SUPLEMEN PJJ GBKP TGL. 19 - 25 PEBRUARI 2023

Suplemen PJJ GBKP Tgl. 19 - 25 Pebruari 2023

Pdt. Larena Sinuhadji (Nd. ReyRapha Tarigan)

 

Meritaken Perbahanen Dibata (1 Petrus 2:9-10)

(Sasaren Pelayanen GBKP Thn. 2023 “Jemaat Menjadi Pelaku Aktif  Pelayanen”)

 
Bena Kata
 
Menjadi berkat, menjadi terang ras sira i bas situasi sulit labo gampang, sabab melala siidah, i bas situasi si sikap pe (la lit kiniseran), mekatep kurang mampu kita jadi berkat (pasu-pasu), lebih sering kita ngukurken dirinta, jabunta asangken peduli man kalak si deban. Enda me situasi si ialami kalak Kristus si merap i belang-belang bagin utara Asia Kitik (Turki genduari). Catatan : Asia kecil, adalah propinsi kerajaan Romawi yang terletak di bagian Barat negara Turki sekarang, ibu kotanya Efesus. Asum Petrus nulisken suratna, perpulungen paksa si e sangana ngenanami kiniseran erkiteken kinitekenna man Yesus. Petrus tetap ngingetken gelah perpulungen tetap megenggeng ras nggeluhken geluh selaku kalak si enggo jadi sikerajangen Kristus. Perpulungen arus tetap jadi berkat (pasu-pasu).
 
Pendalamen Teks
 
Judul sada perikop enda “Batu si nggeluh ras bangsa si badia” (bhs. Ind., “Yesus Kristus Batu Penjuru”). I bas perikop enda Petrus mpersingeti perpulungen gelah nadingken kerina perbahanen si jahat janah ndalanken si mehuli. Dahilah Tuhan, batu si nggeluh ras situlak ras si la iergaken manusia tapi ipilih dingen iergaken Dibata. Bahkan mere diri ipake guna majeken Rumah Pertoton Kesah. Emaka i bas teks si jadi bahan renungenta, Petrus mpersingeti perpulungen maka perpulungen  e me bangsa pilihen, imam-imam raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. Identitasta enggo identitas simbaru erkiteken perbahanen Kristus.
 

• Bangsa Pilihen (bangsa terpilih). Dibata enggo memilih kita jadi umat pilihenNa ras pemilihen e me inisiatif Dibata, perkuah ateNa. Labo erkiteken gegeh, beluhta, entah pe kiniulinta. Nina Barclay (sekalak penafsir), “Kalak si ipilih, gelah jadi anak-anak Dibata si taat, guna ndalanken si ngena ateNa”. Adi sibandingken bas Ulangen 7:6-8 i ja Dibata memilih bangsa Israel jadi umat pilihenNa, labo erkiteken mbeliden bangsa Israel asangken bangsa-bangsa si deban, tapi erkiteken Dibata ngkelengi bangsa Israel. Arah si e jelas, Dibata memilih kita, semata erkiteken keleng ateNa.
• Imam-Imam Raja (Imamat Rajani). I bas Padan Si Ndekah imam-imam labo banci sembarangen, ia arus keturunen Harun, suku Lewi nari. Tapi erkiteken Kristus, maka kalak si tek ipetunggungken jadi imam, si melayani Raja di atas segala raja.
• Bangsas sikerajangen Dibata (bangsa yang kudus). Kalak si tek, ipilih gelah geluhna berbeda ras kalak si deban. Labo kita mengasingken diri (ekslusif), tapi  walaupe kita tading i doni, sikap geluhta arus berbeda ras doni enda.
• Anak-anak Dibata (Umat kepunyaan Allah sendiri). Nina Barclay, “umumna sesuatu itu menjadi penting (berharga) erkiteken “sesuatu” milik dari seseorang si penting  (terkenal). Kalak Kristen menjadi berharga erkiteken Dibata Bapanta, umat kepunyaan Allah sendiri.

