SUPLEMEN KHOTBAH MINGGU GBKP 29 JANUARI 2023

MINGGU EPIPHANIAS IV

Pdt. Larena br. Sinuhadji (Nd. ReyRapha Tarigan)

Invocatio : “Lias ateNa e ngajari kita nadingken kegeluhensi la ngena ate Dibata ras sura-sura doni, gelah nggeluh kita ngkuasai dirinta, bujur dingen sisembah Dibata alu kegeluhenta i doni enda” (Titus 2:12)

Ogen : Keluaren 24:12-18 (Tunggal)

Khotbah : 2 Korinti 3:1-6, 18 (Responsoria)

Tema : PERPULUNGEN KAP SURAT KRISTUS

Kata Penaruh 

Surat e me kap salah sada alat komunikasi kita ras kalak si deban, banci isina mereken informasi (keterangen), ketedehen ate, harapan entah pe tanggapen sue bagi si iarapken penulis. Arah surat si ibereken banci sieteh kai maksud entah tujun penulisna. Terlebih adi jelas tulisenna, kata demi kata, titik koma, semua tanda baca, alu mehuli banci sipahami. Cuma adi genduari enggo jarang kalak berkirim surat.

Arah surat Paulus nehken pengajarenna man perpulungen, sope ia reh secara langsung. Arah surat, Paulus mereken pengajaren, persinget, motivasi termasuk teguren. Secara khusus, surat 2 Korinti itulis asum hubungen Paulus ras perpulungen Korinti mengalami keretaken, erkiteken lit piga-piga kalak perpulungen nerang Paulus, bahkan meragukan kerasulenna. Tapi Paulus tetap ncidahken atena metedeh nandangi persadanna mulihken ras perpulungnen. Labo isinik-siniken Paulus tapi merawa Paulus, menegur jemaat dengan keras, piah dungna erbahanca sedar piga-piga anggota jemaat e, janah hubungenna pe mehuli mulihken.

Penjelasen Bahan Ogen

Musa i datas deleng Sinai. Musa isuruh Tuhan jumpai Tuhan i Sinai gelah ibereken Tuhan dua lembar papan batu si isina kerina undang-undang si enggo isuratken Tuhan guna pengajaren man bangsa Israel. Asum Musa i deleng Sinai, Harun ras Hur si jadi gancih guna memipin bangsa Israel. Tuhan reh ku datas deleng i bas terang si ersinalsal. 

Penjelasen Bahan Khotbah

I bas perikopta si ibere judul “Pelayanen i bas iketen padan si mbaru” (pelayanan-pelayanan perjanjian yang baru), lit piga-piga poin si itekanken Paulus man perpulungen:

1. Pelayanen si isehken Paulus ras timna ilakoken alu tulus ras motivasi si benar, labo daramina pujian manusia, kehormaten manusia. Berbeda ras guru-guru (nabi-nabi) palsu si kin sura-surana melayani untuk uang, guna popularitas (ay. 1). Jelas kel igejapken Paulus, maka ia mampu melayani labo erkiteken gegeh beluhna tapi pertolongen Tuhan. Rasul Paulus ras timna tidak sedikitpun membanggakan diri (mencuri kemulian Kristus) ketika melakukan pelayanan dan berhasil membangun jemaat. (Tapi pang kami ngataken si enda erkiteken kengasupen kam si rehna i bas Dibata nari. Ia me si erbahanca kami ngasup jadi si erdahin i bas iketen padan si mbaru). Tuhan melalui Roh Kudusnya yang memampukan Paulus untuk melayani.
2. Man Paulus, surat pujiannya (hal yang membanggakan dirinya) i bas pelayanen e me kap perpulungen e sendiri. Lit perubahen sifat, perubahen sikap (karakter) i bas diri jemaat terlebih kesetian man Kata Dibata. Kam kap surat kami, si tersurat i bas pusuh kami si banci ieteh dingen ioge kerina jelma. Enggo terang maka kam kap surat Kristus si isuratkenNa arah pendahin kami. Surat e la itulis alu tinta, sabab adi tulisen tinta banci luntur (masap) tulisen e. Entah pe itulis i bas papan batu banci ka pecah (hancur). Tapi itulis alu kesah Dibata si nggeluh. Iketen padan si mbaru e biakna labo biak tulisen tapi biak kesah. Iketen si ndekah, e me undang-undang maba kematen sebab la lit kita si sempurna. Tapi iketen padan si mbaru si biakna kesah, e me perkuah ate i bas Tuhan Yesus Kristus nari maba keselamaten man banta, maba kegeluhen.
3. Kerina kita si enggo ngaloken berita keselamaten (tek man Kristus) tugasta mbincarken sinalsal kemulian Tuhan. Kemulian si reh i bas Tuhan nari Kesah, ngobah kita reh dekahna reh muliana, seh maka kita dungna segambar ras Tuhan. Terang Kristus si lit bas kita la banci itutupi. Berbeda kel asum Musa enggo jumpa ras Tuhan, ayona ersinalsa, perban bangsa Israel mbiar natap Musa, Musa menyelubungi ayona, nutupi ayona (oge ay. 13-15).

Pesan Firman Tuhan

1. Semua kita ipake Tuhan guna melayani, labo hanya Pdt./Pt./Dk., terlebih i bas tahun enda enggo sibenaken jemaat menjadi pelaku aktif i bas pelayanen. Ola lit kita si mencuri kemulian Tuhan, silakoken pelayanen e alu motivasi si la tulus. Gelah popular. Emaka ‘di kenca la diate kalak, kurang iergai, mbeceng kita. Slogan BIN (Badan Intelejen Negara) nina, “Ketika berhasil tidak dipuji, hilang tidak dicari, gagal siap untuk dicaci maki”.
2. Kita, kam ras aku, desken surat si banci ioge kerina kalak. Uga cara geluhta, sikapta, perbahanenta, banci idah kalak. Kita sebage surat Kristus si nggeluh si la itulis alu tinta si banci luntur, magem warnana. Bas gereja sikap, darat gereja la nari teridah kita sebage pengikut Kristus. La itulis i bas papan batu si banci pecah, tapi Kesah Si Badia. Roh Kristus erdahin i bas geluhta, si memimpin geluhta, si ngajari kita ndalanken si ngena ate Tuhan, kesah Tuhan si tetap mpelimbaru geluhta.
3. Jadilah kita surat pujian, si maba kemalemen ate man kalak si deban, ula surat peringaten, surat kecamen, apalagi surat hutang. 

Sepanjang seminggu kita enggo itata mulihi, kai si perlu ipesiakap i bas geluhta arah Pekan Penatalayanen, gelah siap melayani sepanjang tahun enda, ikut ate ku sada. Tetap semangat ndalani wari-wari kegeluhenta. Taat (setia) itu adalah pilihan hidup kita, labo bakat (talenta), mindo tetap penampat i bas Tuhan nari.