SUPLEMEN PA MAMRE GBKP TGL. 29 OKT. - 4 NOV. 2023

Pdt. Larena br. Sinuhadji (Nd. ReyRapha Tarigan)

Ogen : Keluaren 23:6-8

Tema : MILIH PEMIMPIN SI PENTAR

Tujun : Gelah Mamre :

- Meteh kerna tempas pemimpin si mehuli ras si la mehuli

- Sedar maka kepentaren milih pemimpin nentuken kiniulin dirina, keluarga, bangsa ras negara

Penaruh

Enggo piga-piga kali kita ngerana kerna persiapen Pemilu 2024, baik pemilihan kepala daerah, pemilihan anggota DPRD - DPR, ras pemilihan presiden. I bas kesempaten enda erlajar ka kita kerna kriteria pemimpin si erkemalangen man Tuhan sue ras ogenta sendah.

Mpebagesi Ogen

Ogenta sendah lit i teruh judul perikop “Keadilen ras kinibujuren” (terj. TB-LAI, “Peraturan tentang hak-hak manusia”) secara garis besar ngerana kerna hal-hal praktis si arus ilakoken i bas kegeluhen si tep-tep wari guna menegakkan kebenaran dan keadilan. Kel. 23:1-9 masuk ku bas bagin Hukum-hukum Moral Religius si arus iwujudnyataken i bas kegeluhen bangsa Israel sebage bangsa si badia i bas perjanjin ras Dibata (bdk. Kel. 20-23).

Rikutken ogenta sendah kai saja si arus ilakoken bangsa Israel i bas rangka keadilen ras kinibujuren? Ay. 6 nina, “Berekenlah keadilen man kalak musil adi lit perkarana i bas pengadilen.” Terj. BIMK, “Perlakukanlah orang miskin dengan adil kalau ia datang mengajukan perkaranya ke pengadilan.” Si jadi fokus keadilen si pemena i jenda eme kalak musil, sebab kalak musil rusur jadi korban i tengah-tengah masyarakat, janah i bas kalak musil la lit i bas ia kuasa ras kinibayaken guna membela dirina sendiri. Fokus keadilen si peduaken eme pengadilen, harus tetap memperjuangken keadilen, kebujuren ras kebenaren.

Ay. 7 nina, “Ula bahan-bahan kesalahenna, janah ula muduh kalak si la ersalah, sabab la banci la Kuukum kalak si erbahan kejahaten si bage.” Terj. BIMK nina, “Jauhkanlah tuduhan palsu dan jangan menyebabkan orang yang tidak bersalah dihukum mati, karena Aku tidak membenarkan orang yang melakukan kejahatan semacam itu.” Ayat enda erkaiten denga ras pengadilen sebage lembaga si seharusna memperjuangken keadilen, kebujuren ras kebenaren. I bas kinatana rusur terjadi keputusen-keputusen si la adil, si salah jadi benar janah si benar jadi salah.  I bas si e Dibata enggo ngingetken maka lit ukumen man ise pe si memutarbalikken kebenaran ras keadilan.

Ay. 8 nina, “Ula aloken uang sogok, sabab uang sogok erbahanca kalak lanai ngidah si benar, janah perkara kalak si la ersalah ibalikken.” Terj. BIMK nina, “Jangan menerima uang suap, sebab uang suap itu membuat orang menjadi buta terhadap yang benar dan merugikan orang-orang yang tidak bersalah.” Kiniladilen i bas lembaga peradilen banci terjadi erkiteken kolusi ras nepotisme, tapi si rusur terjadi erkiteken ngaloken sogok. Sada perkara banci bernilai miliaran bahkan seh ku triliunan rupiah, umpamana. Terjadi tawar menawar antara hakim ras terdakwa i ja keadilen banci situkur alu sejumlah uang. I bas si e Dibata enggo ngingetken maka uang sogok erbahanca kalak buta, lanai ngasup ia ngidah si benar.

Versi Audio silahkan klik : https://youtu.be/Cyvpry6x3pI

Pengkenaina

PA-ta sendah i bas rangka persiapen Pemilu 2024 si irencanaken ilaksanaken i bas bulan Februari 2024. Ertina i bas waktu si enggo lanai ndekah radu ras kita milih ras nentuken pemimpin-pemimpin si berintegritas. Pemimpin-pemimpin si pang membela kebenaran ras pang menegakkan keadilen. Pemimpin-pemimpin si labo karbitan, entah pe mencapai puncak jabaten alu cara-cara instan. Pemimpin-pemimpin si labo menghalalkan segala cara guna ndatken jabaten entah pe kekuasaan. Pemimpin-pemimpin si lit cataten masa lalu erkaiten ras pelanggaran HAM, rsd. Romo Magnis Suseno i bas rangka ngajuk gelah ula golput i bas tahun 2014 pernah ngatakenca, “Pemilu bukan untuk memilih pemimpin yang terbaik, tapi untuk mencegah yang jahat berkuasa.” Ertina kerina kita ula sempat golput entah pe la mediate nandangi Pemilu 2024.

Tema i bas PA-ta sendah ngajuk kita kerina, khususna kam kekelengen kami Mamre gelah milih pemimpin si pentar erpalasken Kata Dibata. I bas si e tentuna genduari nari enggo ndarami info kerna rekam jejak calon-calon pemimpin i bas Pemilu 2024. Kata Dibata i bas kesempaten enda enggo ncidahken tempas pemimpin si mehuli eme pemimpin si pang memperjuangken keadilen, kebujuren, ras kebenaran, la nggit ngaloken sogok, ras berpihak man korban-korban kinilaadilen i tengah-tengah masyarakat. Enda menjawab tujun si pemena i bas PA-ta sendah.

Tujun si peduaken i bas PA-ta sendah, ngajuk kita kerina, khususna kam kekelengen kami Mamre gelah tuhu-tuhu mediate (peduli) nandangi Pemilu 2024. Mediate i jenda arus ka iumputi alu kepentaren i bas milih calon-calon pemimpin si kedungenna tentuna guna kiniulin man Mamre sendiri, keluarga, bangsa ras negara. Emaka gundari nari enggo ndarami informasi kerna calon-calon pemimpin tingkat daerah nari seh ku pusat, janah ula lupa sitotoken kerina proses Pemilu 2024 gelah banci erdalan alu dame, lancar, ras terpilih pemimpin-pemimpin si erkemalangen man Tuhan.