SUPLEMEN PA MORIA GBKP TGL. 8 - 14 OKTOBER 2023

Pdt. Larena br. Sinuhadji (Nd. ReyRapha Tarigan)

HUT Moria GBKP

Ogen : Kolose 2:6-8

Tema : RURAT DINGEN NGGELUH I BAS KRISTUS

Tujun : Gelah Moria :

- Ngangakai erti rurat dingen nggeluh i bas Kristus

- Pentar ngalaken sura-sura si jahat

Kata Penaruh

Selamat Ulang Tahun Moria! Secara organisasi i bas Tgl. 16 Okt. 2023 Moria GBKP genap usiana 66 thn. Setiap merayakan hari ulang tahun, biasana lit dua hal si nilakoken kita. Si pemena eme bersyukur, ngataken bujur man Tuhan si enggo naruh kegeluhenta alu erbage dinamikana, sehat sakit, beruntung buntung, maka tetap iatanken Tuhan kita seh i bas wari enda alu mejuah-juah. Si peduaken, kesempaten guna berefleksi kai si sedekah enda enggo silakoken. Mbuen si mehuli entah lang. Adi ibereken Tuhan denga kesempaten nggeluh berarti kesempaten guna mpesikap diri. Terlebih secara organisasi umur Moria enggo 66 tahun. Umur si enggo me gedang, banci kataken umur lansia. Si jadi penungkunen, enggo me teridah Moria kalak si dewasa, si pentar, ietehna mbedaken si mehuli entah lang ras ndalanken si mehuli. Enggo me Moria e jadi berkat i bas kegeluhenna. Mari tole erlajar kita arah Firman Tuhan sekali enda si jadi oratenta, kai nari si arus idalanken Moria gelah tetap geluhna berarti.

Pebagesi Pengangkan Kerna Ogen

Perpulungen Kolose eme perpulungen si tutus erkiniteken man Yesus Kristus, mulai kin nai ibegina ras igejapkeNa kerna lias ate Dibata (Kol. 1:2,5). Kolose eme sada kuta i Asia Kitik, arah timur kota Epesus. Labo Paulus si mantekisa tapi Epafras. Arah Epafras me maka enggo ieteh lit pengajar-pengajar palsu si nehken pengajaren si papak man perpulungen. Emaka surat enda ikirimken Paulus gelah perpulungen tetap paguh kinitekenna i bas Tuhan, la mengikuti pengajaren si papak bahkan pang ngelawan pengajaren si papak si niajarken guru-guru perguak e. Lit dua ajaren si papak si sangana berkembang i tengah jemaat eme ajaren kerna aturen ras ketaatan nandangi tradisi-tradisi Yahudi, bagi sunat, mantangken erbage-bage pangan (Kol. 2:16), aminna pe kalak enda enggo tek man Tuhan Yesus Kristus. Ras si peduaken, eme ajaren si ipengaruhi aliren pemikiren Yunani Romawi eme gnostisisme. 

Lit hal si menonjol i bas ajaren guru-guru si papak e:

1. Doni enda labo itepa Dibata, tapi oknum ilahi si posisina lebih rendah ibandingken Tuhan Dibata. Emaka doni enda eme materi (bendawi) si berderajat rendah.
2. Manusia pada dasarna eme mahluk si bersifat ilahi. Manusia berasal i bas percikan sinar ilahi si kedungenna terpenjara ibas geluh si fana. Hal enda terjadi erkiteken manusia ndabuh ku bas dosa seh makana tedeh ate kerna kelepasen. Kelepasan ini hanya bisa dicapai melalui pengetahuan yang harus diusahakan oleh manusia. 

Erkiteken si e, Paulus ngatakenca maka :

1. Kerina sinasa lit ijadiken Dibata arah Kristus Yesus, jadi labo itepa oknum ilahi si posisina lebih rendah ibandingken Tuhan Dibata (Kol. 1:16b).
2. Kalak si tek man Yesus Kristus eme tinepa si mbaru, sabab kematen Kristus nelamatken manusia si erdosa (Kol. 3:1-3).
3. Yesus Kristus me kelepasen si sempurna man manusia. Harapen manusia gelah selamat hanya i bas Yesus Kristus labo bas pengetahuan (filsafat) si kosong (Kol. 2:8-9).

