SUPLEMEN PA MAMRE GBKP TGL. 22 - 28 OKTOBER 2023

Pdt. Larena br. Sinuhadji (Nd. ReyRapha Tarigan)

Ogen : Perb. Rasul 5:26-42

Tema : ERSAKSI JADI KESEMALEN GELUH

Tujun : Gelah Mamre :

- Meteh maka ersaksi arus jadi kesemalen geluh kalak si erkiniteken man Dibata

- Muat bagin i bas dahin kesaksin i bas gereja

Penaruh

Enggo piga-piga kali radu ras kita membahas kerna ersaksi, subuk i bas PJJ bage pe i bas PA-PA Kategorial. Memang tep-tep tahun tema kerna ersaksi enda jadi renungen ras pembahasen gelah kerina ngawani perpulungen GBKP nginget maka ersaksi eme salah sada perentah Tuhan Yesus si arus ilaksanaken. I bas kesempaten enda mulihi kita erlajar kerna ersaksi rikutken ogenta sendah.

Mpebagesi Ogen

Sope perikop si jadi ogenta sendah, ituriken maka Imam-imam si Mbelin ras kalak Saduki erbahan tindaken main hakim sendiri erkiteken cian atena nandangi Rasul-rasul Tuhan si enggo reh teremna pengikutna. Emaka itangkap ras itamaken ku bas penjara si mbelin Rasul-rasul e ndai. Tapi asum berngi reh Malekat Tuhan nalangi pintun penjara dingen itegu Malekat e Rasul-rasul e ndarat alu pesan gelah tetap Rasul-rasul e meritaken kerna kegeluhen si mbaru man kalak si enterem i bas Rumah Pertoton. Kai si nipesanken Malekat Tuhan idalanken Rasul-rasul e.

Kenca enggo ieteh Imam-imam si mbelin, maka ibahanna persidangen guna nyidangken Rasul-rasul e. Kesalahen si idakwaken man Rasul-rasul e nina Imam si Mbelin erkiteken Rasul-rasul e la patuh. Enggo pe ilarang guna ngajar i bas gelar Yesus tapi terus denga Rasul-rasul e ngajar ras reh serserna kalak Yerusalem si megi pengajaren Rasul-rasul e. Bahkan pang Rasul-rasul e ngatakenca maka kematen Yesus erkiteken Imam-imam si Mbelin e.

Alu pang Petrus ras Rasul-rasul si deban ngaloi maka Rasul-rasul e mbiar man Dibata asangken man manusia maka tetap atena nehken pengajaren i bas gelar Yesus. I ja Dibata enggo ngangkat Yesus ras mereken kuasa man baNa guna jadi Raja ras Penebus, gelah kalak Israel jera ras dosa-dosana ialemi Dibata. Kenca enggo ibegina kai si ikataken Rasul-rasul e, reh merawana peserta sidang janah ibunuhna atena Rasul-rasul e. Tapi kepeken lit sekalak anggota sidang si tedis guna ngerana, gelarna Gamaliel. Ia golongen Farisi ras sekalak Guru Undang-undang si pernah jadi guru Paulus (Perb. Rasul 22:3). Gamaliel ertina “upah yang dari Allah.” Ia anak Simon, kempu Hilel, Doktor Ilmu Hukum ras anggota Sanhedrin eme kap Mahkamah Agung Yahudi. Gamaliel tuhu-tuhu ihamati seh makana ia si pemenana ibereken gelar kehamaten sebage “rabban” entah pe “guru kami” si ganjangen asangken “rabbi” entah pe “guruku.” Banci ikataken kai si ilakoken Gamaliel e tuhu-tuhu la menguntungken dirina janah mbelin kel resiko si mungkin ialokenna (la iakui ras ipedarat i bas kelompokna nari, reputasina tercoreng sabab berbeda ras kelompokna, la nari ihamati entah pe icabut gelar kehamatenna, ikucilken, rsd.). Tapi Gamaliel tetap pang ngataken si benar. 

