SUPLEMEN PA MAMRE GBKP TGL. 25 PEB. - 2 MAR. 2024

Pdt. Larena br. Sinuhadji (Nd. ReyRapha Tarigan)

Ogen : Matius 5:13-16

Tema : NGGELUH JADI PASU-PASU MAN KALAK SI DEBAN

Tujun : Gelah Mamre :

1) Ngangkai erti sira ras terang rikutken teks

2) Meteh maka kalak si tek harus erguna man kalak si enterem

Penaruh

Sira ras terang akap kami enggo rusur siantusi peran entah pe fungsina baik i bas konteks jaman Yesus nggeluh denga i doni enda seh asa jamanta gundari enda. Janah sira ras terang (alat bantu terang), seh asa gundari, akap kami, masih denga igunaken i bas geluhta si tep-tep wari. Ertina gambaren kerna peran entah pe fungsi sira ras terang enda tetap denga relevan seh asa gundari.

I bas kesempaten enda mulihi kita erlajar kerna fungsi entah pe peran Mamre selaku sira ras terang i tengah-tengah kegeluhen si tep-tep wari. Sekaligus mengevaluasi fungsi entah pe peranta ndai, apakah masih denga masin ras ersinalsal, entah enggo lanai jelas nanamna, entah enggo nimpet terang si lit i bas dirinta?

Penjelasen Bahan Ogen

Ogenta sendah termasuk salah sada bagin i bas pengajaren-pengajaren Yesus si iajarkenNa man ajar-ajarNa i das uruk nari. Sira ras terang e me gambaren si biasa i bas kegeluhen si tep-tep wari, janah sira ras terang e mbelin kel fungsina i bas kegeluhen si tep-tep wari. Erbage-bage fungsi sira i bas kegeluhen bangsa Israel paksa si e, sebage penyedap rasa, disinfektan, bahan persembahan seremonial, alat tukar, ras bahan pengawet. Pengawet i jenda labo terjeng guna pangan-pangan ngenca, tapi sebage simbolisasi kesetiaan entah pe kelanggengan i bas perjanjin antara manusia bage pe antara manusia ras Dibata (bdk. Bil. 18:19; 2 Kron. 13:5). Bangsa Israel kuno datken sira arah Laut Mati nari guna memenuhi kebutuhen si tep-tep wari bage pe guna idayaken. Sira si mejile si banci ikonsumsi biasana enggo melalui piga-piga tahap penyaringen. I bas proses e ndai lit ka sira si la banci masin. Sira si la masin lanai lit ergana, biasana iambekken bage-bage saja ku tengah-tengah dalan janah idedehi kalak si mentas.

Gambaren terang i jenda e me terang si seh kel perluna i bas gelap. Ertina si nimaksudken i jenda e me benda-benda alat bantu penerangan si biasa igunaken i bas berngi wari, bagi pelita, obor, lentera, suluh, rsd. Gelah terang i bas sada ruangen lebih ersinalsal, pelita biasana dibantu sada alat gelarna “kaki dian,” semakin meganjang kaki dian e semakin mejile sebab erbahanca sinalsal i bas pelita banci nerangi kerina isi ruangen. Adi la lit kaki dian banci ikataken pelita e kurang mejile fungsina sebab la banci nerangi kerina isi ruangen. I bas si e jelas man banta kai si ikataken i bas ay. 15, “Labo isagani kalak lampu kenca bage itutupina alu tumba; tapi isangketkenna, gelah terang iakap kalak kerina si lit i bas rumah e.”  

Gambaren sira ras terang enda pengajuk Yesus man ajar-ajarNa gelah, si pemena, nggeluh mereken dampak si positif ras membangun ku sekelewetna. Ay. 16 secara konkrit ikataken Yesus “perbahanen si mehuli”, ertina si nimaksudken berdampak positif ras membangun enda lit wujud nyatana secara konkrit e me kerina si mehuli si banci terbegi arah pengerananta, si banci teridah arah perbahanenta, janah si ternanami arah pengkebet geluhta i japa pe kita ringan. Si peduaken, Yesus ngajuk gelah ajar-ajarNa secara proaktif ngelakoken kerina si mehuli gelah dampak positif ras membangun e terjadi terus-menerus, berkesinambungan, gelah tuhu-tuhu banci mabai perobahen ku si mehuli man lingkungen sekelewetta.

