SUPLEMEN PA MAMRE GBKP TGL. 11 - 17 PEBRUARI 2024

Pdt. Larena br. Sinuhadji (Nd. ReyRapha Tarigan)

Teks : Pengerana 10:17-20

Tema : MILIH PEMIMPIN SI MEDOLAT

Tujun : Gelah Mamre :

1. Ngasup ngidah erti pentingna sekalak pemimpin si medolat nandangi rakyatna

2. Ngasup menyukesken Pemilu guna milih pemimpin si medolat

Penaruh

Rikutken Kamus Karo - Indonesia (Darwin Prinst), “medolat” ertina, “menimbulkan rasa hormat atau rasa kagum karena pribadinya.” Pemimpin si medolat ertina, “pemimpin yang sanggup menimbulkan rasa hormat atau rasa kagum karena pribadinya.” PA Mamre sendah i bas rangka menyambut PEMILU RI tahun 2024 si ilaksanaken serentak i bas tgl. 14 Feb. 2024. Arapenta tentuna kerina Mamre GBKP enggo tuhu-tuhu ersikap guna menggunaken hak pilihna erpalasken kiniteken man Dibata i bas Yesus Kristus.

Mpebagesi Kata Dibata

Kitab Pengerana (Pengkhotbah) itulisken kalak si enggo metua. Enggo lanjut usia ertina enggo berpengalaman i bas mentasina erbage-bage pengalamen geluh, subuk si bagi ukur bage pe si la bagi ukur. I bas si e tuhu-tuhu irenungkenna kai ertina geluh enda, janah tetap ia rembak ras Dibata, seh makana idatkenna kepentaren i bas Dibata nari. Emaka Pengerana ngelumbaken man banta maka nggeluh enda harus pentar. Enggo iidah ras igejapkenna uga kin ulihna adi makeken kepentaren Dibata ras uga ulihna adi siandalken gegehta si terbatas ras ernalem kita bas sura-sura doni enda, enggo pasti la maba kemalemen ate.

Rikutken Alkitab bahasa Karo, ogenta sendah lit i teruh judul “Perukuren kerna kepentaren dingen kebodohen.” Judul i bas Alkitab TB-LAI, “Kebodohan dan hikmat serta pelbagai akibatnya.” Rikutken judul perikop teridah maka Pengerana nehken pedah-pedahna i bas hal-hal si sifatna umum, si intina kel, geluhlah alu pentar erpalasken Kata Dibata. Si jadi ogenta sendah e me ay. 17-20.

Ay. 17 akap kami erkaiten ras ay. 16, sebab lit je perbandingen antara negeri si cilaka ras negeri si sangap. Negeri si cilaka ipimpin raja si nguda denga usiana. Anak perana i jenda maksudna sekalak pemimpin si lenga tasak entah pe lenga dewasa i bas kai pe. Sekalak si nguda denga entah pe si lenga dewasa identik ras nggeluh bebas semau gue. Emaka ibabaina pemimpin-pemimpin si deban erbahan si la mehuli alu erpesta seh erpagi-pagi, entah pe nggeluh hedonis. Kebalikenna, sangap kel adi negeri ipimpin sekalak si raja si medolat. Medolat i bas Alkitab BIMK nina “berwibawa,” i bas terj. TB-LAI Edisi II nina, “berbudi luhur.” Medolat i bas bahasa Karo, bagi si enggo isingetken i datas, ertina “menimbulkan rasa hormat atau rasa kagum karena pribadinya.” Pribadi i jenda tentuna si berwibawa, berbudi luhur, terkuasaina dirina, enggo dewasa i bas kai pe, janah jadi usihen man sekelewetna.

Kualitas pemimpin si medolat enda iumputi alu erbage-bage hal si mehuli. I bas ay. 17 nina, “man i bas paksana” ertina akap kami tuhu-tuhu ngergaken waktu entah pe kesempaten si lit. “Ngasup ngamper bana dingen la perminem-minem,” ertina terkuasaina dirina, ngasup nimbak peraten daging, i bas rangka mereken usihen man rakyatna.

Kualitas medolat si debanna, e me i bas ay. 18, mejingkat ras antisipatif. Antisipatif ertina enggo iukurken kai-kai saja si harus ilakoken guna menanggulangi bencana si bakal terjadi. Ay. 19 akap kami enda maksudna sekalak si pentar i bas ngaturken perduiten, efektif ras efisien. Ay. 20 enda akap kami maksudna itujuken man banta nandangi para pemimpin si lit i sekelewetta. Peran kai si banci silakoken i bas rangka mendukung pemimpin-pemimpin gelah ngasup ia ndalanken tugas tanggung jawabna alu mehuli. Ertina, melala hal-hal si mehuli si banci silakoken asangken numpahi entah pe jungut-jungut nandangi pemimpin-pemimpin si lit i sekelewetta.

Versi Audio silahkan klik : https://youtu.be/FCck3Whj9P8

Pengkenaina

Tema ras tujun PA-ta sendah, ngajuk kam kerina Mamre gelah tuhu-tuhu ersikap i bas PEMILU RI si ilaksanaken serentak i bas tgl. 14 Peb. 2024 i bas inganta masing-masing. Pengelayasi kerna PEMILU enda akap kami enggo rusur sibahas setiap 5 tahun sekali entah pe setiap lit Pilkada, baik i bas PJJ bage pe PA-PA Kategorial. Ertina enggo rusur sibahas kerna milih pemimpin si bujur, erkemalangen man Dibata, mehuli ras mejile rekam jejakna, la pernah terlibat tindaken kriminal, pelanggaran HAM, bage pe narkoba. Sekalak si nasionalis, anti radikalisme, anti korupsi, anti kolusi, anti nepotisme, tuhu-tuhu mediate nandangi rakyatna si teridah arah program-programna, rsd.

I bas PA-ta sendah mulihi kita kerina, khususna kam Mamre kami, isingetken gelah milih pemimpin si medolat entah pe “pemimpin yang sanggup menimbulkan rasa hormat atau rasa kagum karena pribadinya.” Janah iajuk kam kerina gelah ikut muat bagin i bas menyuksesken PEMILU 2024. I bas si e tentu kam kerina harus mediate, la golput, proaktif i bas mengawasi pelaksanaa pemilu i bas ingan masing-masing gelah banci erdalan alu luber-jurdil. Rusur sibegi himbauan arah Romo Magnis Suseno nina, “Pemilu bukan hanya untuk memilih pemimpin yang terbaik, tetapi untuk mencegah yang terburuk berkuasa.” Kai si ikataken Romo Magnis enda palasna e me prinsip moral “minus malum,” minus ertina kecil, malum ertina keburukan. Jadi “minus malum” e me prinsip moral yang mengajak kita untuk memilih pilihan dengan resiko keburukan terkecil, memilih yang terbaik di antara yang terburuk. I bas si e marilah kita jadi pemilih-pemilih yang bertanggung jawab, berpikir jauh ke depan bukan hanya berpikir untuk saat ini saja.

Terakhir, marilah kita megegeh ertoto gelah bangsa ras negaranta tetap aman terkendali. La lit perpecahen, disintegrasi, kerusuhan, apai ka terjadi perang saudara erkiteken proses PEMILU si la adil, terjadi i jah i je kecurangan, terjadi intimidasi, otoriterianisme entah pe kepatuhan buta terhadap penguasa si anti demokrasi, rsd.-na. Dibata si mpengasup kita kerina ngawan perpulungen GBKP jadi pemilih-pemilih si cerdas, independen, bermartabat entah pe anti politik uang, ras bertanggung jawab i bas pilihenta.