Alu bage perpulungen Kolose si enggo ngaloken Kristus i bas geluhna (ay. 6, “kamu telah menerima Yesus Kristus Tuhan Kita”) gelah tetap megegeh ngalaken ajaren papak (tantangen) si tetap arus idalanken perpulungen :

• Nggeluh tetap ersada ras Kristus. Calvin pernah mengatakan: “tak ada gunanya bagi seseorang kalaupun dia telah menerima Yesus Kristus kalau dia tidak tetap hidup di dalam Dia.” Perban paksa si e melala ajaren-ajaren palsu maka perpulungen arus tetap nggeluh ersada ras Yesus gelah la murah ijola-joleken ajaren sesat e.
• Rurat i bas Ia, geluhken geluhndu i bas Ia ras reh gegehna kinitekenndu bagi si niajarken man bandu (“Hendaklah kamu berakar di dalam Dia dan dibangun di atas Dia, hendaklah kamu bertambah teguh dalam imam yang telah diajarkan kepadamu”). Rasul Paulus make gambaren batang pohon, i ja akar batang pohon sangat menentuken kekuaten (pertumbuhen) pohon e. Urat eme bagin si penting kel guna batang kayu. Urat me si ndarami pangan dingen merekenca man batang ras urat nari. Adi uratna njoler gedang berarti pangan (nutrisina) cukup, maka batang pohon e megegeh, buahna pe mejile. Bage me gambaren kalak Kristen arus tetap berakar i bas Yesus Kristus. Ertina, Yesus Kristus eme ulu kegeluhenta, si erbahanca geluh pertendinta sehat ras megegeh. Setiap kai pe si ilakoken kita, subuk perukuren, pengerana ras perbahanenta arus sentudu bagi si ngena ate Tuhan, sabab Yesus ulu kegeluhenta. Sabab jelas nina Paulus ndai kinitekenta arus reh gegehna bagi si niajarken man banta.
• Rusurlah ngataken bujur man Dibata (“Hendaklah hatimu melimpah dengan syukur”). Ngataken bujur man Tuhan i bas situasi si kugapana pe, sabab sigejapken Tuhan nge si erdolat bas kegeluhenta. Asum tetap kita ngataken bujur man Tuhan maka megenggeng, la pedas putus asa kita aminna pe mbue perbeben. Termasuk tantangen si reh man banta selaku kalak si tek, labo e erbahanca bene kinitekenta tapi tetap kuat i bas Tuhan.
• Tetap metenget (waspada - berhati-hati). Kata bijak Bang Napi “Waspadah! Kejahatan terjadi bukan semata-mata karena ada niat dari perilaku, tetapi juga karena ada kesempaten.” Alu bage ula sempat kita lengah, ula bereken kesempaten guru-guru palsu berkuasa i tengah-tengah perpulungen. Pemimpin-pemimpin jemaat ras perpulungen arus tetap nggeluh i bas Kata Dibata. Perpulungen arus setia erlajar kerna Kata Dibata, seh makana mampu membedaken pengajaren si mehuli ras pengajaren si papak dingen pang melawan ajaren sesat.

Versi Audio silahkan kunjungi : https://youtu.be/4i5sNmd5P78

Aplikasi

Tema i bas PA-nta sekali enda “Rurat ndigen nggeluh i bas Kristus.” Arah bahan PA-nta sekali enda eme dalam rangka Ulang Tahun Moria pe-66 tahun, Moria GBKP mulihi ibereken kesempaten guna mengevaluasi dirina, tetap nge Moria rurat dingen nggeluh i bas Kristus. Adi lenga, berarti arus lit pembaharuan i bas dirinta, sabab adi la kin kita rurat i bas Tuhan, labo kita jadi Moria si bijak, labo kita jadi Moria si tangguh ‘di kenca lit perbeben si reh, bahkan murah kel kita ijola-joleken pengajaren doni enda (konsumerisme, materialistis, individualistis, seks bebas, rsd.). Adi enggo sedekah enda kita nggeluh ras rurat i bas Kristus, akap kami arus sitingkatken, ula kita berpuas diri, selama ibereken Tuhan kesempaten nggeluh man banta.

Uga kesetianta i bas membangun hubungenta ras Tuhan secara pribadi (doa pribadi, saat teduh, ngoge Pustaka, saat teduh ras keluarga, ketelibaten ras perpulungen arah PJJ, PA, Kebaktin Minggu ras kegiaten si membangun geluh pertendinta). Ngasup nge kita ngataken bujur man Tuhan i bas kerina dampar geluhtta, uga kesetianta nehken persembahen (perpuluhen), uga kepedulianta nandangi temanta si deban si butuh man sampaten, megegeh nge kita asum lit perbeben entah dekahen jungut-jungut. Enda me piga-piga indikator si banci nampati kita mengevaluasi dirinta, gelah pengajaren doni, pengajaren si papak, la nari mpengaruhi kita, ngasup sisilahken sabab enggo sieteh kebenaren. Bahkan geluhta reh ngasupna jadi terang ras berkat man sekelewetta arah nilai-nilai ras geluh si mehuli bas kita.