Khotbah GBKP Minggu Tgl. 23 April 2017

KHOTBAH GBKP MINGGU TGL. 23 APRIL 2017

Nrs. Pdt. L. br. Sinuhadji (Bp. Rey Tarigan)

MINGGU KENCA PASKAH

Quasimodogeniti (Bagi Anak Si Mbaru Tubuh)

(Warna Stola : Mbentar)

Invocatio : “Malem me ate kalak si la megiken pedah kalak jahat, si la ngusih perbahanen kalak perdosa si la erteman ras kalak megombang man Dibata” (Masmur 1:1)

Ogen : 1 Petrus 1:3-9 (Tunggal)

Khotbah : Masmur 16:1-11 (Responsoria)

Tema : DIBATA TETAP REMBAK RAS AKU

Penjelasen Bahan Pustaka Si Badia

Invocationta e me kalimat si pemena i bas kitab Masmur. Akap kami mungkin lebih payo adi sioge seh ay. 2 sebab rikutken Alkitab TB-LAI bage pe terjemahen BIS-BIMK, ay. 1 ras 2 labo terpisah tapi ersada i bas sada kalimat. Jadi kalimat lengkapna rikutken Alkitab TB-LAI nari nina, “Berbahagialah orang yang tidak berjalan menurut nasihat orang fasik, yang tidak berdiri di jalan orang berdosa, dan yang tidak duduk dalam kumpulan pencemooh, tetapi yang kesukaannya ialah Taurat TUHAN, dan yang merenungkan Taurat itu siang dan malam”. Penekanenna lit i bas ay. 2. Adi ikalimatken ku bas bahasa Karo, “Malem me ate kalak si ... keriahenna e me matuhi Undang-undang TUHAN dingen ngukurisa suari ras berngi”. Kemalemen ate, kebahagiaan, e me seri ertina ras pasu-pasu i bas Dibata nari. Ertina kitab Masmur enda ibenai alu pengakun kiniteken Pemasmur maka matuhi ras ngukuri Undang-undang TUHAN alu keriahen ukur e me pilihan si tepat si ipilihna asangken pilihan si deban (megiken pedah kalak jahat, ngusih perbahanen kalak perdosa, ras erteman ras kalak megombang man Dibata). Sebab igejapken Pemasmur i bas ia matuhi ras ngukuri Undang-undang TUHAN alu keriahen ukur, pasu-pasu i bas Dibata nari simpar i bas kegeluhenna.

Bahan ogenta e me surat rasul Petrus man perpulungen kalak si tek si sangana ngenanami erbage-bage percuban (ay. 6). Rasul Petrus mereken pergegeh gelah i bas keadaan si bagenda rupana perpulungen tetap ermeriah ukur, sebab erbage-bage percuban e tujunna gelah ermurnina kiniteken janah i bas paksana pagi ialoken perpulungen e : pasu-pasu si la banci ceda, macik, entah pe luntur (ay. 4-5), puji-pujin, kemulian, ras kehamaten i bas Dibata nari (ay. 7). Tapi i bas si e kerina, patut perpulungen e ngataken bujur man Dibata erkiteken enggo ialokenna kegeluhen si mbaru ras pengarapen si nggeluh erdandanken perkuah ate Dibata si mbelin alu mpekeke Yesus Kristus i bas si mate nari (ay. 3). Emaka nina rasul Petrus, ermeriah ukurlah alu keriahen si mbelin ras mulia sebab keselamaten pertendin enggo ialoken perpulungen e sebage ulih kinitekenna man Dibata (ay. 8-9).

Bahan khotbahta lit i bas perikop alu judul “Ertoto guna petetapken ukur”, i bas terjemahen TB-LAI nina “Bahagia orang saleh”, i bas terjemahen BIS-BIMK nina, “Doa penuh kepercayaan”. I bas Alkitab TB-LAI ikataken i bas ay. 1 nina, “Miktam. Dari Daud”. Miktam e me masmur puji-pujin si itulisken guna peringet-ingeten i bas keadaan si khusus ras khidmat. Sada ngenca pemindon Daud i bas pertotonna, “O Dibata, kawalilah aku; kempak Kam ernalem aku” (ay. 1). Engkai maka ipindona pengkawali ras penalemen i bas Dibata nari? Erkiteken enggo tuhu-tuhu igejapken Daud maka kerina si mehuli rehna i bas Dibata nari. Emaka meriah kel ukur Daud adi pulung ras bangsa Dibata si patuh man baNa asangken pulung ras kalak si nembah dibata-dibata si deban (ay. 2-4). Amin pe bayak ras lit kuasa bas Daud sebage raja Israel tapi igejapkenna si e kerina rehna i bas Dibata nari janah iakuina maka Dibata ngenca kebayakenna, ulu kegeluhenna si tuhu-tuhu (ay. 5-6). Ipujina Dibata erkiteken igejapkenna Dibata rembak ras ia, iajariNa ia rusur, janah ipegegehiNa ia (ay. 7-8). Labo Daud mbiar man kuasa kematen erkiteken ipulahiNa ia i bas kuasa kematen nari (ay. 10). Meriah kel ukur Daud janah pusuhna pe ersurak-surak senang tendina, erkiteken ituduhken Dibata dalan si perlawesna kempak kegeluhen, janah igejapkenna maka i bas Dibata ngenca lit keriahen ras kesenangen si tuhu-tuhu (ay. 9,11).   

