Pdt. Larena br. Sinuhadji (Nd. ReyRapha Tarigan)
NIKAPKEN KEPERLUN SURUH-SURUHEN DIBATA
(2 Raja-raja 4:8-13)
I bas minggu si lepas enggo radu ras kita erlajar kerna pembarken Berita Si Meriah. Sue ras GBP GBKP emaka iarapken enggo sibentuk Tim PI i bas Runggunta masing-masing. I bas kesempaten erlajar ka kita kerna kai-kai saja si banci silakoken guna mendukung dahin-dahin pembarken Berita Si Meriah.
Mpebagesi Ogen
Elisa eme suruh-suruhen Dibata (nabi) si nggantiken Elia (bdk. 1 Raj. 19:16). Kerina si jadi tugas tanggung jawab Elia sebage nabi i tengah-tengah bangsa Israel igantiken Elisa. Kai si ilakoken Elisa i bas bindu 4 enda seri ras kai si ilakoken Elia i bas 1 Raj. 17:8-24. I bas pelayanenna man diberu si bayak i Sunem pe enggo pernah ilakoken Elia (ay. 1). Ertina diberu i Sunem nari ras perbulangenna enggo biasa ngalo-ngalo kemahen Tuhan i rumahna. Sunem eme sada daerah si isebutken i bas kitab Josua 19:18. Si istimewa i bas turi-turin enda, isikapken ingan khusus guna ingan tading Elisa adi reh ia ku Sunem.
I bas ay. 10 ituriken maka sue arih ras perbulangenna, isikapken diberu bayak i Sunem nari enda sada bilik kitik i babo tarum. Itamakenna je ingan medem, sada meja, sada kursi, ras sada lampu. Banci jadi kerina si ibutuhken Elisa i bas pelayanenna isikapken diberu Sunem enda ras perbulangenna. I bas si e Elisa pe sebage kemahen Tuhan labo kem saja menikmati kerina fasilitas si enggo isikapken diberu Sunem ras perbulangenna. I bas ay. 13 ituriken maka isungkun Elisa kai si banci ibahanna guna mbalas kerina kelatihen si enggo ilakoken guna nikapken keperlun Elisa ras suruh-suruhenna Gehasi. Tapi ngaloi diberu Sunem ndai nina, “Kerina keperlunku enggo cukup dat aku i tengah-tengah bangsaku.” Enda ncidahkenca maka kerina si ilakoken diberu Sunem enda tulus tanpa pamrih guna mendukung pelayanen Nabi Elisa.
I bas turi-turin selanjutna radu ras siteh maka diberu Sunem enda datken pasu-pasu i bas Dibata nari eme sekalak anak. Amin pe ituriken maka anakna e mate tapi i bas perkuah ate Dibata anakna si enggo mate ndai nggeluh mulihi. Pengalamen enda tentuna maba keriahen si tuhu-tuhu man keluarga bage pe mabai keluarga enda reh tutusna nembah Dibata.
.png) |
| Versi Audio silahkan klik : https://youtu.be/LoMoitMX4sg |
Pengkenaina
PJJ-ta sendah ngumputi PJJ minggu si lepas kerna dahin-dahin pembarken Berita Si Meriah sue ras perentah Yesus i bas Matius 28:19-20. Ngataken bujur kita sebab Gerejanta GBKP secara konsisten setiap tahun ngelitken renungen, pembahasen kerna PI entah pe Pekabaran Injil. Mbera tuhu-tuhu mpeturah tekad i bas dirinta guna ikut muat bagin semakin melengkapi kerina si arus ilengkapi guna dahindahin pembarken Berita Si Meriah enda baik secara pribadi bage pe secara kelembagaan.
I bas Buku PJJ-ta enggo melala usulen-usulen tindaken konkrit si banci silakoken kita dalam rangka semakin melengkapi dahin-dahin pembarken Berita Si Meriah. Sue ras ogenta sendah, mari radu ras siusih diberu Sunem ras perbulangenna i bas mendukung pelayanen Nabi Elisa. I bas dukungen si ibereken teridah maka lit je totalitas ras ketulusen segelah dahin-dahin pelayanen banci erdalan alu maksimal.
Totalitas i bas mendukung dahin-dahin PI pe banci radu ras silakoken i bas konteks GBKP asa gegeh si lit i bas kita sue ras perkuah ate Dibata man banta. Tapi si paling penting i jenda, si pemena, arus leben sigejapken maka keleng ate Dibata bage pe keselamaten i bas Dibata nari enggo sialoken kita erkelangken kalak si nggit iutus guna er-Berita Si Meriah man banta. I bas si e rutang kita guna ikut muat bagin mendukung dahin-dahin PI baik ke dalam maupun ke luar. Si peduaken, kai pe bentuk dukungen si ibereken kita, palasna eme pengataken bujurta man Dibata guna kemulian gelar Dibata. I bas si e marilah siusih diberu Sunem si tulus ras tanpa pamrih mereken dukungen si maksimal guna pelayanen Nabi Elisa. Pindolah gegeh i bas Dibata nari gelah ipengasupna kita mendukung kerina dahin-dahin pelayanen i bas GBKP.
PJJ-ta sendah ngumputi PJJ minggu si lepas kerna dahin-dahin pembarken Berita Si Meriah sue ras perentah Yesus i bas Matius 28:19-20. Ngataken bujur kita sebab Gerejanta GBKP secara konsisten setiap tahun ngelitken renungen, pembahasen kerna PI entah pe Pekabaran Injil. Mbera tuhu-tuhu mpeturah tekad i bas dirinta guna ikut muat bagin semakin melengkapi kerina si arus ilengkapi guna dahindahin pembarken Berita Si Meriah enda baik secara pribadi bage pe secara kelembagaan.
I bas Buku PJJ-ta enggo melala usulen-usulen tindaken konkrit si banci silakoken kita dalam rangka semakin melengkapi dahin-dahin pembarken Berita Si Meriah. Sue ras ogenta sendah, mari radu ras siusih diberu Sunem ras perbulangenna i bas mendukung pelayanen Nabi Elisa. I bas dukungen si ibereken teridah maka lit je totalitas ras ketulusen segelah dahin-dahin pelayanen banci erdalan alu maksimal.
Totalitas i bas mendukung dahin-dahin PI pe banci radu ras silakoken i bas konteks GBKP asa gegeh si lit i bas kita sue ras perkuah ate Dibata man banta. Tapi si paling penting i jenda, si pemena, arus leben sigejapken maka keleng ate Dibata bage pe keselamaten i bas Dibata nari enggo sialoken kita erkelangken kalak si nggit iutus guna er-Berita Si Meriah man banta. I bas si e rutang kita guna ikut muat bagin mendukung dahin-dahin PI baik ke dalam maupun ke luar. Si peduaken, kai pe bentuk dukungen si ibereken kita, palasna eme pengataken bujurta man Dibata guna kemulian gelar Dibata. I bas si e marilah siusih diberu Sunem si tulus ras tanpa pamrih mereken dukungen si maksimal guna pelayanen Nabi Elisa. Pindolah gegeh i bas Dibata nari gelah ipengasupna kita mendukung kerina dahin-dahin pelayanen i bas GBKP.
Tidak ada komentar:
Posting Komentar