SUPLEMEN PA MAMRE GBKP TGL. 19 - 25 PEBRUARI 2023

Pdt. Larena br. Sinuhadji (Nd. ReyRapha Tarigan)

 

Teks : Habakuk 3:17-19

Tema : MEGENGGENG I BAS RUSAHA

Tujun : Gelah Mamre

- Ngidah uga isi komitmen kiniteken Habakuk kerna perbahanen Dibata mpekena-kena ia i bas usahana

- Megenggeng i bas rusaha sebab arah usaha e Dibata mereken pasu-pasuNa

 
Penaruh
 
Mungkin labo nterem kita si nandai sekalak si tergelar Stasion Tarigan, ia si nciptaken ende-enden judulna “Suan Kol” tahun 1983. Mungkin erkiteken muatan teologis si mejile i bas lagu enda, makana Tim arah Yayasan Musik Gereja (Yamuger) nari menterjemahken lagu enda ku bas Bahasa Indonesia janah itamaken jadi salah sada lagu pujin i bas Kidung Jemaat (KJ) benaken tahun 1986 (KJ 333). Lagu enda pe akhirna imasukken ku bas KEE No. 220. Si istimewa, lagu “Suan Kol” enda terinspirasi Habakuk 3:17-19 si jadi ogenta sendah.
 
Mpebagesi Kata Dibata
 
Kitab Habakuk itulis Nabi Habakuk kira-kira tahun 605 SM sope bangsa Juda itaban bangsa Babilon. Habakuk ertina "rangkulan, dekapan, genggaman". Mungkin erkiteken orang tua Habakuk enda tuhu-tuhu nggejapken rangkulan Dibata i bas kegeluhenna. Nabi Habakuk asalna i Juda nari, ia sekalak Lewi si ndahiken kerina dahin-dahin pelayanen i bas Rumah Pertoton kalak Yahudi selain ndahiken jabaten kenabinanna tentuna. Amin pe Kitab Habakuk enda gendek, hanya 3 pasal, tapi piga-piga ayatna jadi rujukken penting i bas Padan Si Mbaru (Roma 1:17; Galati 3:11; Heber 10:38), janah ogenta sendah banci ikataken enggo rusur sibegi ras terkenal.
 
Nabi Habakuk paksa si e sanga menghadapi tantangen si luar biasa erkiteken kinilabujuren bangsana (Hab. 1:2-4). I bas dampar si deban, ukumen Dibata erkiteken kinilabujuren ndai enggo nandangi reh. Ukumen Tuhan reh arah bangsa Babilon si naluken kerina bangsa-bangsa si lit i sekelewetna termasuk bangsa Israel (Hab. 1:5-11). Situasi si bagenda rupana tentuna sangat mempengaruhi kualitas hidup bangsa Israel paksa si e. Banci sibayangken, adi la bujur masyarakat sekelewet tentu kegeluhen si tep-tep wari pe la sikap, tingkat kriminalitas sangat tinggi, mbiar kalak untuk ndalanken dahinna entah pe usahana, rsd. Sada hal si penting si banci iteladani arah Nabi Habakuk, e me, i bas perbeben si nihadapina, reh ia ertoto ku Dibata. Pertoton Habakuk enda tertulis i bas bindu 3.
 
Secara khusus i bas ogenta sendah, teridah pengakun kiniteken Habakuk i bas pertotonna, nina, “Aminna pe batang ara la erbunga batang anggur la lit buahna, aminna pe batang saitun la lit asilna, perjuma la rulih gia, aminna pe biri-biri mate kerina, dingen enggo keri lembu i bas karangna, tetap nge aku ermeriah ukur i bas TUHAN erkiteken Dibata kap si ngkelini aku. TUHAN kap si mereken gegeh man bangku desken nahe belkih, paguh ibahanNa perdalanku; e maka la celus nahengku aminna erdalan pe aku i deleng-deleng si meganjang”.
 
