SUPLEMEN PA MAMRE GBKP TGL. 1 - 7 OKTOBER 2023

Pdt. Larena Sinuhadji (Nd. ReyRapha Tarigan)

Nats : Pilipi 2:1-4

Tema : NGGELUH RAS KRISTUS

Tujun : Gelah Mamre :

- Meteh ulih nggeluh ras Kristus eme megegeh

- Ertekad tetap mpeteguhi kiniersadan ras kalak si deban

Penaruh

Lit kuan-kuan si ngatakenca “like father like son,” kuan-kuan enda seri ras kuan-kuan Indonesia si ngatakenca “buah jatuh tidak jauh dari pohonnya.” Antusenna bagenda, mungkin pernah sialami, lit si ngatakenca maka ayonta e mirip entah pe menam seri ras ayo bapa entah nandenta. Labo terjeng ayo saja, tapi lit ka si ngatakenca maka caranta ngerana, caranta rukur, gerak-gerik, tingkah laku, rsd.-na, ikataken seri ras bapanta entah pe nandenta. Engkai maka lit si ngatakenca maka kita menam seri ras bapa nandenta? Jawabenna, selain enggo pasti erkiteken kita anak kandung bapa ras nandeta, pasti lit hubungen si ndeher antara kita ras orang tuanta. Erkiteken hubungen si ndeher e, tuhu-tuhu iteh kita karakter-karakter si mehuli (entah pe sebalikna, si la mehuli) si lit i bas bapa ras nandeta si secara tanpa kita sadari menurun i bas dirinta.

Sebage kalak si enggo ngaloken keselamaten i bas Yesus Kristus, kita eme representasi Kristus i bas kegeluhen si tep-tep wari. Ertina geluhta seharusna ngusih Kristus. Teladan i bas Kristus labo banci silaksanaken adi la lit hubungen si ndeher ras Kristus. I bas PA-ta sekali enda, isingetken kita mulihi kerna nggeluh ndeher ras Kristus.

Mpebagesi Nats

Rasul Paulus me si majekken Perpulungen Pilipi (bdk. Perb. Rasul 16:12-40; Pil. 4:15-17). Erkiteken si e lit hubungan si ndeher antara Rasul Paulus ras Perp. Pilipi. Hubungen si ndeher e teridah arah penampat ras pertoton i bas Perp. Pilipi nari man Rasul Paulus i bas pelayanenna (bdk. Pil. 1:5; 4:15-17). Surat enda itulisken alu maksud Paulus ngataken bujur i bas kerina si enggo ibereken perpulungen man bana janah gelah perpulungen e meteh uga keadaan Rasul Paulus si sangana lit i bas penjara gelah tetap idukung i bas pertoton. Teridah maka lit hubungen si saling mendukung sada ras si debanna antara Rasul Paulus ras perpulungen i Pilipi. La lit persoalen si serius i bas perpulungen Pilipi, maka isi surat Paulus e bersifat memelihara hubungen si mehuli gelah reh ulina sekaligus mpegegehi perpulungen gelah tetap paguh erkiniteken man Yesus Kristus amin pe melala tantangen.

Judul perikop i bas ogenta sendah “Jesus jadi usihen,” i bas terj. TB-LAI nina, “Nasihat supaya bersatu dan merendahkan diri seperti Kristus.” Judul i bas TB-LAI nari akap kami lebih mengena rikutken tema ras tujun PA-ta sendah. Rasul Paulus ngajuk gelah perpulungen e ersada arihna, sikeleng-kelengen, ersada geluhna dingen ersada ukurna (ay. 2), meteruk ukur ras saling menghargai (ay. 3), ras mperdiateken keperlun kalak si deban (ay. 4). Sebab iteh Paulus maka kiniersadaan si paguh i bas perpulungen erbahanca perpulungen e banci tuhu-tuhu nggeluh i bas kiniteken si payo man Tuhan Dibata i bas Yesus Kristus janah perpulungen e banci tuhu-tuhu ndahiken dahin-dahin pelayanen si luar biasa sue ras peraten Dibata. Tapi lit denga piga-piga kalak i bas Perp. Pilipi si la nggit ersada arihna, merangap, meganjang ukur, ulin akapna ia asangken kalak si deban, janah la nggit mperdiateken keperlun kalak si deban. I bas bhs. Ind. ay. 3 nina, “mencari kepentingan sendiri atau puji-pujian yang sia-sia.” “Kepentingan sendiri” seri ertina ras menguntungkan diri sendiri, janah “pujian yang sia-sia” seri ertina ras gila hormat. I bas si e banci siidah maka amin pe si la nggit ersada arihna sitik ngenca jumlahna, tapi banci menghambat kuantitas ras kualitas pelayanan i tengah-tengah perpulungen.

Si jadi palas i bas perpulungen banci nggeluh sikeleng-kelengen, ersada arihna, ersada ukurna, meteruk ukur, saling menghargai, ras mperdiateken keperlun kalak si deban, eme nggeluh i bas Kristus. I bas ay. 1 enggo isingetken Paulus, i bas terj. BIMK nina, “Kalian kuat, karena kalian bersatu dengan Kristus. Dan kalian terhibur karena Kristus mengasihimu! Kalian dibimbing Roh Allah, dan kalian juga saling mengasihi serta menaruh belas kasihan satu sama lain.” Ertina i bas Kristus ngenca lit gegeh, pengapul, ras keleng ate si tuhu-tuhu.

