SUPLEMEN PA MORIA GBKP TGL. 12 - 18 PEBRUARI 2023

PA HDS 1 I NEGARA TAIWAN NARI

Pdt. Larena Sinuhadji (Nd. ReyRapha Tarigan)

Ogen : Epesus 1:15-19 

Tema : Enggo Ku Begi Kerna Kinitekenndu

Tujun : Gelah Moria :

- Meteh kerna Paulus si tetap mesikel megi berita kerna kiniteken perpulungen

- Ermeriah ukur nandangi berita kerna kegeluhen kalak si tek

Bena Kata

Teknologi informasi i bas paksa genduari seh kel nampati kita meteh kerna kondisi (keadaan) keluarganta, sahabat, teman meriah subuk si ndauh bage pe si ndeher. La pe siteloponi guna nungkuni keadaanna, mekatep Facebook entah Instagram ipake sebage salah sada informasi kegiaten si ilakokekenna, termasuk dengan sendirina kita meteh kepeken sehat ras mejuah-juah kondisina. Sebage contoh, lit Bibi kami enggo mbalu, tapi selalu aktif bas sosial media. Setiap kai pe kegiaten si ilakokenna, pasti ipostingna bas Facebook. Kami sering memuji keaktifenna. Emaka adi enggo piga-piga wari absen ia bas sosial media, maka minter teleponi kami, banci jadi terjadi sesuatu i bas ia.

Bagem pentingna kita meteh berita (keadaan) keluarganta, teman perpulungen, teman meriahta. Sabab erkiteken kesibuken, banci la nari kita sidahin. I bas kegeluhen perpulungen pe, berita-berita megati isehken, enggo pasti selain mereken informasi tentuna pe banci ibaba ku bas doa pribadi entah topik pertoton syafaat i bas perpulungen si banci ilakoken guna numpak-numpak kegeluhen temanta si deban, subuk i bas keriahen bage pe pergumulen. Persoalenna, lit deba perpulungen e, enggo ndekah la nari pulung, piah dungna la nari sieteh uga kondisina.

Mpebagesi Kata Dibata

Paulus peduli ras Perpulungen Efesus si paksa si e konteks kegeluhen sekitar Efesus dem alu kehebaten. I ja lit satu dari 7 keajaiban dunia kuno, e me patung Dewi Artemis ras kuilna. Dewi Artemis e me patung diberu alu ratusen buah dada. Si e menggambarken kerna kesuburen. Adi sesekalak jelma reh erkiteken kesuliten ekonomi, maka adi ia mindo penampat man Dewi Artemis, maka kegeluhenna akan berubah lebih baik secara ekonomi. Adi lit kalak si sakit lawes ku Dewi Artemis, maka datkenna kesembuhen. Enterem kalak reh ku Kota Efesus, perban paksa si e, e me si idarami kalak. Maka asum Paulus ngerana kerna Yesus Kristus, enggo pasti resikona kematen. Paulus perlu guna menekanken kerna “I bas Kristus” (di dalam Kristus), perban Paulus arus memberesken cara berpikir Jemaat Efesus. Kerina pasu-pasu rehna i bas Dibata nari i bas Yesus Kristus. Ras kepeken, Perpulungen Efesus tetap nggeluh i bas kiniteken si paguh, aminna pe mbue tantangen i sekelewetna.

Secara khusus i bas perikopta, lit dua respon si ilakoken Paulus asum ibegina maka perpulungen Efesus enggo erkiniteken man Tuhan Yesus ras lit kekelengen man kerina anak-anak Dibata (Bhs. Ind., “Karena itu setelah aku mendengar tentang imanmu dalam Tuhan Yesus dan tentang kasihmu terhadap semua orang kudus”). 

Respon si pemena, “la aku erngadi-ngadi ngataken bujur man Dibata kerna kam” (“aku tidak berhenti mengucap syukur karena kami”). Berarti i je lit siidah kontinuitas i bas ngataken bujur. Labo enda hal si mudah. Mekatep kita rusur ngataken bujur. Tapi enda la erngadi-ngadi ngataken bujur asum begina perpulungen e enggo erkiniteken man Tuhan, sada hal si luar biasa. Biasa kita ngataken bujur erkiteken lit berkat (pasu-pasu) bas kegeluhenta. Tapi Paulus la erngadi-ngadi ngataken bujur erkiteken idahna hal si positif i bas perpulungen.

Bage pe, respon si peduaken, la ia lupa notoken Perpulungen Efesus (“dan aku selalu mengingat kamu dalam doaku”). Kai saja si ipindoken Paulus guna perpulungen Efesus?

• Si pemena lebe, gelah ibereken Tuhan Kesah Kepentaren dingen ipetangkasNa diriNa man perpulungen gelah semakin lagi perpulungen e nandai Tuhan. 
• Sipeduaken, gelah italangi Tuhan pusuh peraten perpulungen gelah terang pengangkan perpulungen, alu bage tetap banci perpulungen e erpengarapen man Tuhan, bage pe ieteh perpulungen seh kel buena erta-erta si mulia si isikapken Dibata man anak-anakNa. Ras gelah ieteh perpulungen maka seh kel belinna kuasa Dibata si erdahin i bas kita si tek man Kristus. KuasaNa si erdahin bas kita bali ras kuasaNa si mbelin si ipakeNa asum mpekeke Yesus i bas si mate nari ras mpekundul Yesus i bas ingan si meganjangna arah kemuhen Bapa. Kuasa Kristus si ndauh beliden asangken kerina kuasa pemerentah ras penguasa si la teridah, ganjangen asa kerina pemimpin ras tuan-tuan si la teridah, janah pangkatNa ganjangen asangken kerina pangkat si la terbelasken, subuk i bas paksa enda bage pe i bas paksa si pagin. Intina, kuasa si luar biasa e iberekenNa man banta kalak si tek man baNa.

Pengkenaina

Uga berita keluarganta entah temanta sada perpulungen, khususna i bas kinitekenna man Tuhan? Arah bahan PA HDS-ta siusih Paulus, si tetap membangun komunikasi ras perpulungen-perpulungen si ndube enggo ilayanina, walaupe asum tuliskenna surat e, ia i bas penjara. Perbeben, persoalen geluh la erbahanca surut ukur Paulus guna tetap memotivasi Jemaat Efesus.

Melala genduari kemudahen si enggo ibahan Dibata man banta bas paksa enda. La nari melalui surat bagi si ibahan Paulus ndube, tapi melalui telepon, WA, perkunjungen adi ndeher si banci silakoken guna meteh kondisi kegeluhenna, subuk kinitekenna, persoalen entah pe keriahen ukur si ialamina. Si penting niat ras semangat guna geluhta tetap jadi berkat (pasu-pasu). Asum sibegi hal si mehuli i bas temannta (kade-kadenta) respon si arus silakoken kita e me tetap ngataken bujur man Tuhan bage pe sibaba ia tetap i bas doa, gelah ibereken Tuhan Kesah Kepentaren, tambah-tambah pengangkanna kerna Kata Dibata, paguh tetap kinitekenna.

Tahun enda HDS-ta isikapken i bas negara Taiwan nari. HDS pe merupaken wadah man banta guna banci saling mendoakan sada ras si debanna. Beda pe negaranta, beda bahasanta, beda warna kulit rsd., tapi Kristus enggo mpersadaken kita. Emeriah ukurlah kita nandangi berita kerna kegeluhen kalak si tek.