 
Penggelaren-penggelaren enda kerina awalna ibereken man kalak Israel.
Bdk. Keluaren 19:6, “sada bangsa si nggeluh man gunangKu saja janah kam me jadi imam-imamKu”. Ulangen 7:6, “Lakokenlah e, erkiteken kam kap sikerajangen TUHAN Dibatandu. IpeserapNa kam i bas kerina bangsa-bangsa i doni enda nari jadi bangsaNa khusus”.
 
Tapi genduari penggelaren e kerina enggo ibereken man banta kalak si tek. Tujunna enggo jelas, gelah kita meritaken perbahanen-perbahanen Dibata si mbelin. Sebage tanda pengataken bujurta man Tuhan sabab enggo diloNa kita ndarat i bas si gelap nari ku bas terangNa si lanai kal langlang ulina.
 
Arus terbedaken kita si genduari ras si nai. Nai labo kita anak-anak Dibata tapi genduari kita enggo jadi anak-anak Dibata. Nai la sieteh perkuah ate Dibata, genduari enggo sialoken perkuah ateNa.
 
Pengkenaina
 
Tema, “Meritaken Perbahanen Dibata”. Tujun Dibata ngaloken kita jadi anak-anakNa, ngaloken perkuah ateNa gelah kita jadi aronNa, perpanjangen tan Dibata meritaken perbahanen-perbahanen Dibata si mbelin. Artina, setiap anggota perpulungen kalak si tek terpanggil meritakan Berita Si Meriah rikutken konteksna sekalak-sekalak (profesina/pendahinna), naksiken keleng ate Dibata, kuasa Dibata si enggo ialokenNa. Kalak si tek nerusken dahin-dahin bagi si enggo idahiken Yesus Kristus e me nehken kekelengen, ngelakoken kebujuren, mulahi kalak si tertindas, ndalanken keadilen (menghadirkan nilai-nilai kerajaan Allah di tengah dunia ini).
 
Temata ikawitken ras Sasaran Pelayanen GBKP Tahun 2023, Jemaat Menjadi Pelaku Aktif Dalam Pelayanan). Missi Tuhan si enggo berekenNa la mungkin adi hanya idahiken Pdt,/Pt./Dk. ras Pengurus Gereja saja, tapi kerina ngawani perpulungen rikutken gegeh, talenta, kengasupen, kepanteren muat bagin nehken pelayanen. Jemaat bukan menjadi penonton tapi menjadi subyek, pelaku aktif pelayanen.
 
Tentu Sasaran Pelayanen tahun 2023 enda labo pekerjaan mudah, mengingat ratana 40% denga siaktif ku Gereja. Bahkan rikutken penelitian Litbang GBKP, jemaat apatos 60% (jemaat si la pernah peduli ras pelayanen i bas Gereja. Hadir erkiteken perluna). Simpatos 30% (jemaat si ikut terlibat pelayanen erkiteken ibujuk, iiayahken, dingen murah mbeceng adi la bagi ukur). Empatos 10% (si aktif melayani alu kesadaran sendiri).
 
Siarapken arah erbage-bage pendekaten, program si kongkrit, terukur, pembinaan-pembinaan, terjadi peningkaten si lebih baik subuk i bas kehadiren bage pe muat bagin i bas melayani. Libatken jemaat ku bas tim-tim pelayanen Gereja, lebih asa si enggona. Terbuka saja. Ula nari lit pemahamen, kami ngenca si layak jadi singers entah pe Tim Multi Media. Tentu rikutken kemampuan, talenta ras kininggiten. Lit Tim Doa, Tim PRT, Tim Ibadah, Tim Singers, Tim Musik, Tim Ekonomi Kreatif, rsd. Tim-tim enda kerina, lebe arus ibekali alu pembinaan rohani, ras seterusna siboboti alu pelatihen-pelatihen gelah reh sikapna melayani Tuhan. Tuhan enggo mereken si tebaik, maka enggo sepatutna kita pe mereken si tebaik man Tuhan.