SUPLEMEN PA MORIA GBKP TGL. 26 PEB. - 4 MAR. 2023

Palas Teologi PL

 

Pdt. Larena br. Sinuhadji (Nd. ReyRapha Tarigan)

 

Teks : Bilangen 4:29-49

Tema : NDAHIKEN TANGGUNG JAWAB

Tujun : Gelah Moria :

- Meteh maka man kalak Lewi iendesken tanggung jawab si man dahinkenna

- Ndalanken tanggung jawab si arus ilakokenna selaku Moria

 

PENARUH
 
Salah sada tolak ukur berkualiastana sekalak jelma e me arah ia ndahiken tugas entah tanggung jawab si ibereken man bana. Adi sikap pendahikenna, la meros, bahkan iselesaikenna seh ngayak dung, la ngadi i tengah dalan, maka ia banci ikataken kalak si ertanggung jawab ras enggo pasti kalak si berkualitas. Tapi adi kebalikenna, enggo pasti sulit man banta guna mereken dahin si deban ka bana. Enggo urak kepercayaanta bana, sebab dahin si kitik e pe la sikap pendahinkenna.
 
Rikutken Tema Sasaran Pelayanan GBKP tahun 2023 “Jemaat Menjadi Pelaku Aktif Pelayanan”, maka ibahan Moria GBKP tema umumna i bas PA sepanjang tahun enda e me “Mengayak” (proaktif). I bas dahin kai pe subuk bas jabu, pelayanen gereja, kemasyarakatan, Moria GBKP arus proaktif, ula hanya jadi penoton. Emaka i bas PA minggu enda ras-ras kita menggumuli palas teologi  mengayak (proaktif) e i bas Pustaka Si Badia, perlebe Padan Si Ndekah. Secara khusus i bas PA-ta sekali enda e me tugas-tugas kalak Lewi i bas terpuk Merari si ibereken Tuhan arah Musa.
 
PENDALAMAN PERIKOP
 
I bas ay. 29-33 si ibere Judul “Tugas-tugas kalak Lewi i bas terpuk Merari”. Sada lebe si banci siidah, Tuhan mereken tugas man Musa gelah erbahan sensus man kalak Lewi i bas terpuk Merari. Nuratken kerina si dilaki si umurna telu puluh seh lima puluh tahun si ngasup erdahin i bas Kemah Perjumpaan. Tanggung jawabna: ngangkat papan-papan, beloti-beloti, tiang-tiang ras palas kemah, bage pe tiang-tiang, alas, pantuk-pantuk ras tinalit guna bide kesaian sekelewet kemah e ras kerina alat-alat si ipake guna makeken si enda erina. Sekalak-sekalak arus ertanggung jawab ngangkat barang-barang si tertentu.
 
Piga-piga hal lebe si banci siidah:

• Musa selaku pemimpin bangsa Israel si ibere Tuhan tugas guna erbahan sensus, nuratken gelar ras mereken tugas-tugas secara spesifik si arus idahiken terpuk Merari, idahikenna alu mehuli.
• Si ngelakoken tugas i bas terpuk kalak Lewi e me si ngasup erdahin i bas Kemah Perjumpaan. Emaka selain batasan usia, si menjadi penting e me ngasup erdahin. Sabab banci jadi, secara usia banci tapi la ngasup erdahin erkiteken erbage keterbatasen, subuk kesehaten, gegeh si kurang rsd.
• Sekalak-sekalak arus ertanggung jawab ngangkat barang-barang si tertentu. Ertina, setiap pribadi (setiap orang) ibereken tanggung jawab. Labo hanya orang-orang tertentu. Ras enggo pasti adi bage ilakoken, la lit si jadi penonton, kerina muat bagin. Enggo pasti kurang si mandangi, sabab biasa si la lit dahinna nge si rusur mandangi (satu orang satu pelayanan).

 
Ay. 38-49 si ibere judul “Sensus suku Lewi”. Musa, Harun ras pemimpin-pemimpin perpulungen bangsa Israel erbahan sensus man suku Lewi si telu terpuk (Kohat, Gerson ras Merari) rikutken si enggo iperentahken Tuhan. Bagi si ndai ka, maka si isuratken e me dilaki si umurna telu puluh tahun seh lima puluh tahun si ngasup erdahin i bas Kemah Perjumpaan. Terpuk Kohat 2.750, terpuk Gerson 2.630 ras terpuk Merari 3.200, jumlahna kerina 8.580. Sakali nari, sekalak-sekalak iendesken tanggung jawab si man dahinna ras pe si man angkatenna.
 
Penting i jenda data si valid, si ter-update setiap saat. Arah si e banci siidah, piga persen kalak Israel khsususna suku Lewi si secara khusus erdahin bas Kemah Perjumaan, si produktif denga erdahin. Si perlu jadi pelajaren banta, terkadang bas Gerejenta, data tidak valid, kadang kurang update, data kurang iperbarui. Umpamana, jemaatta si enggo pindah bas Gereja si deban, lit denga gelarna.
 
PENGKENAINA
 
Rikutken bahanta, maka enggo jelas tujun si pemena enggo tercapai, enggo sieteh tugas si ibereken man kalak Lewi, i bas tanggung jawab si ibereken man bana.
 
Tema “Ndahiken tanggung jawab”. Musa, Harun  ras kalak Lewi bas terpuk Merari, Kohat ras terpuk Gerson enggo ndahiken tanggung jawabna alu mehuli. Tidak ada yang merasa terbebani (berat) entah pe kitiksa ndahin si ibereken bana walaupe hanya ngangkat papan-papan. Si paling penting enggo berekenna dirina guna erdahin alu bertanggung jawab pekena Kemah Perjumapaan.
 
Piga-piga hal si menjadi pesan rikutken bahan PA-ta sekali enda :

1. Kai pe tanggung jawab si ibereken Tuhan man banta secara khusus i bas Kategorial Moria, i bas Gerejenta, dahinken alu dem tanggung jawab, sikap ula meros, ras erkedungen, ula sempat ngadi bas tengah dalan erkiteken buena tantangen si man hadapen (Bdk. Kolose 3:23, “Kai pe si ibahanndu, dahikenlah alu tutus, tempa-tempa kam erdahin guna Tuhan labo guna manusia”).
2. Satu orang satu pelayanan, seh makana la lit nari si menjadi penonton. Ibenaken tanggung jawab e bas Moria sektor: jadi MC, pendoa syafaat, pemimpin pujian, tim-tim si ilitken rikutken kebutuhen (Tim Doa, Tim Singers, Tim Ekonomi Kreatif, rsd).
3. Datalah perpulungen si ngasup melayani (jadi labo enda lit unsur paksaan), tapi sukacita rikutken talenta. Ras arus ilitken koordinator (pengurus) ras sebage pengurus (koordinator) arus tetap memonitoring gelah tugas pelayanen e banci idahiken alu mehuli.

 
Labo lit dahin si kurang mulia (kitik) i bas Tuhan. Adi setia kita ertanggung jawab i bas ndahiken si kitik, ipercayaken Tuhan ka si terbeliden man banta. I bas kita ndahiken dahinNa, dahin bas jabu selalu kita nande (ndehara) ula ka sitelantarken. Jadilah kita nande (Moria) si bijak ras tangguh. I bas kita mereken dirinta guna melayani pasti Tuhan mperlengkapi kita.