SUPLEMEN PA MORIA GBKP TGL. 29 OKT. - 4 NOV. 2023

Pdt. Larena br. Sinuhadji (Nd. ReyRapha Tarigan)

Si Man Ogen : Josua 6:22-25

Tema : PERBAHANEN SI MABA KEGELUHEN

Tujun : Gelah Moria :

- Meteh ulih perbahanen Rahap i bas nelamatken mata-mata Israel

- Tetap erbahan mehuli guna masa depan diri, jabu, gereja, ras masyarakat

Penaruh

Lih kuan-kuanen si ngatakenca bagenda, “Gajah mati meninggalkan gading, harimau mati meninggalkan belang, manusia mati meninggalkan nama.” Ertina perbahanen si mehuli entah pe si jahat bakal jadi inget-ingeten kalak kenca enggo sekalak jelma mate. Jadi asangken perbahanen si jahat si iinget, madin perbahanen si mehuli.

I bas kesempaten enda radu ras kita erlajar kerna perbahanen si mehuli rikutken Kata Dibata.

Mpebagesi Si Man Ogen

Si man ogenta sendah nuriken kerna sekalak tokoh Alkitab diberu si tergelar Rahap. Turi-turin kerna Rahap ibenaken i bas kitap Josua bindu 2, i ja ituriken maka lit sekalak diberu si dahinna erlua-lua si tergelar Rahap, si nampati dua kalak mata-mata si sangana ertugas menyelidiki tanah Kanaan, khususna kota Jeriho. Dua kalak mata-mata enda tading erberngi i rumah Rahap. Kenca enggo iteh raja Jeriho maka enggo reh piga-piga mata-mata bangsa Israel ku wilayah kekuasaanna, mis isuruhna kalak guna nungkun man Rahap. Kenca enggo itehna reh utusen raja, mis ibuniken Rahap dua mata-mata ndai i teruh gun-gunen batang kurri i das tarum rumahna. Janah ikataken Rahap man utusen raja maka mata-mata ndai enggo lawes ope denga pintu gerbang kota itutup. Emaka selamat me dua kalak mata-mata ndai.

Si menarik i bas turi-turin enda, ikataken Rahap nina, “Kueteh maka enggo ibereken TUHAN taneh enda man bandu. Kerina kalak i negeri enda mbiar man bandu. Enggo ibegi kami uga TUHAN ngkerahi Lawit Merah i lebe-lebendu asum kam nadingken taneh Mesir. Bage pe enggo ibegi kami kam enggo munuh Sihon ras Og, raja kalak Amori arah Timur Jordan. Mbiar kami minter kenca ibegi kami kerna si e; bene ukur kami kerina erkite-kiteken kam. TUHAN Dibatandu, IA nge Dibata langit ras doni” (Jos. 2:9-11). Kai si ikataken Rahap enda akap kami eme pengakun kinitekenna nandangi Dibata si isembah Israel. Ertina Rahap amin pe labo kalak Jahudi janah dahinna pe erlua-lua tapi tek ia nandangi TUHAN Dibata Israel. Kinitekenna si erbahanca Rahap nampati dua kalak mata-mata bangsa Israel ndai janah mindo Rahap gelah ia ras isi jabuna iselamatken sanga kota Jeriho italuken.

Si man ogenta sendah nuriken kelanjuten turi-turin kerna Rahap enda ndai. Erkelangken Josua, Dibata mereken keselamaten man Rahap ras isi jabuna. Isuruh Josua dua kalak mata-mata ndai guna maba Rahap ras kerina isi jabuna ku bas ingan si aman ndeher ingan bangsa Israel erkemah. Rahap ras kerina isi jabuna iselamatken Dibata. I bas Padan Si Mbaru gelar Rahap tetap iinget. Heber 11:31 ngatakenca, “Erdandanken Rahap, diberu si dahinna ndayaken dirina e, tek man Dibata me maka la ia ikut ibunuh ras kalak si ngelawan Dibata, sebab ialo-alona alu dame mata-mata kalak Israel e.” Jakup 2:25 ngatakenca, “Bage me pe kerna Rahap, diberu si dahinna ndayaken dirina e. Ia irembakken ras Dibata erdandanken perbahanenna, asum ialo-alona mata-mata e ku rumahna, bage pe isampatina kalak e lompat arah dalan si deban.” Bahkan i bas Matius 1:5, Rahap masuk ku bas terombo Yesus Kristus.

Versi Audio silahkan klik : https://youtu.be/7--p-y-gGOw

Pengkenaina

Perbahanen si mehuli masuk ku bas ulih Kesah Si Badia, bahkan Yesus pe ngajarken kerna erbahan si mehuli, umpamana i bas Lukas 6:27, “Mehulilah perbahanenndu man kalak si ernembeh ate nandangi kam.” Ertina sebage kalak si enggo ngaloken keselamaten i bas Yesus Kristus, perbahanen si mehuli arus silakoken. I bas PA-ta sendah mulihi kita isingetken kerna perbahanen si mehuli sebab perbahanen si mehuli eme perentah Yesus Kristus, janah melala ulih si mehuli arah perbahanenta si mehuli. Adi i bas tema PA-ta sendah, perbahanen si mehuli maba kegeluhen. Enda erpalasken perbahanen Rahap si maba kegeluhen man kalak Israel, sue ras tujun PA-ta si pemena.

I bas tujun PA-ta si peduaken, iajuk kita guna tetap erbahan mehuli guna masa depan diri, jabu, gereja, ras masyarakat. Saja perlu iinget, si pemena, labo kerina perbahanenta si mehuli datken balasen si mehuli arah kalak si deban nari. Ertina i bas kita erbahan si mehuli, motivasinta tulus, labo i bas rangka gelah dat balasen si mehuli i bas kalak si deban nari, tapi palasta i bas erbahan si mehuli eme keleng ate Kristus (bdk. Luk. 6:35). Si peduaken, perbahanenta si mehuli eme wujud nyata pengataken bujurta erkiteken keselamaten si enggo ialoken kita. Galatia 6:9 ngatakenca, “Janganlah kita jemu-jemu berbuat baik, karena apabila sudah datang waktunya, kita akan menuai, jika kita tidak menjadi lemah.” Tetaplah erbahan si mehuli, Dibata si mpegegehi kita.