SUPLEMEN PA MAMRE GBKP TGL. 15 - 21 OKTOBER 2023

Pdt. Larena br. Sinuhadji (Nd. ReyRapha Tarigan)

Teks : Roma 12:8-11

Tema : MAMRE SI TUTUS (DISIPLIN)

Tujun : Gelah Mamre :

- Meteh orat nggeluh si tutus

- Disiplin (tutus) i bas geluh ndahiken dahinna bage pe dahin Dibata

Penaruh

Kai pe si idahiken kita adi la tutus kita ndahikenca enggo pasti hasilna pe la maksimal, bahkan mungkin kai si idahiken kita ndai gagal total. I bas PA-ta sendah radu ras kita erlajar kerna ketutusen erpalasken Kata Dibata. Tutus i bas Kamus Bahasa Karo Indonesia ertina: sungguh-sungguh, dengan sepenuh hati, tulus, tidak main-main atau setengah hati. Sedangken kata “tutus” enda rikutken bahan PA Mamre-ta sendah iperseri (disamaken) ras kata “disiplin.” Kata “disiplin” i bas bahasa Indonesia ertina: tata tertib, ketaatan (kepatuhan) terhadap peraturan (tata tertib dan sebagainya). Disiplin merupakan perasaan taat dan patuh terhadap nilai-nilai yang dipercaya merupakan tanggung jawabnya.

Mpebagesi Teks

Surat Roma lit si ngatakenca surat Rasul Paulus yang paling panjang, paling teologis, dan paling berpengaruh. Emaka i bas kerina surat-surat si itulisken Rasul Paulus, Surat Roma enda si pemenana itamaken i bas Padan Si Mbaru kenca Perbahanen Rasul-rasul. I bas bindu 1:13-15 teridah tujun Rasul Paulus nehken suratna man perpulungen kalak si tek i kota Roma. Si pemena guna mpebetehken perpulungen maka lit rencana Paulus guna reh ndahi perpulungen. Si peduaken guna meritaken Berita Si Mehuli. Adi sioge bindu 1-11 teridah maka Paulus berusaha merangkum ajaren-ajaren keselamaten i bas Yesus Kristus si enggo iberitakenna sedekah masa pelayanenna.

Si jadi ogenta sendah lit i teruh judul perikop “Lagu langkah kalak Kristen” (terj. BIMK, “Hidup untuk Allah”). Adi i bas Alkitab terj. TB-LAI lit dua judul perikop i bas bindu 12 enda, judul si pemena “Persembahan yang benar” benaken ay. 1-8, judul si peduaken “Nasihat untuk hidup dalam kasih” benaken ay. 9-21. Rikutken TB-LAI ndai, secara garis besar bindu 12 enda banci sibagi ku bas 3 bagin. Si pemena ay. 1-2 eme peralihen i bas ajaren-ajaren si sifatna dogmatis nari ku bas penerapan si sifatna praksis. Emaka i bas ay. 1-2 enda Paulus ngajuk perpulungen gelah ngelakoken kai si ngena ate Dibata selaku mahluk si rukur janah ola sempat ikuasai doni enda. Si peduaken ay. 3-8 Rasul Paulus ngerana kerna pemere-pemere Kesah (karunia-karunia Roh Kudus) si enggo ibereken Dibata ku tengah-tengah perpulungen, gelah sipergunaken alu mehuli guna kiniulin kula ni Kristus. Si peteluken ay. 9-21 Rasul Paulus ngerana kerna nggeluh sikeleng-kelengen bage pe perbahanen-perbahanen si mehuli si harus ilakoken erpalasken keleng ate Kristus.

Si jadi ogenta sendah ibenaken i bas ay. 8-11. Rikutken Pedoman Penafsiran Alkitab Surat Paulus kepada Jemaat di Roma i bas terbiten LAI nari, ay. 8 banci siterjemahken: “Kalau Allah memberikan kepada seseorang kemampuan untuk memberi semangat [kepada orang lain], ia harus sungguh-sungguh memberi semangat. Orang yang diberikan kemampuan untuk memberi sesuatu kepada orang lain harus melakukannya dengan murah hati. Orang yang diberikan kemampuan untuk memimpin harus melakukannya dengan penuh semangat. Orang yang diberikan kemampuan untuk menunjukkan kebaikan hati kepada orang lain harus melakukannya dengan gembira.” Arah terjemahen enda teridah maka pemere-pemere Kesah si enggo ialoken perpulungen e harus siaplikasiken alu mehuli guna kiniulin perpulungen bage pe guna kemulian gelar Dibata. Ertina ula sempat lit i je kepentingen-kepentingen si sifatna pribadi, pamrih, entah pe gelah dat puji-pujin i bas kalak si deban.

Ay. 9 ras 10 akap kami banci sipersada. Ay. 9 banci siterjemahken: “Janganlah berpura-pura di dalam mengasihi orang. Bencilah/buanglah yang jahat tetapi simpanlah dengan teguh dalam hatimu apa yang baik.” Ay. 10 banci siterjemahken: “Hendaklah kalian saling mengasihi dengan mesra sebagai saudara-saudara yang bersatu dengan Kristus, dan janganlah ragu-ragu menunjukkan rasa hormat satu sama lain.” Ay. 9-10 enda pengajuk Rasul Paulus man perpulungen gelah tutus (tulus) i bas ngkelengi sapih-sapih perpulungen ula sempat lit maksud-maksud si jahat i bas kita ngkelengi kalak si deban. Keleng ate Kristus harus jadi palas i bas sikeleng-kelengen sapih-sapih perpulungen sebab i bas keleng ate Kristus enggo lanai lit pembedaan-pembedaan, kerinana sederajat i lebe-lebe Dibata. Temasuk i bas saling menghormati sada ras si debanna, enggo lanai lit batasen antara tuan dan hamba.

