sendiri, labo ipaksa ras berkomitmen, bertanggung jawab. Mari dage siikutken contoh ras usihen si enggo ibahan Maria i bas geluhna. Si endesken dirita man Tuhan Jesus. Sibere dirita ipakeNa jadi perkakasNa i bas kegeluhenta.

Arah kerina pengkebet geluhta banci kita jadi perkakasNa. Arah pengerananta si maba pasu-pasu, perukurenta si positif si mereken motivasi (semangat) man kalak, perbahanenta si menginspirasi ras mpenahangi beban si mberat man teman-temanta. Termasuk pe bas peken anggurNa. Moria si mere dirina ras nggit jadi serayanNa, si makeken talenta si lit bas ia guna jadi song leader, tim PI, PRT, VG, paduan suara, kebersihen gereja, ngerawat bunga-bunga gereja e me si ngendesken dirina jadi alat Dibata. Moria si nehken pemere ras perkuah ate gelah banci anak-anak bas gereja bagepe i darat gereja si musil, kurang mampu tersampat. Emaka nintalah man Tuhan bas ukurta, “Pakelah aku jadi perkakasNdu sanga lit denga kesempatenku Tuhan (“Hidup ini adalah kesempatan”).