SUPLEMEN PA MORIA GBKP TGL. 5 - 11 PEBRUARI 2023

Pdt. Larena Sinuhadji (Nd. ReyRapha Trg.)

Ogen : Efesus 2:4-10

Tema : NGIDAH ULIH DAHIN SI MEHULI

Tujun : Gelah Moria

- Meteh maka lias ate Dibata si enggo ialokenna mpengasup ia ngelakoken dahin si mehuli guna tinepa

- Nuriken ulih si mehuli si enggo idahiken guna tinepa

Pengantar

Seorang penjahat kelas berat ivonis hukumen mate. Tapi sope ukumen mate ilakoken, sang penjahat ngaloken grasi arah presiden nari si ebahanca ia bebas. Statusna, la nari kalak terhukum tapi kalak bebas. Enggo pasti la tanggung riahna ukurna. Perubahen status si terjadi labo erkiteken penjahat e ngelakoken kiniulin, tapi erkiteken presiden mereken kebebesan man si penjahat. Bage me status kalak Efesus asum Paulus nulisken suratna, termasuk kita. I bas paksa si lewat, erkiteken salahta, dosa-dosanta mate pertendinta. Nai kita nggeluh rikutken sura-suranta saja, janah sidalanken si sentudu ras sura-sura kulanta ras ukurta. Sue ras biakta, kita pe bali ras kalak si deban, patut ngenanami pernembeh ate Dibata (ukumen Dibata). Tapi Tuhan mulahi kita, selamatkenNa kita. Arah si enda me mabai kita tetap ngataken bujur man Tuhan ras icidahken arah pengkebet geluhta arah kita terus erbahan si mehuli.

PA-nta sendah mabai kita guna mengevaluasi dahin-dahin si mehuli si enggo silakoken khususna si berkaiten ras kreatif merawat lingkungen, ras kai ulihna man banta bage pe sekelewetta.

Pembahasen Bahan Ogen

Judul perikopta “I bas kematen nari ku kegeluhen” (bhs. Ind., “Semuanya adalah kasih karunia”). Adi siperdiateken bas judul Bahasa Karo maka lit teridah perubahan status, i bas kematen ku kegeluhen.

Ay. 4 ibenaken alu kata “tapi” (Ind. “tetapi) seh kel pentingna. Kata “tapi” mengkontrasken keadaan manusia si mate pertendinna, si iperbudak dosa ras ngenanami pernembeh ate Dibata ras perkuah ate Tuhan si mbelin. Kalimat, “tapi perkuah ate Dibata” e me sada kabar sukacita si ncidahken uga belinna  perkuah ate Tuhan. Inisiatif keselamaten e reh i bas Dibata nari, labo bekas perbahanen manusia.

Kai si ilakoken Dibata? Ipegeluh Dibata kita (Allah menghidupkan kita - ay. 5), Ipekeke Dibata kita ras Kristus (Allah membangkitkan kita - ay. 6), ras ipekundulNa kita ras Ia i bas ingan si meganjang (Allah memberi kita tempat di surga (ay. 6). Telu hal enda terjadi melalui ras i bas Yesus Kristus. Ertina, erkiteken tek ras ersada kita ras Kristus maka banci sialoken perkuah ras keleng ate Dibata si mbelin e. Alu tangkas Paulus ngatakenca maka keselamaten e jadi labo erkiteken perbahanen manusia, tapi pemere Dibata, labo ulih pendahin manusia, e maka labo lit dalanna ise pe muji bana. Jadi labo erkiteken kiniulin, kesalehan, amal manusia tapi semata perkuah ate Tuhan. 

Keselamatan yang hanya diperoleh hanya oleh dan di dalam Yesus Kristus. 
Alu bage jelas, maka lias ate Dibata si enggo sialoken mpengasup kita ngelakoken dahin-dahin si mehuli si enggo leben irencanakenNa, gelah sidahinken (ay. 10). Sabab sope kita ngaloken perkuah ate Dibata, mate pertendinta si erbahanca sura-suranta ngelakoken si la mehuli. Tapi erkiteken perkuah ateNa, Kesah Si Badia tetap erdahin mpelimbarui geluhta si mpengasup kita ngelakoken dahin-dahin si mehuli.

Pengkenaina

Tema, “Ngidah ulih dahin si mehuli”. Usaha tidak pernah membohongi hasil. Ertina, ulih entah hasil erkawiten ras cara silakoken kita bas ndahiken dahin e. Adi mehuli silakoken, semalna si mehuli ka nge pagi dungna jadi. Oratna, adi enggo sibiasaken ndalanken si mehuli, maka enggo jadi biakta entah karakterta. 

Tahun 2022 Moria iajuk guna mpekena-kena kegeluhen, kegeluhen si erkawiten ras tinepa (alam). Tema Sasaran Pelayanen thn. 2022 “Kreatif merawat lingkungen”. Sepanjang tahun 2022 kita iajuk, ipersingeti guna banci muat bagin i bas mpekena-kena kegeluhen alu erbage aksi si banci silakoken. Enggo melala silakoken kita subuk secara pribadi, keluarga bage pe Kategorial Moria. Rumahta melala enggo sisuani sinuan-sinuan walaupe pekarangen kitik. Asa bancina sikurangi pemaken sampah plastik (maba ingan inemen sendiri, maba kantong belanja asum belanja). Hemat energi, rsd. Persoalenna, kurang kita konsisten ngelakoken, banci jadi erkiteken lenga bo sibiasaken. 

Walaupe tema sasaran pelayanen tahun enda enggo berganti tapi semangat kreatif merawat lingkungen arus terus-menerus sidalanken. Benaken, alu rukur si mehuli. Kita tinepa Dibata si mbaru si enggo iberekenNa kesahNa erdahin bas kita. Medak erpagi-pagi, sipindoken man Tuhan gelah tetap rukur mehuli kita, sada wari 24 jam. Je nari, sidahiken kerina si mehuli si enggo siukuri melalui tindaken nyata. Secara khusus siberkaiten ras kreatif merawat lingkungen, membawa tumbler (ingan inemen), mengurangi minuman kemasan, membawa kotak makanan, hemat listrik, hidup minimalis, belanja enggo sibaba kantong belanjata sendiri, hemat air ras melala denga si deban. Mari mulai dari diri sendiri, mulai dari hal kecil, tetap konsisten.