SUPLEMEN PA MAMRE GBKP TGL. 8 - 14 OKTOBER 2023

Pdt. Larena br. Sinuhadji (Nd. ReyRapha Tarigan)

HUT MORIA GBKP

Ogen : Kejadin 2:23-24

Tema : NGKELENGI NDEHARA

Tujun : Gelah Mamre :

- Meteh erti ndehara sebage pasangen si cocok man perbulangen

- Ngkelengi ndehara alu totalitas (perukuren, pengerana, ras perbahanen)

Penaruh

Rubia-rubia iciptaken Dibata jantan ras betina tujunna jelas guna berkembang biak. Selain si e, rubia-rubia iciptaken Dibata guna kelangsungen kegeluhen raduken ras tinepa si debanna i doni enda si saling bergantung sada ras si debanna, entah pe ekosistem. Manusia iciptaken Dibata alu tujun si istimewa. Manusia iciptaken Dibata labo terjeng guna erbahan kesusuren, tapi guna saling melengkapi ras sikeleng-kelengen i bas lembaga pernikahan entah pe perjabun. I bas kesempaten enda mulihi kita isingetken kerna tugas tanggung jawabta i bas perjabun eme sikeleng-kelengen sada ras si debanna.

Mpebagesi Ogen

I bas Kej. 2:18, ikataken Dibata niNa, “La mehuli adi manusia nggeluh sisada-sisada. Kubahanlah teman si cocok man bana guna nampati ia.” I bas terj. TB-LAI nina, “Tidak baik, kalau manusia itu seorang diri saja. Aku akan menjadikan penolong baginya, yang sepadan dengan dia.” Teman si cocok entah pe penolong yang sepadan, eme sesama manusia, labo rubia-rubia, sinuan-sinuan, entah pe tinepa si deban. Penolong si sepadan eme manusia guna saling melengkapi ras saling menyempurnakan. Emaka i bas ay. 22 ituriken maka itepa Dibata sekalak diberu arah tulan rang-rang manusia dilaki. I bas “tulan rang-rang” enda lit prinsip-prinsip kesetaraan dilaki ras diberu, diberu itepa Dibata guna ilindungi ras ikelengi. Si menarik i jenda, ikataken maka itaruhken Dibata manusia diberu enda man manusia dilaki. Mungkin i jenda nari rehna pemahamen maka “jodoh di tangan Tuhan” janah rusur sitotoken gelah datken jodoh, sebab tek kita maka teman geluh si mehuli rehna i bas Dibata nari.

Si jadi ogenta sendah ibenaken i bas ay. 23, nina, “Enda nge maka enggo cocok ras aku. Tulanna ibuat i bas tulanku nari, janah jukutna i bas jukutku nari. “Diberu” gelarna perbahan ia ibuat i bas dilaki nari.” I bas terj. BIMK nina “Ini dia, orang yang sama dengan aku -- tulang dari tulangku, dan daging dari dagingku. Kunamakan dia perempuan, karena ia diambil dari laki-laki” (dalam bahasa Ibrani kata untuk laki-laki adalah “Ish”, dan kata untuk perempuan adalah “Isha”). Enda ncidahkenca respon manusia dilaki si mehuli nandangi pemere Dibata man bana. Janah ayat enda pe ncidahkenca maka tuhu-tuhu cocok entah pe sepadan manusia diberu enda man manusia dilaki arah kata-kata i bas bahasa Ibrani nari. 

Janah ay. 23 enda iumputi ay. 24 nina, “Em sababna dilaki nadingken nande bapana, gelah ersada ia ras ndeharana, maka duana enggo jadi sada. I bas terj. TB-LAI nina “Sebab itu seorang laki-laki akan meninggalkan ayahnya dan ibunya dan bersatu dengan isterinya, sehingga keduanya menjadi satu daging.” Enda ayat si rusur sipake sebage palas perjabun kalak si tek sebab Dibata si netapkenca (bdk. Mat. 19:5; Mrk. 10:7-8; 1 Kor. 6:16; Ef. 5:31).

I bas ay. 18, 22, 23, ras 24 nari banci siantusi maka Dibata ersura-sura gelah manusia dilaki ras diberu lit i bas relasi saling menolong, saling melengkapi, saling mengasihi, ras saling memberi diri (intimasi) i teruh janji pernikahan antara perbulangen ras ndehara i lebe-lebe Dibata (bdk. Mal. 2:14).

Versi Audio silahkan klik : https://youtu.be/ZzdWBv-SJMI

Pengkenaina

GBKP secara kelembagaan mengakui perkawinan sebage salah sada bagin si penting i bas pengakun kinitekenna (Konfesi GBKP Bab XI Perkawinan). Perjabun kalak si tek i bas Konfesi GBKP labo terjeng guna berumah tangga, tapi sebage wadah (media) guna mewujudkan karya keselamatan Allah i tengah-tengah doni enda. I bas si e tentuna jabu-jabu kalak si tek i bas konteks GBKP, harus tuhu-tuhu jadi ingan si utama guna pendidikan religius si kedungenna menghasilken generasi si unggul guna mewujudkan karya keselamatan Allah i tengah-tengah doni enda.

PA-ta sekali enda mulihi ngingetken kam kerina kekelengen kami Mamre kerna padan perjabunndu, salah sadana eme ngkelengi ndehara. Secara khusus bahan PA-ta enda dalam rangka merayakan ulang tahun Moria GBKP 66 tahun tepatna i bas tgl. 16 Okt. 2023. Si pemena lebe si harus isingetken mulihi maka ugapa pe keadaan perjabunndu gundari, teklah kam maka ndeharandu eme pemere Dibata si cocok entah pe sepadan ras kam. Si peduaken, i bas ogenta sendah, janah ipertegas i bas Epesus 5:25 & 33 bage pe Kolose 3:19, maka hal si penting si harus ilakoken perbulangen eme ngkelengi ndeharandu. I bas kam ngkelengi ndehara enda palasna si utama tentu keleng ate Kristus. I bas si e maka banci tersehi tujun si peduaken i bas PA-ta sendah, ngkelengi ndehara alu totalitas (perukuren, pengerana, ras perbahanen).

Memang la lit perjabun si sempurna entah pe sue ras sura-suranta, melala kekurangen, la bagi ukur, rsd.-na. I bas si e pindolah gegeh i bas Dibata nari, sebab perjabun eme ketetapen Dibata man banta. Ertina Dibata pasti mereken gegeh, kesabaren, kengasupen guna saling mengampuni, mereken dalan pulah i bas persoalen-persoalen si terjadi i bas rumah tangga, rsd.-na.