SUPLEMEN PJJ GBKP TGL. 4 - 10 PEBRUARI 2024

Pdt. Larena br. Sinuhadji (Nd. ReyRapha Tarigan)

LIT MIN ERGANDU (Yesaya 1:21-23)

[PEMILU]

Penaruh

I bas tep-tep PEMILU rusur sibegi “Politik Uang.” Kai kin politik uang e? Nina Wikipedia, “Politik uang atau politik perut (money politic) adalah suatu bentuk pemberian atau menyuap seseorang supaya orang itu tidak menjalankan haknya untuk memilih maupun supaya ia menjalankan haknya dengan cara tertentu pada saat pemilihan umum. Politik uang adalah sebuah bentuk pelanggaran kampanye. Praktik politik uang dilakukan dengan cara pemberian berbentuk uang, sembako, antara lain beras, minyak dan gula kepada masyarakat dengan tujuan untuk menarik simpati masyarakat agar mereka memberikan suaranya untuk partai atau calon tertentu.” Lit ka si ngatakenca, “Terima uangnya, tapi jangan pilih orangnya.” Payo kin bage? PJJ sendah i bas rangka ersikap kita guna ikut muat bagin i bas PEMILU 2024.

Mpebagesi Kata Dibata

Nabi Yesaya e me sekalak nabi si tuhu-tuhu berintegritas. Itegritasna e icidahken arah pelayanenna i tengah-tengah bangsa Israel. Sedekah masa pelayanenna tuhu-tuhu iberitakenna Kata Dibata alu la mbiar-mbiar seh ku akhir geluhna. Kitab Yesaya ibuka alu nubuaten-nubuaten si situhuna la ise pe merhat ndengkehkenca sebab nubuat-nubuatna dem alu perbahanen jahat kalak Israel bage pe ukumen-ukumen i bas Dibata nari. Tapi amin bage gia, tetap denga nubuaten-nubuaten e isehken Nabi Yesaya ku tengah-tengah bangsa Israel gelah bangsa e sedar ras bertobat. 

Secara khusus i bas ogenta sendah, politik uang kepeken enggo lit i bas jaman Nabi Yesaya. Nubuaten i bas bindu 1 salah sadana nuriken kerna pemimpin-pemimpin Jerusalem si enggo lanai bujur alu nggit ngaloken sogok janah rangap nandangi pemere kalak (ay. 23). I bas terj. TB-LAI, “Semuanya suka menerima suap dan mengejar sogok.” I bas terjemahen enda akap kami lebih jelas maka amin pe umpamana kalak la nggit mereken sogok, ipaksana gelah mereken sogok.

Rikutken ogenta sendah ay. 21-23, politik uang iumputi alu perbahanen-perbahanen si la bujur e me, jadi pemunuh, jadi pemberontak, jadi pinangko, la pernah ibelana hak-hak kalak melumang bage pe la ibegikenna pengadun diberu balu-balu. Si e kerina banci terjadi erkiteken pemimpin-pemimpin enggo la nari njadiken Dibata orientasi i bas geluhna. Orientasi man erta kebayaken erbahanca pemimpin-pemimpin egois, dirina ngenca si iukurkenna, jabaten si lit i bas ia tuhu-tuhu imanfaatkenna guna kepentingen dirina ras keluargana. Sementara tugas tanggung jawabna selaku pemimpin si harus mperdiateken ras mperjuangken hak-hak rakyat la ilakokenna. Si e kerina erbahanca Jerusalem igelari kota si dem alu dosa.

Kondisi si bagenda rupana tentuna erbahanca Dibata merawa. Iukum Dibata pemimpin-pemimpin si la bujur. Tapi ukumen Dibata sifatna memurnikan. I teruh keleng ate Dibata, i bas paksana pagi geluh kota Jerusalem dipulihkan.

Versi Audio silahkan klik : https://youtu.be/WUa4UGmq2hc

Pengkenaina

Tema i bas PJJ-ta sendah ngajuk kita menjadi pribadi-pribadi si lit i bas kita prinsip-prinsip geluh si la banci itukur alu sen. Emaka nina, “Lit min ergandu!” PJJ-ta sendah ngajuk kita gelah jadi pribadi-pribadi si bermartabat, i bas bhs. Inggris nina “dignity” si ertina lit harga dirinta si la banci itukar alu erta kebayaken doni enda.

Ogenta sendah ncidahkenca maka perilaku mereken entah pe ngaloken suap (sogok) e me perilaku si la ngena ate Dibata. Jadi jelas maka si gelarna politik uang e me perilaku si la ngena ate Dibata. E maka i bas si e pengajuk man banta gelah “Terima saja uangnya, tapi jangan pilih orangnya” e me pengajuk si salah ras erdosa. Ula lebe secara hukum iman keagamaan, secara hukum positif i bas negaranta pe perilaku politik uang e me perilaku si melanggar hukum, ertina si ngalokenca ras si merekenca banci kena sanksi hukum. Emaka adi sidarami i bas internet si berkaiten ras politik uang pasti melala je himbauan guna memberantas politik uang alu slogan: “Mari kita hajar serangan fajar dengan cara terima uangnya sebagai barang bukti dan laporkan!” “Jangan terima uangnya dan jangan pilih orangnya!” Ras melala slogan-slogan sejenis si debanna.

Emaka marilah kita menjadi pribadi-pribadi si bermartabat alu palas kinitekenta man Dibata i bas Yesus Kristus. Pindolah gegeh i bas Dibata nari gelah ipengasupNa kita la tergoda politik uang, pang kita erpenulak amin pe mungkin seh si itawarken nominalna galang, lit si lebih penting asangken sen si sifatna fana, e me kinitekenta man Dibata. Mari radu ras kita ersikap guna ikut muat bagin i bas PEMILU 2024. Ertoto kita alu la erngadi-ngadi kerna PEMILU 2024 gelah ipengasup Dibata pemerintah menjadi penyelenggara PEMILU si netral, langsung, umum, bebas, rahasia, jujur, adil, ras la lit i jah i je kecurangan.