I bas ay. 5-8 semakin ipertegas Paulus maka kalak si nggeluh i bas Kristus bali perukurenna ras Kristus, meteruk ukurNa bagi sekalak juak-juak, erkemalangen man Dibata, ras nggit erkorban guna kiniulin kalak si deban. Situhuna perpulungen e enggo tuhu-tuhu berusaha nggeluh i bas Kristus (bdk. ay. 1), saja ngenca lit denga piga-piga kalak si lenga dewasa kinitekenna, emaka gelah malem ate Rasul Paulus, ipindoken Rasul Paulus man Perp. Pilipi, khususna si lenga dewasa kinitekenna, gelah nggit ersada arihna, sikeleng-kelengen, ersada geluhna dingen ersada ukurna, meteruk ukur, saling menghargai, ras mperdiateken keperlun kalak si deban. Gelah dahin-dahin persekutuan, kesaksian ras pelayanan i bas perpulungen pe la terhambat, banci silaksanaken alu mehuli sue ras peraten Dibata.

Versi Audio silahkan klik : https://youtu.be/7YdMeU3GpB4

Pengkenaina

Tema i bas PA-ta sendah ngajuk kam kerina Mamre gelah reh ndeherna ras Kristus sebab hubungen si ndeher ras Kristus sangat menentukan kedewasaan rohani Mamre. Hubungen si ndeher ras Kristus hanya Dibata ras kam ngenca si metehsa. Kalak si ngidah arah ndarat nari banci salah pengidahna. Siakap ndeher ras Kristus, enggo dewasa kinitekenna, kepeken hanya tampak luar belaka, bas penuh dengan dendam, kebencian, iri hati, rsd.-na. Arah pengerana ras perbahanen pe banci kalak salah menilai. Siakap palasna keleng ate Kristus kepeken palasna hanya moralitas umum entah pe adat istiadat. Emaka i bas kesempaten enda, marilah kam kerina kekelengen kami Mamre mengevaluasi secara pribadi hubungenndu ras Kristus. Ertoto mindo gegeh i bas Dibata nari gelah ipengasupNa kam kerina menjalin relasi si ndeher ras Kristus arah ketutusenndu erlajar Kata Dibata, ertoto, rsd.-na.

Tujun si pemena i bas PA-ta sendah, ngajuk kam kerina Mamre nggejapken gegeh si rehna i bas Dibata nari. Sekalak dilaki rusur ikataken lebih rasional asangken diberu. Tapi rasionalitas sering membawa seorang lelaki hanya mengandalkan kekuatannya sendiri. Ngataken bujur kita erkiteken Dibata mereken rasionalitas man banta, tapi ula sempat rasionalitas erbahanca kita la nari tek man kuasa Dibata. Sekalak Bapa Gereja gelarna Agustinus pernah ngatakenca “Deus semper maior” ertina ciptaan tidak pernah bisa melebihi penciptanya, Tuhan selalu lebih besar dari semua ciptaanNya. Gegeh i bas Dibata nari hanya banci sigejapken adi kita tuhu-tuhu ernalem man Tuhan.

Tujun si peduaken ngajuk kam kerina Mamre gelah mpeteguhi kiniersadan ras kalak si deban, khususna ras sapih-sapihta sada perpulungen. Perp. Pilipi banci jadi usihen i ja kiniersadan ras Kristus iaplikasiken secara horizontal alu mpeteguhi kiniersadanna ras senina turang i bas perpulungen kakal si tek. I bas si e tentu menjadi bahan evaluasi man bandu kekelengen kami Mamre i japa pe kam ringan. Apakah kiniersadan si lit sedekah enda tuhu-tuhu erpalasken keleng ate Kristus entah lit palas si deban si lebih dominan? Lit istilah si ngatakenca, “Banyak orang cinta GBKP tetapi tidak cinta Yesus,” maksudna enterem kalak bergabung ku GBKP labo erkiteken nggit ia ndeher ersada ras Kristus tapi erkiteken lit je persadan suku Karo. Guna membedakenca, ciri-ciri kalak si ndeher ersada ras Kristus nggit ia engkelengi alu tulus bagi si niajarken Yesus, nggit ia mindo maaf ras ngalemi salah bagi si niajarken Yesus, nggit ia berkorban guna kiniulin kalak si deban bagi teladan Yesus, rsd.-na.

Adi sedekah enda enggo terjalin kiniersadan erpalasken keleng ate Kristus, puji Tuhan! Tentu harus lebih itingkatken kuantitas ras kualitasna. Tanda-tanda si nyata i bas kiniersadan erpalasken keleng ate Kristus, lit kepedulian, mediate, entah pe empati, nandangi senina turangta si sangana kesulitan ekonomi, sakit berkepanjangan, lenga dat teman geluh, lenga dat pendahin, lit masalah i bas jabuna, lit masalah i bas pendahinna, rsd.-na. Kepedulianta nandangi senina turang si sangana lit i bas perbeben ndai erbahanca kita nggit notoken ras nampati alu kai pe si banci isehken kita sebage bentuk nyata keleng ate i bas Kristus. Dibata si mpegegehi kam kekelengen kami Mamre GBKP.