SUPLEMEN PJJ GBKP TGL. 29 OKT. - 4 NOV. 2023

Pdt. Larena br. Sinuhadji (Nd. ReyRapha Tarigan)

MEDIATE ERKADE-KADE (Jop 42:11)

Penaruh

Adi ngerana kerna erkade-kade, suku Karo termasuk salah sada suku si sistem kekerabatanna mejile. Lit merga si lima, rakut si telu, tutur si waluh, ras perkade-kaden dua belas tambah sada. Orat nggeluh Karo mabai kalak Karo nggeluh sisampat-sampaten ras sikeleng-kelengen. Aminna pe la sada kuta, la sada dareh, tapi banci ndeher erkiteken orat nggeluh, kerina enggo banci erkade-kade. Bahkan si la pe kalak Karo, adi enggo bengket ia ku bas masyarakat Karo erkiteken perjabun, minter ban mergana, ras enggo lit sangkep geluhna. Bagem adi ngerana kita kerna erkade-kade i bas budayanta kalak Karo.

I bas kesempaten enda radu ras kita erlajar mulihi kerna erkade-kade erpalasken Kata Dibata. 

Mpebagesi Ogen

Ogenta sendah nuriken kerna salah sada tokoh si terkenal i bas Pustaka Si Badia eme Jop. Secara garis besar Kitab Jop nuriken kerna Jop sekalak si saleh (bujur), la ia nggit ngelakoken si jahat ras mbiar ia man Dibata. Banci ikataken Jop sekalak si berhikmat. Hikmat si rehna i bas Dibata nari mabai Jop ngalaken kiniseran si mberat i bas geluhna, amin pe sebage manusia labo ia sempurna. Si jadi ogenta sendah, bindu 42 eme bindu terakhir i bas Kitab Jop. Secara garis besar i bas bindu enda ituriken maka Jop erkadiola, kundul ia i bas abu dapur ras abu taneh sebage tanda mpeteruk dirina i adep-adepen TUHAN ngakuken dosana. Ertoto pe Jop nandangi teman-temanna gelah ialemi Dibata salah teman-temanna. Kenca si e ituriken senang mulihi geluh Jop ibahan TUHAN (dipulihkan TUHAN), janah iberekenNa man Jop kebayaken dua kali lipat buena asa si marenda.

Si jadi fokus i bas PJJ-ta sendah eme ay. 11, nina, “Kerina senina-senina Jop ras turangna, bage pe teman-temanna si mbarenda, reh ndahi ia, janah ras ia man-man i bas rumah Jop. Iapulina Jop, janah ikatakenna maka ia pe kerina ikut rate ceda i bas kiniseran si enggo irehken TUHAN man bana. Sekalak-sekalak ia mereken duit ras sada cincin emas man Jop.” Jadi i bas ayat enda ituriken, kenca enggo ieteh maka kondisi Jop enggo ipulihken Dibata, i ja kebayaken Jop enggo iulihken Dibata dua kali lipat, maka rehen kerina senina ras turang Jop bage pe teman-temanna si mbarenda. Tentu si jadi penungkunen, i ja kin senina turangna bage pe teman-temanna sanga Jop lit i bas kiniseran? Sanga lit i bas kiniseran ersaksi Jop nina, “… senina-seninangku janah kalak si kutandai lanai akapna aku teman. Kade-kadengku ras temanku meriah, kerina enggo nilah; janah kalak si gelgel jadi temuengku, enggo ngelupaken aku genduari” (Jop 19:11-13). Memang lit denga teman-teman (sahabat) si reh ndahi Jop sanga ia lit i bas kiniseran, Elipas (Jop 4:1, rst.), Bildat (Jop 8:1 - rst.), Sopar (Jop 11:1 - rst.), ras Elihu sekalak si nguda denga (Jop 32:2 - rst.), tapi kerehen kalak enda kerina secara pastoral akap kami labo kel mpegegehi Jop. Tapi adi sibandingken ras kade-kade Jop lebih mehuli teman-temanna si 4 kalak ndai, lit denga ukurna guna ndahi Jop si sangana lit i bas kondisi terpuruk.

Lit kesan i bas ay. 11 si jadi ogenta sendah, rasa mediate si lit i bas kade-kade Jop labo tulus, tempa-tempa bagi mediate si kondisonal. Sanga lit i bas kondisi terpuruk, la lit ise pe kade-kade si reh ndahi Jop mereken kata-kata pergegeh, mereken duit, apai ka mereken cincin emas. Tapi kenca enggo iteh kade-kadena kondisi Jop enggo bayak mulihken, rehen kerina ndahi Jop. Tapi amin bage gia, erlajar kita arah ogenta sendah maka reh denga kade-kade Jop ndahi ia ras keluargana, nehken kata ikut erceda ate, mereken duit ras cincin emas man Jop.

Versi Audio silahkan klik : https://youtu.be/qz0TYD9u454

Pengkenaina

Selaku kalak si enggo ngaloken keselamaten i bas Yesus Kristus, iajuk kita gelah mediate erkade-kade. Melala contoh mediate man kade-kade i bas Pustaka Si Badia, umpamana turi-turin kerna Jusup si mediate nandangi senina-seninana, Boas si mediate man Rut ras Naomi, melala turi-turin i bas kitab Injil si nuriken kerna mediate man kade-kade, umpamana i bas Luk. 4:38-40. Bahkan i bas 1 Tim. 5:8 Paulus ngatakenca, “Adi lit si la mperdiateken kade-kadena, terlebih-lebih keluargana, enggo ipersokenna kinitekenna. Jahaten me ia asangken kalak si la tek man Yesus Kristus.” Ertina mediate nandangi kade-kade lit palasna i bas Pustaka Si Badia. Janah mediate i bas Pustaka Si Badia akap kami mediate alu palas keleng ate Yesus Kristus si labo kondisional, i bas keadaan si kugana pe, sukses terpuruk, sehat sakit, bayak musil, arus kita mediate nandangi kade-kadenta. 

Ngataken bujur kita sebab Berita si Meriah si bengket ku kalak Karo menaken 1890, labo meneken budayanta, malah arah kerina unsur budaya, bahasa, merga si lima, rakut si telu, tutur si waluh, perkade-kaden 12+1, erbahanca kualitas erkade-kade reh teguhna. Arah kekelengen Kristus si enggo sialoken, erbahanca reh teguhna kiniersadan bage pe mediate selaku kalak Karo. Keleng ate Kristus erbahanca mediate si lit i bas kalak Karo iperluas man labo terjeng man kade-kade sada dareh, tapi man ise pe, khususna man sapih-sapihta kalak si tek man Yesus Kristus. Arah PJJ-ta sendah iajuk kita gelah semakin meningkatken kualitas ras kuantitas mediate erkade-kade, i tengah-tengah keluarga besarta, i tengah-tengah perpulungen, bage pe i tengah-tengah masyarakat, gelah tergejap keleng ate Kristus i bas kita nari. Dibata si mpengasup kita.