Piga-piga hal si ilakoken Gamaliel :

1. Nuruh Rasul-rasul e ndarat gelah ula ibegina secara langsung adi kin lit bahasa si kurang pas itujuken man Rasul-rasul e.
2. Mereken usul man peserta sidang gelah manjar-anjar erbahan keputusen nandangi Rasul-rasul e.
3. Mereken contoh kerna ajaren-ajaren si pernah bengket i tengah-tengah bangsa Israel si kentisik ngenca entah pe la banci bertahan ndekah. Si pemena, Judas. I ja ikataken ia sekalak si mbelin ras pengikutna lit 400 kalak. Tapi kenca ia ibunuh kerina pengikutna e merap janah pergerakenna pe ngadi. Je nari reh ka si peduaken, Judas i Galilea nari. Ibabaina kalak si nterem memberontak. Ia pe ibunuh janah kerina pengikut-pengikutna merap janah pergerakenna pe ngadi. Emaka usul Gamaliel, ula ugapa pe ibahan nandangi Rasul-rasul e. Pelepas saja, sabab adi i bas manusia nari kin ajarenna, masap nge pagi. Tapi adi i bas Dibata nari, labo ise pe si banci ngolangisa. Banci jadi kita ngelawan Dibata. Ras kai si ikataken Gamaliel iikutken peserta sidang.

Versi Audio silahkan klik : https://youtu.be/eIQbU7f42nE

Pengkenaina

Tema ras tujun i bas PA-ta sendah ngajuk kita kerina, khususna kam kekelengen kami Mamre gelah terus erksaksi, bahkan ersaksi arus jadi kesemalen geluh.  Rasul-rasul Tuhan ras Gamaliel jadi usihen i bas ersaksi, pang ia nuriken ras ndalanken kebenaren, amin pe mbelin resiko si mungkin ialamina. Rasul-Rasul Tuhan lebih ngikutken Tuhan asangken manusia. Aminna pe enggo ilarang guna bersaksi tetap idalankenkenna erkiteken mbiaren rasul-rasul e Tuhan asangken manusia. Bage pe Gamaliel banci jadi usihen. I bas jabatenna selaku guru si tuhu-tuhu ihamati, Doktor Ilmu Hukum, ras anggota Mahkamah Agung Yahudi, tuhu-tuhu idalankenna alu mehuli bagi semalna, la erayo-ayo i bas muat keputusen, ise pe adi berhak datken keadilen pasti ibelana. Bage pe i bas perkara Rasul-rasul enda.

Rusur lit si ngatakenca maka kita enda “surat Kristus,” ertina, ku japa pe kita lawes seharusna kerina kalak nandai kita sebage pengikut Kristus. Labo terjeng iidah kalak kalung salib si ipake kita, tapi tuhu-tuhu arah kerina pengkebet geluhta mencerminkan Yesus Kristus. Ersaksi kerna keselamaten i bas Yesus Kristus seharusna ersada ras kai pe si idahiken kita, ersada ras jabaten kai pe si lit i bas kita, ertina tanda-tanda keselamaten i bas Yesus Kristus tuhu-tuhu lit i bas kita janah banci igejapken ise pe si ndeher ras kita. Em akap kami maksud i bas tujun si pemena PA-ta sendah, gelah Mamre meteh maka ersaksi arus jadi kesemalen geluh kalak si erkiniteken man Dibata.

I bas piga-piga gereja, dahin ersaksi (marturia) ipersada ras dahin pelayanen (diakonia) sebab memang i bas Perb. Rasul 2:44-45 teridah maka arah gaya hidup ber-diakonia enterem kalak akhirna tertarik guna bergabung ras komunitas Kristen paksa si e. Zending Belanda pe nai masuk ku tengah-tengah masyarakat Karo arah karya-karya diakonia i bas bidang kesehatan, pendidikan, ras ekonomi. I bas perkembangenna Gerejanta pe terus mengembangken karya-karya diakonia bage pe marturia. Lit geraken PI ke dalam ras PI ke luar, bage pe melala dahin-dahin pelayanen si banci ikategoriken sebage dahin-dahin ersaksi, umpamana, rende muji Tuhan, kerja sama ras media massa (TV, radio), perkunjungan ku penjara, perkunjungan ku ingan-ingan pengungsian adina lit bencana i bas daerahta, rsd.-na. Genduari enggo semakin melala metode-metode PI si banci ilakoken secara pribadi bage pe kelembagaan, umpamana berbagi ayat firman Tuhan entah pe kata-kata motivasi melalui grup-grup WA bage pe i bas status-status medsos-ta (Instagram, facebook, twitter, rsd.), berbagi video-video lagu-lagu rohani, kata-kata motivasi, klip-klip pendek rohani i bas YouTube entah pe TikTok, rsd.

I bas si e man bandu kerina Mamre si ikelengi kami, mari radu ras ikut muat bagin i bas kegiaten-kegiaten ersaksi i bas Gerejanta masing-masing. Adina lenga lit, Mamre banci ngusulken program-program kesaksian si banci ilaksanaken Mamre bage pe Runggun. Dibata si mpengasup kita kerina ersaksi kerna keselamaten i bas Yesus Kristus.