SUPLEMEN PA MAMRE GBKP TGL. 18 - 24 PEBRUARI 2024

Pdt. Larena br. Sinuhadji (Nd. ReyRapha Tarigan)

Teks : 2 Petrus 1:3-10

Tema : PENDILO DINGEN PEMILIHEN DIBATA

Tujun : Gelah Mamre:

- Nggeluh i bas pendilo ras pemilihen Dibata

- Ikut i bas Pemilihen Pertua ras Diaken i bas Sektor

Penaruh

“Banyak yang terpanggil tapi sedikit yang terpilih, dan ada yang terpilih tapi sedikit yang setia,” enda merupaken sada ungkapen si mekatep sibegi i bas dahin-dahin pelayanen si indesken banta. Arah enda me menjadi sada penjemba i bas kita banci setia nehken pelayanen si enggo iampeken Tuhan banta.

Tahun enda silakoken Pemilihen Serayan Tuhan (Pertua - Diaken) guna periode 2024 - 2029. Emaka mulai tahun si nderbih enggo silakoken sosialisasi rikut pembinaan man kerina perpulungen gelah reh tangkasna man banta kerna agenda i bas pemilihen Pt./Dk. si nilakoken kita 5 tahun sekali. Paling tidak perpulungen lebih tangkas man bana kerna pendilo Dibata man banta kerina, siap dipilih dan memilih terlebih pe i bas kita si terpilih guna jadi serayanNa, tuhu-tuhu ertanggung jawab ndahiken dahin pelayanen si enggo iampeken Tuhan banta. Emaka i bas bahan PA Mamre-nta sekali enda sicakapken kerna Pemilihen Pt./Dk. alu tema “Pendilo dingen Pemilihen Dibata.”

Uraian Teks

Surat Petrus si peduaken ialamatken man kalak Kristen si nterem si mula-mula nari. Tujun surat enda itulisken e me ngelawan pendahin guru-guru perguak ras lagu langkah si la mehuli akibat pengajaren si papak e. Iarapken gelah kerina kalak Kristen arus ncikep pemeteh si tuhu-tuhu kerna Dibata ras Tuhan Yesus Kristus, e me pemeteh si enggo isehken sekalak si enggo ngidah Yesus alu langsung janah enggo ngidah IA ngajar. Bahkan pengajaren si papak kel si iajarken guru-guru palsu maka Yesus lanai bo reh mulihi. Tuhan pasti reh, janah bahanlah kesabaren Tuhan e (melet/ndekah IA reh), jadi kesempaten man perpulungen gelah terkelin. Kesempaten man perpulungen guna nadingken dosa-dosana.

Secara khusus perikopta ibere judul “Pendilo dingen pilihen Dibata” (terj. Baru Ed. 2, “Panggilan dan pilihan Allah”). Piga-piga hal si nisingetken Petrus:

• Dibata enggo ndilo kita gelah kita dat bagin i bas kemulian ras kiniulinNa (ay. 3).
• Arah kuasaNa ras penandaita kerna Dibata  enggo iberekenNa man banta gelah kita banci nggeluh nembah man baNa (ay. 3).
• Arah penebusen Kristus (padan si mbelin ras meherga), maka ngasup kita mulahi dirinta arah kerincuhen daging nari, si banci ncedaken janah dat bagin kita i bas kai si enggo isikapken Dibata (ay. 4, “luput dari kebinasaan yang ada dalam dunia akibat hawa nafsu”).

Gelah tetap ngasup kita nggeluh bagi si ngena ate Dibata (sipulahi banta i bas kerincuhen daging), maka lit piga-piga hal si arus tetap siusahaken (nggeluh bas kita):

• Irakut kiniteken ras kai si mehuli (sungguh-sungguh berusaha untuk menambahkan kepada imanmu dengan kebajikan).
• Rakutken perbahanen si mehuli ras pemeteh kerna Dibata.
• Je nari irakut ka ras penguasaan diri.
• Je nari irakut ka ku bas ate megenggeng.
• Je nari arus irakut ka ku bas ate tutus er-Dibata.
• Je nari arus irakut ka ku ate keleng man teman-teman sapih kalak Kristen.
• Janah arus irakut ka ku ate keleng man manusia.

Enda me kerina biak-biak si niperluken kita i bas nggeluh i doni enda, janah adi biak-biak tetap nggeluh bas kita (enggo jadi karakter), si e erbahanca maka pemetehta kerna Yesus Kristus nggeluh ras erbuah. Ertina, selalu la pernah puas i bas kita tetap bertumbuh ras berbuah i bas si mehuli. Kebalikenna, adi la lit bas kita biak-biak si bage maka pentang kap mata perukurenta, la kita ngasup ngidahsa ras lupa maka dosa-dosanta enggo enggo ibersihken Tuhan.

Aplikasi 

Arah bahanta sekali enda jelas Petrus mpersingeti kita maka Tuhan enggo mbersihken kita i bas dosa-dosa nari maka arus tetap kita ngataken bujur man Tuhan alu kita nimbak sura-sura daging. Bahkan secara khusus tanda kita ngataken bujur man Tuhan arah kita makeken geluhta jadi perkakas (alat) i tan Tuhan. Guna banci sidalanken dahin si e, la banci lang arus tetap kita nggeluh i bas kiniersadan ras Tuhan alu tetap nggit ibentukta; nggeluh erkiniteken, ngelakoken perbahanen si mehuli, lit penguasaan diri, megenggeng, ate tutus er-Dibata, keleng ate man manusia.

Terlebih rikutken temata “Ipilih ras idilo Tuhan” (Pendilo ras pemilihen Dibata). Mamre siap dipilih dan memilih. Adi enggo ipilih Tuhan arah perpulungenNa, erlajar setia, tutus, bertanggung jawab. Tuhan si enggo ndilo kita, pasti tetap kita iperlengkapiNa.