Versi Audio silahkan klik : https://youtu.be/MHPJ5S-pSQQ

Pengkenaina

Sue ras tema PA sendah, geluh kalak Kristen, kalak si enggo ngaloken keselamaten i bas Yesus Kristus, enggo pasti harus jadi pasu-pasu man kalak si deban, entah pe erguna man kalak si enterem, bagi tujun PA-nta si peduaken. I bas si e tentu adi isungkun kerna erti sira ras terang rikutken ogenta sendah, akap kami enggo nge kerina kita metehsa. Si menjadi penungkunen reflektif man banta kerina, khususna man kam kekelengen kami Mamre, enggo seh i ja kualitas ras kuantitas jadi pasu-pasu man kalak si deban bage pe erguna man kalak si enterem? Kerna penungkunen enda tentu hanya kalak si lit i sekelewetndu ras kam ngenca si banci njababsa.

I bas lingkup rumah tangga, tentu si banci nggejapkenca e me ndehara ras anak-anakta. I bas lingkup pendahin, tentu hanya teman-temanta sada dahin si banci nggejapkenca. I bas lingkup masyarakat, tentu hanya jiranta si banci nggejapkenca. I bas lingkup gereja, tentu hanya sesama anggota perpulungen si banci nggejapkenca. I bas si e tentuna banci kita nungkun man kalak si lit isekelewetta, apakah geluhku enggo jadi pasu-pasu man bana, apakah geluhku enggo erguna man bana? I bas lingkup rumah tangga bage pe i bas lingkup gereja, banci kita saling mengevaluasi sada ras si debanna. I bas si e tentu kita harus nggit terbuka guna ikritik, entah pe ievaluasi, gelah banci reh meningkatna kuantitas ras kualitas pasu-pasu si banci isehken kita man kalak si lit i sekelewetta.

I bas kita nungkun, saling mengkritik entah pe saling mengevaluasi, e me sada proses si mejile bagi proses penyulingan garam. Sira alu kualitasi mejile enggo melewati proses penyulingan si mehuli, e me arah erbage-bage pengajaren Kata Dibata, kritik saran i bas teman-teman sada kiniteken, pengalamen geluh, rsd.-na, si output-na erbahanca kualitas ras kuantitas geluhta si mehuli sue ras Kata Dibata reh meningkatna. Bage pe bagi anding-andingen terang i bas pelita, si nggit ia isangketken i bas kaki dian si erbahanca terangna ersinalsal nerangi kerina isi ruangen. Emaka i bas PA-ta sendah, iajuk kam kerina Mamre kami gelah selalu nggit terbuka guna iajari Kata Dibata, khususna i bas jadi pasu-pasu ras erguna man enterem kalak si lit i sekelewetndu. 

Tahun enda bengket kita ku bas sasaran pelayanen GBKP tahun 2024 e me, “Berkarya dan berguna untuk orang lain” (Lukas 4:18-19). Mari radu ras sidukung sasaran pelayanan enda gelah gelar Dibata termulia arah kehadirenta i japa pe kita ringan. Ibenaken pribadi lepas pribadi, terus ku lembaga kategorial Mamre, gelah dampakna banci tuhu-tuhu luar biasa adi silakoken secara komunal i bas lembaga kategorial Mamre. Pindolah gegeh i bas Dibata nari gelah ipengasupNa kam kerina Mamre, baik secara pribadi bage pe kelembagaan, nggeluh jadi pasu-pasu man kalak si deban entah pe erguna man kalak si enterem arah kai pe si lit i bas kam.