Aplikasi

Teluna bahan Pustaka si Badianta sendah ngajuk kita gelah rembak ras Dibata, amin pe si tuhuna Dibata enggo rembak ras kita kalak si tek man baNa, sebab Dibata si isembah kita e me Dibata si ringan i japa pe (omnipresent). Invocationta ncidahkenca kerembaken Pemasmur ras Dibata. Kerembakenna ras Dibata mabaina ku bas sada kesimpulen, matuhi ras ngukuri Undang-undang TUHAN alu keriahen ukur e me kemalemen ate si tuhu-tuhu. Bahan ogenta si pemena nuriken kerna pengajuk rasul Petrus man perpulungen si sangana lit i bas erbage-bage percuban gelah tetap rembak ras Dibata. Kiniteken si paguh man Dibata mpengasup perpulungen e ngerobah perspektifna kerna erbage-bage percuban si nialamina jadi hal si positif ras mehuli, e me ermurnina kiniteken perpulungen e janah nggeluh erpengarapen i bas Yesus Kristus.

Bahan khotbahta sendah ngajuk kita gelah lit bas kita pengalamen geluh si rembak ras Dibata bagi si enggo ituriken Daud i bas Masmurna. Kerembaken Daud ras Dibata labo saja mabai ia reh bagesna erkiniteken man Dibata tapi melala hal si mehuli si enggo ialokenna i bas kerembakenna ras Dibata. Igejapkenna maka kerina si enggo ialokenna i bas geluhna (tahta ras kinibayaken) e me rehna i bas Dibata nari. Pergegeh bage pe kepentaren ibereken Dibata man bana, seh makana turah pengakun maka Dibata ngenca kebayakenna ras ulu kegeluhenna. La nari ia mbiar man kuasa kematen erkiteken enggo italuken Dibata, janah ituduhken Dibata dalan ku bas kegeluhen, keriahen, ras kesenangen si tuhu-tuhu si rasa lalap. Piga-piga penafsir ngatakenca ay. 10 i bas bahan khotbahta igenepi i bas Yesus Kristus rikutken kai si ikataken rasul Petrus ras Paulus i bas Perb. Rasul 2:25-31 ras 13:34-37. Kematen enggo la nai jadi kebiaren erkiteken enggo italuken i bas kekeken Yesus Kristus, janah enggo lit jaminen si tuhu-tuhu kerna kegeluhen si rasa lalap kenca enggo kita nadingken doni enda.

Tema si seh man banta i bas Minggu Kenca Paskah enda e me “Dibata tetap rembak ras aku”. Payo. Tuhu memang Dibata tetap rembak ras kita. Tapi penungkunenna, uga kita? Rembak kin kita ras Dibata? Entah maun kita “pura-pura tidak tahu” maka Dibata e situhuna tetap rembak ras kita? Rusur ipersingetiNa kita i bas pusuh perukurenta gelah kita ngelakoken si mehuli sue ras peratenNa, tapi “pura-pura kita tidak mendengar suaraNya dalam hati dan pikiran kita”.

Mbaru denga sengget kita kerna hasil Pilkada DKI putaran ke-2. La isangka kita maka kepeken buen kalak Jakarta si la milih Ahok. Memang labo ka kerina kita senang man Ahok. Tapi dunia mengakui maka Ahok e me peminpin si bersih, jujur, anti korupsi, ras berpihak man kalak si musil. Ratana kalak Kristen (labo kerina) ngakuken maka i bas piga-piga peminpin si kalak Kristen, Ahok ngenca si pang ngadapi erbage-bage resiko si membahayaken keselamaten geluhna bage pe keluargana i bas paksa kepemimpinenna. Korupsi iberantasna seh ku akar-akarna, e me dalan-dalanna si erbahanca melala kalak si la senang nandangi ia erkiteken enggo la nai lit sen masuk i bas cara-cara si la mehuli nari. Tapi si luar biasa i bas Ahok enda, amin pe ia idabuhken musuh-musuhna alu cara-cara si la mehuli, arus ka ia ngkeriken waktuna guna reh ku bas sidang-sidang pengadilen alu tuduhen si palsu, janah talu i bas pemilihen, tapi tetap denga ia ngasup erbahan kopers ngakuken peminpin Jakarta si mbaru. Si e nuduhkenca maka labo kekuasaan si idaramina, ikatakenna, "Tuhan yang memberi, Tuhan yang mengambil" labo isalah-salahkenna kalak si deban i bas ketalunna. Ngasup denga ia ngalo-ngalo alu mehuli gubernur si mbaru i bas kantorna. Ngasup denga ia cirem, la lit beban bas ia. Adi peminpin si deban lenga bo tentu ngasup. Kai enda rahasiana? Ahok tuhu-tuhu nggejapken maka Dibata rembak ras ia. E me si erbahanca sanga erkuasa denga ia jadi gubernur labo imanfaatkenna kekuasaanna guna kepentingen dirina sendiri. I bas paksa talu ia datken kemalun si mesangat, tetap denga ia ngasup ngalokenca erkiteken kerembakenna ras Dibata mpegegehi ia.

Enda me sada contoh si mehuli i bas geluhta. Biasana adi kita lit i bas perbeben si mesangat, rembak kita ras Dibata. Tapi melala ka kalak si tek si i bas kiniseran si mesangat idaramina dalan pulah si instan alu ndarami kuasa-kuasa si deban. I bas paksa kita senang, sukses, berhasil, maun lupa ka kita man Dibata. Tapi melala ka kalak si tek si tuhu-tuhu igejapkenna maka i japa pe, i bas keadaan si kugana pe sedar ia maka i je lalap lit Dibata. E maka enggo sepatutna kita ngataken bujur man Dibata janah sipuji Dibatanta erkiteken nggit IA rembak ras kita kalak si tek man baNa. Mari radu ras kita ertekad gelah tuhu-tuhu igejapken kita maka Dibata tetap rembak ras kita, kenca bage ikutkenlah kai si ikatakenNa i bas pusuh perukurenta. Dibata si mpegegehi kita.