Ay. 11 banci siterjemahken: “Janganlah bersikap malas, melainkan bekerjalah dengan rajin. Layanilah Tuhan dengan semangat yang menyala-nyala.”  I bas terj. Bhs. Karo, “Ula kam mekisat, tapi tutuslah erdahin. Ergiah-giahlah ukurndu i bas ndahiken dahin Tuhan.” Enda pengajuk Rasul Paulus man perpulungen gelah ndahiken kerina dahin-dahin si enggo ipercayaken Dibata alu tutus (rajin) ras ergiah-giah (semangat yang menyala-nyala). Kerina dahin i jenda labo terjeng dahin-dahin formal i bas perusahaan entah pe lembaga, tapi termasuk i je dahin-dahin non-formal bagi dahin-dahin i bas rumah tangga, i tengah-tengah lingkungen masyarakat, bage pe pelayanen i gereja. Ula sempat lit pembedaan antara dahin-dahin Tuhan, entah pe pelayanen i gereja, ras dahin-dahin si sifatna formal bage pe non-formal ndai, kerinana harus ilakoken alu tutus ras ergiah-giah.

Versi Audio silahkan klik : https://youtu.be/ZYn15tgOnSg

Pengkenaina

Erpalasken ogenta sendah lit telu hal si banci sirenungken. Si pemena, iajuk kam kerina Mamre gelah makeken pemere-pemere Kesah si lit i bas kam guna kiniulin perpulungen bage pe guna kemulian gelar Dibata. I bas si e tentuna harus leben isedari maka Dibata enggo mereken karunia-karunia Roh Kudus i bas dirinta. Adi enggo sisedari lit talenta i bas dirinta maka talenta e ula sibuniken tapi harus sipakeken guna kiniulin perpulungen bage pe guna kemulian gelar Dibata.

Si peduaken, iajuk kam Mamre gelah sikeleng-kelengen bage pe sihamat-hamaten sada ras si debanna alu tutus (tulus) erpalasken keleng ate Kristus. I bas si e tentuna sifat sidalih-dalihen harus sibeneken. Memang serayan entah pe pengurus harus jadi teladan i bas sikeleng-kelengen ras sihamat-hamaten, tapi perpulungen pe banci berinisiatif, pro-aktif, la nimai ikelengi entah pe ihamati makana ngekelengi ras ngehamati, sebab palas keleng ate i bas kita eme keleng ate Kristus si enggo leben engkelengi kita.

Si peteluken, iajuk kam kekelengen kami Mamre gelah ergiah-giah ukur (semangat yang menyala-nyala) ras tutus (rajin) i bas ndahiken kerina dahin si enggo ipercayaken Dibata man bandu. I bas kinitekenta, erdahin seri ras beribadah. Ertina ketutusen i bas beribadah harus teridah i bas kita ndahiken dahin kai pe si enggo ipercayaken Dibata man banta. I bas si e Paulus ngatakenca i bas Kol. 3:23, “Apa pun juga yang kamu perbuat, perbuatlah dengan segenap hatimu seperti untuk Tuhan dan bukan untuk manusia.” Kai si ikataken Rasul Paulus enda tuhu-tuhu jadi etos kerja Kristen si erbahanca negara-negara i Eropa ras Amerika jadi negara-negara si maju i bas bidang kai pe. 

Renungen si peteluken i datas akap kami sue ras tema i bas PA Mamre sendah “Mamre si tutus (disiplin).” I bas si e, si pemena lebe teklah maka ketutusen entah pe kedisiplinen rehna i bas Dibata nari, emaka melala pengajaren-pengajaren i bas Pustaka Si Badia si ngajuk kita gelah tutus entah pe disiplin i bas ngelakoken kerina si ngena ate Dibata. Si peduaken, adi enggo tek kita maka ketutusen ras kedisiplinen rehna i bas Dibata nari, marilah kita erlajar nggeluh alu tutus ras disiplin sue ras ajaren-ajaren i bas Pustaka Si Badia, khususna i bas ogenta sendah. Sebab ketutusen ras kedisiplinen labo ndabuh i bas langit nari tapi merupaken karakter entah pe etos kerja kristiani si harus ilatih terus-menerus. Enda akap kami menjawab tujun si pemena i bas PA-ta sendah. Si peteluken, marilah kita mengucap syukur atas semua pekerjaan yang sudah Tuhan percayakan kepada kita. I bas si e ula sempat lit pembedaan antara dahin-dahin pelayanen i gereja ras dahin-dahin sehari-hari. Kerina dahin harus sidahiken alu kualitas si seri guna kemuliaan gelar Dibata (Soli Deo Gloria). Enda akap kami menjawab tujun si peduaken i bas PA-ta sendah.

Melala tantangen i bas jamanta gundari arah media sosial nari, umpamana, game online, pinjaman online, judi online, ras kerina kemudahan-kemudahan i bas nggeluh secara hedonis entah pe mengutamaken kesenangen, tidak mau bekerja keras, la nggit erproses, rsd. I bas si e ula sempat Mamre terpengaruh. Pindolah gegeh i bas Dibata nari gelah ipengasupNa kam kerina Mamre nggeluh tutus ras disiplin sue ras tema ras tujun PA-ta sendah.