SUPLEMEN PJJ GBKP TGL. 25 PEB. - 2 MAR. 2024

Pdt. Larena br. Sinuhadji (Nd. ReyRapha Tarigan)

MAKE SUKAT-SUKAT SI MEHULI (Lukas 6:37-38)

[Sasaran Pelayanan GBKP Tahun 2024]

Penaruh

Sukat rikutken Kamus Karo - Indonesia (Darwin Prinst) ertina ukur; takar. Ersukat ertina menakar, mengukur dengan kaleng, liter, dsb. Menakar untuk pembayaran utang atau pinjaman padi, beras, dsb. Ersukaten ertina ada ukurannya, mempunyai takaran. Tema, “Make sukat-sukat si mehuli” akap kami ibuat i bas ogenta ay. 38, “Berelah kalak si deban, maka kam pe pagi ibere Dibata; ialokenndu me pagi sada persukaten si dem, sada bagi si sampur si itungtungken ku bas tanndu asa ngasup kam ngalokenca. Sukat-sukat si ipakendu e ka nge isukatken man bandu.” I bas terj. BIMK, “sukat-sukat” i terjemahken “takaran,” i bas terj. TB-LAI, nina “ukuran.” Akap kami lit dua sukat-sukat i jenda, sukat-sukat i bas manusia nari ras sukat-sukat i bas Dibata nari. Mari radu ras siantusi kerna erti tema PJJ-ta sendah.

Mpebagesi Ogen

Ogenta sendah masuk ku bas bas bagin pengajaren Yesus i bas ingan si kendit (ay. 17), banci ikataken Lukas 6:17-49 e me versi ringkas Khotbah Yesus i das uruk si lit i bas Injil Matius. Ay. 37-38 lit i teruh judul perikop, “Ngadili kalak si deban” seri ras terj. BIMK nina, “Menghakimi orang.” Sedangken i bas TB-LAI iterjemahken “Hal menghakimi.”

Ay. 37. Sukat-sukat si rusur sipake kita i bas kita bergaul ras kalak si deban e me sukat-sukat manusia alu prinsip balas-membalas. Adi mehuli kam man bangku, aku pe mehuli. Adi jahat perbahanenndu man bangku, la aku balas nge, saja la nggit aku erbahan mehuli man bandu. Enda akap kami masih lebih baik asangken, aku pe banci erbahan terjahaten. Sukat-sukat enda akap kami melala kel kelemahenna erkiteken i bas kita mehuli man kalak si deban labo tulus, tapi erkiteken prinsip balas-membalas. I bas ngelakoken kejahaten pe banci ikataken la lit kedungenna. Enggo terjebak kita ku bas lingkaran balas dendam si la erkeri-kerin. I bas si e, iajuk Yesus kita gelah makeken sukat-sukat Dibata nari, e me ngalemi kalak si deban erkiteken kita enggo leben ialemi Dibata. Palas i bas Dibata ngalemi kita e me keleng ate Dibata si tanpa syarat. I bas kita nginget keleng ate Dibata si tanpa syarat, kita pe engkelengi kalak si deban alu tulus. Keleng ate Dibata pe mpengasup kita memutus rantai balas dendam erkiteken ipengasup Dibata kita ngalemi kalak si deban.

I bas ay. 38, iajarken Yesus maka pengampunan harus iumputi alu tindakan kasih erpalasken keleng ate Dibata. Keleng ate Dibata e me keleng ate si sampur, i bas terj. BIMK, pemberian berlimpah-limpah yang sudah ditakar padat-padat untukmu. Ertina keleng ate Dibata man banta e mbelin kel. I bas kita nehken keleng ate man kalak si deban si jadi sukat-sukatna e me keleng ate Dibata si sampur man banta. Emaka berelah alu tulus, la ngarapken balasen, janah berelah si mehulina si lit i bas kita. Keleng ate manusia terbatas janah selalu menuntut balas, tapi keleng ate Dibata e me keleng ate si tulus tanpa mengharapkan balasan, janah keleng ate Dibata e me keleng ate si proaktif labo si pasif entah si nimai kalak si deban erkeleng ate man banta.

Versi Audio silahkan klik : https://youtu.be/nm7aCVCiiZM

Pengkenaina

Enda akap kami erti tema PJJ-ta sendah, “Make sukat-sukat si mehuli” e me sukat-sukat Dibata nari, labo suka-sukat manusia. I bas kita ngalemi kalak si deban tentu labo ngasup adi siandalken gegehta. Emaka pindolah gegeh i bas Dibata nari gelah ipengasupNa kita ngalemi kalak si deban. I bas kita nehken keleng ate si tanpa syarat bagi Dibata engkelengi kita, tentu kita labo ngasup. Emaka pindolah gegeh i bas Dibata nari gelah ipengasupNa kita makeken sukat-sukat Dibata nari i bas kita erkeleng ate nandangi kalak si deban si lit i sekelewetta. Keleng ate adi sisehken secara pribadi lepas pribadi tentu lit dampakna, tapi akan lebih berdampak adi keleng ate e sisehken secara komunal alu program-program si mehuli.

PJJ-ta sendah i bas rangka mendukung sasaran pelayanan GBKP tahun 2024, “Berkarya dan berguna untuk orang lain.” Emaka i bas si e iajuk kita mulihi gelah semakin meningkatkan kualitas ras kuantitas keleng ateta, baik secara pribadi bage pe secara komunal kelembagaan gereja. Keleng ate Dibata i bas Yesus Kristus si isehken kita ku sekelewetta: kalak si menderita, kalak si musil, kalak si sakit, kalak si kena bencana, kalak si lit i bas penjara, kalak si lenga itandaina Dibata i bas Yesus Kristus, rsd. Enggo nge sibahan program-program si mehuli guna mendukung sasaran pelayanan GBKP tahun 2024? Mari sitotoken ras sidukung sasaran pelayanan GBKP tahun 2024 gelah gelar Dibata termulia arah kehadirenta selaku pribadi bage pe gereja i japa pe kita ringan. Dibata si mpengasup kita.