SUPLEMEN PA MORIA GBKP TGL. 4 - 10 PEBRUARI 2024

Pdt. Larena br. Sinuhadji (Nd. ReyRapha Tarigan)

Berkarya Dan Berguna

Si man ogen : Lukas 4:38-41

Tema : IPASU-PASU GUNA JADI PASU-PASU

Tujun : Gelah Moria : 

- Niksiki kai si ilakoken Mami Simon kenca ipepalem Yesus

- Mereken dirina jadi pasu-pasu man jelma si enterem

Kata Penaruh 

Kerina kita ersura-sura geluhta tetap ipasu-pasu Tuhan. Emaka mekatep pasu-pasu ras ipasu-pasu (berkat dan diberkati) jadi fokus kegeluhen manusia, termasuk kita kalak Kristen. Hal enda banci siidah i bas materi doa-doanta: gelah ipasu-pasu Tuhan jabunta, ibereken Tuhan kesehaten, ibereken Tuhan rejeki. Tapi jarang kita mindo gelah jabunta ipake Tuhan jadi pasu-pasu man kalak si deban. Bahkan lit deba kalak Kristen si lebih menekanken bas pasu-pasu (berkat), si kedungenna berkat entah pe pasu-pasu e ipake sebage tolok ukur kedewasaan. La lit salah asum kita mindo pasu-pasu ras ipasu-pasu. Tapi salah adi hanya kita fokus ku bas sura-sura ipasu-pasu tapi la pernah kita nggit ipake Tuhan jadi saluren pasu-pasu.

Sura-sura Tuhan i bas kegeluhenta e me gelah geluhta jadi pasu-pasu sebab geluhta enggo ipasu-pasu Tuhan. Tujunna enggo jelas labo gelah kita ipujiken tapi gelah Tuhan imuliaken.

Penjelasen Teks Perikop

Piga-piga hal si banci siidah rikutken perikopta. Si pemena, Tuhan Yesus menjadi berkat. Tuhan Yesus i bas kegeluhenNa tetap menjadi berkat. Rikutken teksta kenca ndarat i bas Rumah Pertoton nari i Kapernaum (Luk. 4:31), berkat Yesus ku rumah Simon Petrus. Mami Simon sakit mekelek (demam keras). Perban ipindoken kade-kadena gelah ipepalem Yesus, emaka minter idahi Yesus Mami Simon. Tedis IA deherken ingan medemna, je nari ipelawesNa penakit e, janah sehat minter Mami Simon. Kenca matawari enggo sundut, kerina kalak maba kade-kadena si erbage-bage penakitna man Yesus. Ipepalem Yesus kerina alu namaken tanNa ku babo kalak si penakiten e sekalak-sekalak. Janah ipelawes Yesus ka Setan i bas kerina kalak si setanen. Banci siidah luar biasa pelayanen Yesus si la erngadi-ngadi. KehadirenNa tetap jadi pasu-pasu (berkat). Kenca enggo IA mengajar i Rumah Pertoton i Nasaret (ay. 16, i je ipelawes kalak Yesus), dung si e Yesus mengajar ras mpelawes kalak si setanen i Kapernaum (ay. 31), je nari iterusken Yesus mpepalem Mami Simon Petrus ras mpelawes enterem kalak si kesetanen.

Si peduaken, Mami Simon Petrus. Kenca enggo sehat Mami Simon, minter ia keke ras kuskas nikapken pangan dingen ngelai Yesus ras kalak si lit bas rumah e. Mami Simon tuhu-tuhu nggejapken perkuah ate Tuhan arah kesembuhen si idatkenna, sehat ia minter kuskas ia. E me pengataken bujurna man Yesus.

Si peteluken, Keluarga Simon Petrus. Simon Petrus ras keluargana ngendesken jabuna guna jadi pasu-pasu. Radu ras sieteh kita Simon Petrus ras Andreas e me duana kalak enda ersembuyak si jadi ajar-ajar Yesus (Mat. 4:18, “Asum Yesus erdalan-dalan i tepi Dano Galilea, idahNa dua kalak si sembuyak sangana njala nurung. Si dua kalak e, e me Simon [igelari Petrus] ras Andreas). Clement Alexandria nari, i bas bukuna Stormateis 7:6, nuriken kerna ndehara Simon Petrus si ikut nampati i bas pendahin Pekabaren Injil. Si kedungena mate martir ras Petrus. Asum Yesus meritaken Kata Dibata i Kapernaum, rumah Petrus-lah si jadi Pos-na, i ja paksa si e enterem kalak si ipepalem Yesus ras Mami Simom Petrus  ngelai enterem kalak. Ipakena rumah Petrus guna ngelai enterem kalak (ay. 38-39), ncidahken totalitas keluarga enda i bas melayani.

Versi Audio silahkan klik : https://youtu.be/-Fw8EJJecMA

Pengkenaina

Tema i bas PA Morianta sekali enda, “Ipasu-pasu guna jadi pasu-pasu.” Rikutken teksta labo hanya Mami Simon Petrus si enggo nggejapken pasu-pasu Tuhan geluhna jadi pasu-pasu tapi pe Yesus Kristus, ras Keluarga Simon Petrus. Janah rikutken tujun si peduaken, ilumbaken man Moria gelah banci mereken dirina jadi pasu-pasu man jelma si enterem.

Kita banci ipake Tuhan jadi pasu-pasu man jelma si enterem, asum tuhu-tuhu lebe sigejapken maka leben geluhta ipasu-pasu Tuhan. I bas kegeluhenta enggo leben kita ngaloken pasu-pasu Tuhan si la terbeligai: kesehaten, talenta, gegeh, perukuren si mehuli, rejeki, terlebih keselamaten pertendinta i bas kita enggo tek man Yesus Kristus. Maka kehadirenta jadi pasu-pasu labo jadi “palu-palu.” Sebab mekatep ngadi pasu-pasu Tuhan e i bas geluhta, la nari sibagiken, sipepaler. Sebage contoh, la kita nggit melayani padahal lit talenta rende, bermain musik, merangkai bunga, ngerana mereken motivasi i bas nuriken penggejapen, rsd. Mbue rusur siban alasen, kesibuken, anak-anak, rsd. Payo, lit rusur kesibukenta ras anak-anak si harus tetap siperdiateken, tapi ula e rusur jadi alasen piah dungna la pernah kita melayani.

Geluh enda harus seimbang, subuk keluarga, berusaha (erdahin), pelayanen, rsd. Jadi pasu-pasu i bas materi si enggo ibereken Tuhan banta. Terkadang lit perpulungen e, secara materi sangat diberkati, tapi guna mendukung dahin-dahin pelayanen la pernah ikut muat bagin. Sangat perhitungan ras rugi kel akapna i bas muat bagin pekena-kena Gereja Tuhan ras nampati kalak si deban.

Nina lagu Rohani si rusur siendeken, “Hidup ini adalah kesempaten, hidup ini untuk melayani Tuhan. Jangan sia-siakan waktu yang Tuhan beri. Hidup ini harus jadi berkat.” Geluh arus jadi berkat, ernanam man sekelewetta. La nari pas kuan-kuan bas kalak Karo nina, “Adi la banci nampati, nampeti lah gia ula.” Kuan-kuan enda mabai kita menjadi kalak si pasif. Payo memang ula kita nampeti (memperkeruh keadaan, erbahan susah). Tapi hidup kita harus aktif dan proaktif untuk terus melakukan kebaikan demi kebaikan, mpepaler pasu-pasu si enggo sialoken kita bas Dibata nari. Pergunakenlah kesempaten alu mehuli, sabab lit kari waktuna la nari kita banci erkai pe.