SUPLEMEN PA MORIA GBKP TGL. 15 - 21 OKTOBER 2023

Pdt. Larena Sinuhadji (Nd. ReyRapha Tarigan)

Megenggeng

Si Man Ogen : Daniel 6:1-10, 28

Tema : NGASUP NCIBALKEN DIRI

Tujuan : Gelah Moria :

- Meteh kinigenggengen Daniel i bas beradaptasi ras ncidahken integritasna

- Ngusih perbahanen (orat nggeluh) Daniel i bas ngalaken dunia sekuler (la seri ras doni)

Metode PA : Sharing Pengalaman

Penaruh

I bas paksa nandangi Pemilu enda rusur sibegi kata “pencitraan.” Maksudna, melala calon-calon pejabat si mendadak rajin blusukan, erbahan kegiaten-kegiaten amal, pesikap dalan si ceda, murah senyum, ramah, dermawan, rsd.-na. Engkai maka ikataken pencitraan? Erkiteken kiniulin si ilakoken e sifatna sementara, pura-pura entah pe lit maksud tersembunyi, eme gelah terpilih jadi kepala daerah, gelah terpilih jadi anggota DPRD, rsd. Kenca enggo terpilih kari enggo mulihken ku sifat semula, lanai mehuli, korupsi, rsd.-na.

Erti pencitraan situhuna mehuli, eme suatu usaha menonjolkan citra diri yang baik kepada publik. Tapi erkiteken enggo rusur sipake guna tujun si la mehuli bagi calon-calon pejabat ndai, guna tipu-tipu, emaka pencitraan enda ertina jadi negatif. Kalak Kristen situhuna memang harus ncidahken citra diri si mehuli sue ras peraten Dibata i bas Yesus Kristus. Ncidahken citra diri kristiani enda i bas bhs. Karo seri ras ncibalken diri. I bas bahan PA Moria-nta sekali enda, erlajar kita arah sosok Daniel, si tetap ngasup ncibalken dirina alu mehuli aminna pe ia arus tading i bas pembuangen Babil.

Mpembagesi Pengangkan Kerna Ogen

Kerna tokoh Daniel enda akap kami enggo kerina kita nandaisa. Janah mungkin enggo rusur sibegi turi-turinna benaken KAKR nari, khususna kerna turi-turin Daniel i bas lubang singa. Lit piga-piga informasi kerna Daniel si banci isehken i bas kesempaten enda guna menyegarkan kembali ingeten kerna Daniel. Daniel artinya: “Tuhan adalah  hakim.” Di Babil namanya diubah menjadi Beltsazar (Dan. 1:6-7). Pekerjaan: pimpinan politik dan nabi (Dan. 2:48; 5:10-12). Tempat kelahiran: Yehuda (Dan. 1:1-6). Tempat kematian: Babil. Fakta penting: Daniel menjadi pejabat tinggi (wakil raja) pada masa pemerintahan Nebukadnezar dan Darius (Dan. 2:48; 6:1-3). Beberapa peristiwa penting dalam hidup Daniel: Menolak makanan yang tidak sesuai dengan aturan Taurat (Dan. 1:6-7). Menafsirkan mimpi-mimpi Nebukadnezar (Dan. 2:1-49; 4:1-37). Mengartikan tulisan di dinding (Dan. 5:1-31). Dilemparkan ke dalam gua singa (Dan. 6:1-28). Menceritakan penglihatan-penglihatan (Dan. 7:1-12:13). Arah informasi singkat i datas teridah track record kegeluhen Daniel si termasuk ku bas tokoh Alkitab si tuhu-tuhu erkemalangen man Dibata.

Si jadi ogenta sendah lit i teruh judul “Daniel i bas lubang singa.” Ituriken i bas paksa pemerentahen Raja Darius, Daniel ras dua kalak si deban iangkat raja jadi wakil raja guna mperdiateken 120 gubernur i belang-belang kerajaan Darius. Erkiteken ndauh ulin pendahin Daniel asangken wakil-wakil raja si deban, ersura-sura Raja Darius guna ngangkat Daniel jadi penguasa kerajaan langsung i teruh Raja Darius. Erkiteken cian ate pejabat-pejabat si deban, erpala-palalah kalak enda kerina ndarami kesalahen-kesalahen Daniel. Tapi la terdat kesalahen Daniel sebab Daniel terteki i bas pendahinna janah la lit sitik pe ibahanna si salah ras si la bujur.

Erkiteken la idatken kesalahen kai pe arah pendahinna, erpekat kalak enda guna ndabuhken Daniel arah aturen agamana. Daniel eme sekalak si taat i bas erkiniteken man Dibata, emaka kerina si enggo iaturken i bas erkiniteken e ilakokenna alu tutus. Telu kali i bas sada wari erjimpuh Daniel ertoto man Dibata ngala kempak Jerusalem. Erkiteken si e, ibahanlah imbang-imbang Daniel ndai sada aturen maka kidekah 30 wari la banci ise pe si lit i bas kerajaan Darius mindo kai-kai pe (mungkin maksudna ertoto) man dibata-dibata seakatan man Raja Darius. Ise si melanggar iambekken ku  bas lubang ingan singa. Aturen enda jelas guna ndabuhken Daniel sebab ieteh imbang-imbangna maka Daniel tutus i bas ertoto man Dibata si isembahna.