Lit dua hal si banci siorati i bas ogenta. Si pemena, bagin pertoton Habakuk enda ncidahken latar belakang kegeluhen penduduk Juda si ratana perjuma ras peternak. Dua profesi enda si paksa si e mengalami kiniseran erkiteken kondisi masyarakat si erbahanca la aman ras nyaman i bas erusaha. Jadi pertoton Habakuk enda mewakili perbeben perjuma ras peternak paksa si e.
 
Si peduaken. Pertoton Habakuk enda ncidahkenca kiniteken si tanpa syarat. Iman tanpa syarat enda banci isejajarken ras kai si nialami Sadrah, Mesah, ras Abednego i bas Daniel 3:16-18, sanga kalak enda teluna iambekken ku bas api ginuhur si gurlah, ikatakenna nina, “Adi ngasup kin Dibata si isembah kami e mulahi kami i bas api ginuhur si gurlah e nari ras i bas kuasandu nari, tentu ipulahiNa kami. Tapi adi lang pe, ietehndu min o Raja, maka la kami nggit nembah dibatandu, janah la kami nggit nembah mungkuk kempak gana-gana emas si enggo ipajekkenndu”.
 
Iman tanpa syarat ertina, kiniteken si lit i bas kita labo tergantung situasi kondisi doni enda, umpamana, adi situasi aman nyaman, je me kita erkiniteken, adi la aman la kita erkiteken. Labo erkiteken erta kebayaken doni, umpamana, adi melala senta je me kita erkiniteken, adi la lit sen la kita erkiniteken. Kiniteken si tanpa syarat e me kiniteken erpalasken keleng ate ras perkuah ate Dibata man banta. Nabi Habakuk mereken teladan man banta, i bas keadaan si uga pa pe, tetap ia ermeriah ukur i bas Tuhan erkiteken Dibata kap si ngkelini ia. Tuhan kap si mereken gegeh man bana, paguh ibahan Dibata perdalanna. Yakin Habakuk maka rancangan Dibata nandangi kalak si erkiniteken man baNa e me rancangan si mehuli (bdk. Jer. 29:11).
 
Pengkenaina
 
Tema si seh man banta e me “Megenggeng i bas rusaha”, alu tujun gelah Mamre ngidah uga isi komitmen kiniteken Habakuk kerna perbahanen Dibata mpekena-kena ia i bas usahana, ras megenggeng i bas rusaha sebab arah usaha e Dibata mereken pasu-pasuNa. Ertina tema ras tujun i bas PA-ta sendah erkaiten ras profesi entah pe pendahin si genduari sanga itekuni, mungkin lit kaitenna ras etos kerja Kristen.
 
I bas si e, lit dua hal si banci sirenungken. Si pemena, adi lit kaitenna ras etos kerja Kristen, enggo tangkas man banta maka kerina profesi entah pe pendahin si mehuli si genduari sanga radu ras sitekuni e me anugerah Dibata. Erkiteken si e, kerina si idahiken kita tujunna guna kemulian gelar Dibata. E me pengakun kinitekenta i bas kita erbintuas erdahin. E maka la terpisahken kita antara beribadah ras erdahin, sebab erdahin e me bagin i bas kita beribadah man Dibata. Ertina kerina si idahiken kita sikap bagi kita sikap i bas kita beribadah.
 
Si peduaken, erlajar kita arah Nabi Habakuk. Amin pe ia sekalak Lewi si dahinna total i bas Rumah Pertoton, tapi igejapkenna perbeben perjuma ras peternak paksa si e. Iajuk Nabi Habakuk, erkinitekenlah alu tanpa syarat. Sebab Dibata itehna kai saja si mehuli i bas geluhta, amin kai pe si terjadi. E maka rehlah ku Dibata, sehken pengataken bujur man baNa i bas pertotonta, janah pindolah gelah ipegegehina kita i bas ngadapi kerina perbeben i bas geluhta, khususna i bas pendahinta. Jadi salah sada hal si penting i bas kita erusaha e me erpengendes man Dibata. Sebab e nge si erbahanca kita megenggeng, tekun, i bas erusaha. Kenca enggo sukses usahata, ula lupa kita man Dibata alu semakin totalitas i bas mendukung kerina bentuk pelayanen i bas gerejanta masing-masing.