PJJ GBKP Tgl. 30 April - 6 Mei 2017

PJJ GBKP TGL. 30 APRIL - 6 MEI 2017

Pdt. Larena br. Sinuhadji (Nd. Rey Tarigan)

Tema : ENGGO KUANGKA PERBAHANEN DIBATA ARAH SEKELEWETKU (Masmur 66:1-9)

Penjelasen Bahan Ogen & Renungen

Masmur enda itulisken kenca bangsa Israel mulih i bas pembuangen Babel nari, emaka labo lit i je tersurat Masmur Daud, sabab labo Daud si nuliskenca. Masmur enda ibagi menjadi 3 bagin :

Ay. 1-4, ajakan, seruan gelah kerina bangsa memuji-muji Tuhan. Kata-kata si berbeda, alu antusen si seri banci siidah alu kata “ersuraklah man Dibata”, “rendelah dingen mpermuliaken gelarNa”, “pehaga IA alu puji-pujin”. I bas ayat-ayat e ipake kata “erga” (bhs. Ibr. : bumi, tanah, dataran). Hal enda nuduhkenca, maka Dibata e, Dibata si mada kuasa, si seh kel dahsyatna, seh makana doni enda nembah mungkuk man baNa dingen mpehagaken IA.

Ay. 5-7, iajuk Pemasmur bangsa Israel ngidah ras nggejapken kai si enggo ibahan Tuhan i bas paksa si enggo lepas, secara khusus asum Tuhan nalihken lawit merah jadi taneh kerah (Kel. 14:21) ras sungai Jordan pe kerah (Josua 3:14-17) seh makana bangsa Israel erdalan arah e ngepar.

Ay. 8-9, sekali nari iajuk Pemasmur gelah umat Tuhan ras pe bangsa-bangsa si deban memuji Tuhan. Sabab IA Dibata si tetap setia njagai kita gelah tetap nggeluh dingen la ipelepas Tuhan kita ndabuh amin sekali mbue perbeben si nderpa. Dua ayat terakhir enda mpersingeti bangsa Israel secara khusus, amin itaban cukup ndekah i Mesir, mengalami penderitaan, Tuhan mbebasken bangsa enda. Mengalami penderitaan i bas pembuangen Babil Tuhan mereken pembebasen. Dibata si enggo menguji ras mpelimbarui kiniteken bangsa e asum ngenanami erbage-bage kiniseran.

Tema i bas PJJ-nta “Enggo kuangka perbahanen Dibata arah sekelewetku”. Sada lebe perbahanen Dibata i bas kegeluhenta tujunna guna maba kemalemen ate man banta, gelah kita senang labo gelah kita cilaka (Jer. 29:11), amina dalan si ibentasi kita erbage-bage : maun kendit, ngincuah, banci ka nangkeng-nangkeng tapi si e kerina guna memurnikan kinitekennta (1 Pet. 1:6-7). Kuasa Dibata si nepa langit doni ras isina, si enggo mulahi bangsa Israel i bas Mesir ras pembuangen Babel nari, si erkuasa erbahanca kerah lawit merah ras sungai Yordan, e me kap Dibata si seri si isembah kita i bas Yesus Kristus, si enggo naluken kuasa dosa ras kematen. Dibata si tetap erkuasa i bas kegeluhenta nai, genduari seh rasa lalap.

Ngasup kita ngangkai ras nggejapken perbahanen Dibata i bas geluhta ras sekelewetta erkiteken siimani Dibata tetap si ngaturken, si memimpin kegeluhenta. Senang, susah, sakit, sehat, beruntung, gagal banci sibentasi, dingen ngasup denga kita ngataken bujur erkiteken sigejap Dibata la pernah nadingken kita. Arah bencana alam si terjadi i je pe siangka perbahanen Tuhan maka Dibata si erkuasa, kai pe banci ibahanNa. Tanah longsor, banjir bandang arah e pe manusia mengintrospeksi diri guna bersahabat dengan alam. Kebalikenna, la siangka perbahanen Dibata erkiteken sigejap kai pe si terjadi i bas geluhta erkiteken beluhta, kengasupenta.

Adi enggo siangka perbahanen Dibata i bas kegeluhenta ras sekelewetta si tuhu-tuhu erkuasa, Pemasmur mpersingeti kita guna tetap rende muji Tuhan, ersurak dingen mpehaga Dibata. Jubilate ertina “ersuraklah”. Memuji Tuhan, ersurak muji Tuhan banci silakoken i bas kita rende mpenangkih puji-pujianta man Tuhan erkiteken Tuhan mehuhi, si enggo mbebasken kita (labo rende si biasa-biasa). Rende si sungguh-sungguh, semangat, sukacita, reh i bas pusuh nari labo hanya terjeng sibelasken. Uga i bas kita rende muji ras mpermuliaken Tuhan sedekah enda? Memuji Tuhan, mpehagaken Tuhan teridah pe arah pengkebet geluhta si tep-tep wari, subuk arah pengerananta si membangun, perbahanenta si mehuli. Segala sesuatu arus ilatih. Latihan mengatakan ras erbahan si mehuli piah dungna enggo menjadi gaya hidup man banta. Haleluya, puji Tuhan.