SUPLEMEN PJJ GBKP TGL. 12 - 18 PEBRUARI 2023

Pdt. Larena Sinuhadji (Nd. ReyRapha Tarigan)

Perpulungen e me Kula Kristus (Efesus 1:22-23)

Konfesi GBKP BaB IX : Gereja

Salah sada metafora si ipake Paulus si ncidahken kerna perpulungen e me “Kula ni Kristus”. Menarik asum pake Paulus gambaren kula, sabab kula mbue ring-ringna. Sangat kontekstual dengan jemaat si mbue erbagena. Setiap ring-ring lit fungsina si berbeda-beda, tapi sada kula (1 Kor. 12:12). Bage pe Paulus ngatakenca i bas Roma 12:4-5 maka sada kula mbue ring-ringna. Setiap ring-ring e me bagian kula Kristus. Labo kerina ring-ring seri fungsina; lit sebage tan, mata, nahe, cuping, rsd. Tapi sada hal si penting, kerina ring-ring e seri ergana ras pentingna, erkiteken kula la mungkin erdahin adi sada ring-ring saja la berfungsi entah sangana sakit. Ertina, setiap anggota butuh anggota si deban. Emaka jelas, Pustaka Si Badia menggambarken hubungen si unik i bas pelayanen. Labo kita dilo Tuhan guna ndahiken kerina dahin pelayanen seorang diri, tapi saling melengkapi, saling mendukung ras bersinergi. Gelah dahin pelayanen e reh sikapna sidahiken.

Surat Paulus man Perpulungen Efesus, ituliskenna asum Paulus i bas Penjara Roma erkiteken kiniteken ras kesetianna i bas pembarken Kata Dibata. Tujun surat enda e me mpegegehi kiniteken perpulungen paksa si e gelah ola terpengaruh praktek penyembahen dewa Yunani ras praktek penyembahen man Kaisar. Gelah perpulungen tetap nggeluh ersada ras Tuhan, si mpengasup perpulungen tetap ndalanken si ngena ateNa.

Sada keriahen ukur si mbelin si igejapeken Paulus asum begina berita maka Perp. Efesus si pernah ilayanina kurang lebih 3 tahun (Perb. 20:31) alu dem kesabaren, kesungguhan hati, ras mbue pe tantangen bas darat nari (Perb. 20:18-21; 33-35),  luar biasa pertumbuhenna bas kerina dampar. Bertumbuh i bas erkiniteken man Tuhan Yesus Kristus, ras mbelin kekelengenna man kerina anak-anak Dibata (Ef. 1:15), Paulus la erngadi-ngadi ngataken bujur man Tuhan Dibata ras ertoto guna perpulungen e.

Ibenaken i bas ay. 17 nari Paulus ertoto man Tuhan guna Perpulungen Efesus. Sada lebe isi pertotonna, gelah ibereken Tuhan Kesah Kepentaren ras ipetangkas Dibata diriNa man perpulungen e gelah itandai perpulungen e Dibata. Si peduaken, gelah italangi Tuhan pusuh peraten perpulungen Efesus gelah terang pengangkanna gelah tetap erpengarapen man Tuhan, bage pe gelah ieteh perpulungen e seh kel buena erta-erta si mulia si isikapken Dibata man anak-anakNa. Bage pe gelah ieteh perpulungen e maka seh kel belinna kuasa Dibata erdahin i bas kita si tek man Kristus. KuasaNa si ibereken man banta ndauh ganjangen asangken kuasa kegelapen, kuasa pemerentah ras pangkatna ganjangen asangken kerina pangkat si terbelasken subuk i bas paksa enda bage pe pagin. Ras i bas ay. 22-23 i je itulisken Paulus, maka Dibata namaken kerina sinasa lit ku teruh tapak-tapak Kristus. 

Ertina, kuasa Kristus beliden asangken kai pe. Janah enggo ibereken Dibata kekuasaan man Kristus jadi kepala i bas kai-kai pe. Perpulungen e me kula Kristus, janah kula e me sikuhi Ia (Alkitab BIS nina, “Jemaat adalah tubuh Kristus, disempurnakan oleh Dia yang menyempurkan segala segala sesuatu di mana pun juga”). Jemaat menjadi sempurna karena dipenuhi oleh Kristus. Kristus kap takal perpulungen, Ia si merentah ras ngaturken kegeluhen kalak si tek. Ia Dibata man kerina kalak si tek.

Si menjadi spesial, perpulungen labo i teruh tapak-tapak nahe Kristus, tapi perpulungen e me kula ni Kristus. Jemaat si pelain-lain e sebage bagin i bas kula ni Kristus ras Kristus sendiri sebage Kepalana. Enda ertina, perpulungen arus tetap tunduk man Kristus ras sesama jemaat si pelain-lain e, arus tetap saling siergan, saling memperhatikan, layakna ring-ring i bas sada kula (1 Kor. 12:12-). 

Konfesi GBKP BAB IX kerna Gereja : 

• Gereja adalah persekutuan orang percaya yang dipanggil menjadi milik Allah dan Yesus Kristus menjadi kepalanya, terus menerus diperbaharui oleh Roh Kudus menjadi garam dan terang dunia.
• Gereja dipanggil untuk melakukan Tri-Tugas demi mewujudkan jemaat yang misioner untuk memproklamasikan nilai-nilai kerajaan Allah yang tampak dalam kehidupan Yesus yaitu : cinta kasih, keberpihakan kepada yang miskin, lemah dan terpinggirkan untuk menegakan kebenaran dan keadilan serta mampu bersifat positif, kreatif, kritis dan realistis terhadap nilai-nilai dunia.

Ertina, tugas Gereja seh kel mulia ras mbelinna. La mungkin tugas e hanya idahiken Pengurus Gereja (Pdt./Pt./Dk., Pengurus Kategorial, entah PJJ) enggo pasti terbatas. Perpulungen si pelain-lain usia, gegeh, kengasupen finasial, talenta, banci bekerja sama saling bersinergi ndahihken dahin si mehuli. Adi Kristus Takalna, berarti siusih Kristus, siteladani biak Kristus ras tetap erpenggurun kita man Kristus. Mbue hal si banci sidahiken subuk i tengah perpulungen, nehken Diakonia, mpegegehi kalak si deban, ikut terlibat i bas pelayanen (Tim Doa, Tim PRT, Tim Musik, Singers, Tim Diakonia, rsd.), bage pe missi Gereja ku darat subuk secara organisasi bage pe perpulungen, asum terjadi bencana Gereja terpanggil guna nehken kekelengen, terjadi ketidakadilan ketidakbenaran Gereja hadir menyuarakan suara kebenaren bagi si enggo ilakoken Moria GBKP piga-piga tahun si lepas (menghentikan judi, dan pemimpin di Kab. Karo si ndalanken tugasna alu mehuli). Ertina melala hal si banci silakoken adi tetap kita ersada ras Tuhan bage pe ersada, sada ras si debanna, i tengah-tengah perpulungen.