Situhuna Raja Darius keleng atena nandangi Daniel tapi mungkin erkiteken tekanan-tekakan secara politis arah imbang-imbang Daniel maka terpaksa Raja Darius ngukum Daniel alu ibenterken ku lubang ingan singa. Tapi si menarik i bas proses enda, ikataken Raja Darius man Daniel nina, “Dibatandu si isembahndu alu patuh, IA-lah si mulahi kam.” Janah pepagina, ngata ka Raja Darius man Daniel si lit i lubang singa nina, “O Daniel suruh-suruhen Dibata si nggeluh! Ngasup kang Dibata si isembahndu alu tutus e ngekelini kam i bas singa-singa e nari?” Ertina pengaruh Daniel situhuna mbelin kel man Raja Darius seh makana iakui Raja Darius kerna kuasa Dibata si isembah Daniel. 

Kedungenna Daniel pulah i bas bahaya nari. Tuhu-tuhu meriah kel Raja Darius, janah ibahanna surat man kerina bangsa, suku, ras cakap i doni, si isina perentah gelah kerina kalak mbiar ras mehamat man Dibata si isembah Daniel, nina, “IA kap Dibata si nggeluh rasa lalap. KinirajanNa rasa lalap la termasapken, kuasaNa rasa lalap la erkeri-kerin. IA kap si ngekelini ras si mulahi manusia; ibahanNa tanda si mejin ras tanda kuasa, subuk i surga bage pe i doni enda. I bas singa si merawa nari Daniel ipulahiNa.” Enda sada pengakun erkiteken kegeluhen Daniel si jadi saksi man sekelewetna kerna Dibata si isembahna.

Versi Audio silahkan klik : https://youtu.be/sfcDRXqxNtw

Pengkenaina

Beradaptasi i bas sada sisi mehuli, emaka lit kuan-kuan si ngatakenca, “Di mana  bumi dipijak di situ langit dijunjung.” Tapi i bas kita beradaptasi tidak boleh kita larut di dalamnya. Ertina, boleh kita beradaptasi tapi jangan sampai kehilangan jati diri entah pe citra diri kita. Daniel jadi teladan si nyata, i ja ngasup ia beradaptasi tapi tidak kehilangan jati dirinya entah pe kehilangan citra dirinya sebage kalak si erkiniteken man Dibata.

I bas kesempaten enda iajuk kita Moria gelah beradaptasi alu citra diri entah pe jati diri si paguh. Tetap berpegang teguh pada prinsip-prinsip iman kristiani tetapi tetap terbuka dan mau bergaul dengan lingkungan sekitarnya, bahkan dengan yang tidak seiman sekalipun. Adina i bas tujun PA-ta sendah ikataken nina, tetap beritegritas. Enda tentu labo hal si murah, janah melala tantangen, sebab enggo pasti kita ihadapken alu pilihen-pilihen antara tetap gaul tapi kehilangan integritas atau dijauhi teman-teman erkiteken mempertahanken prinsip-prinsip kebenaren sue ras Kata Dibata. I bas si e tentuna harus lit lebe kiniteken si paguh bagi Daniel. Kiniteken si paguh e erbahanca Daniel megenggeng ngalaken kerina resiko i bas ia mempertahanken prinsip-prinsip kebenaran i tengah-tengah lingkungenna.

Uga carana maka lit i bas kita kiniteken si paguh? Enda erkaiten ras kedekatan relasi dengan Tuhan Yesus. Kedekatan relasi enda banci terjalin arah pertotonta si konsisten dan terus-menerus. Rende muji Dibata. Ketutusenta erlajar Kata Dibata setiap saat. Setia i bas ngikuti ibadah-ibadah gereja, rsd.-na. Emaka i bas kesempaten enda mulihi kita isingetken kerna relasinta ras Dibata sebab e si jadi kunci kinigenggengen Daniel i bas ngalaken kerina tantangen i bas kegeluhenna. Tantangen i bas jaman gundari enda enggo semakin mbue, khususna arah media sosial. Enggo melala contoh-contoh kalak si terjerat judi online, terjerat pinjaman online, kecanduan game berbayar, kecanduan pornografi, penipuan-penipuan online, rsd.-na. I bas si e harus Moria metenget, jangan sampai tergoda hal-hal si sifatna instan ras hedonis. Dibata si mpegegehi Moria GBKP i bas ncibalken dirina selaku pernanden si enggo ngaloken keselamaten i bas Yesus Kristus.