PA Kategorial GBKP Tgl. 16 - 22 April 2017

PA MORIA GBKP TGL. 16 - 22 APRIL 2017

Pdt. Larena br. Sinuhadji (Nd. Rey Tarigan)

HUT KAKR GBKP

Ndampingi Anak

Ogen : Maleaki 2:15-16; 2 Timotius 1:5

Tema : MPEKENA-KENA ANAK JADI BANGSA DIBATA

Tujun : Gelah Moria :

1) Jadi usihen anak-anakna er-Dibata (Eunike & Lois)

2) Ngasup njadiken dirina ingan nuri-nuri anak-anak (konselor)

Metode : Sharing Pengalamen

Penjelasen Bahan Ogen & Relevansi

1. Maleaki ertina “utusenku” (Mal. 3:1), ia sekalak nabi utusen Dibata i bas paksa kenca bangsa Israel mulih pembuangen i Babilon nari janah Rumah Pertoton enggo ipajekken mulihi. Situasi paksa si e bangsa Israel lenga pulah i bas kekuasaan bangsa si deban. Bangsa Persia ngkuasai Yehuda paksa si e janah bangsa e arus nggalari pajak (Mal. 1:8). Terjadi kelihen erkiteken lit labang si ncedaken juma bangsa e (Mal. 3:11). I bas keadaan si bagenda rupana melala kalak Israel termasuk peminpin-peminpinna si enggo bene kinitekenna man Dibata ras ngelakoken perbahanen-perbahanen si la sue ras peraten Dibata (Mal. 1:1-2:8).

2. Bahan ogenta si pemena masuk i bas perikop alu judul “Kelapatuhen bangsa e man Dibata”, i bas terjemahen Alkitab TB-LAI nina “TUHAN memarahi Israel karena kawin campur dan perceraian”. Arah judul i bas bhs. Indoensia nari teridah maka kinilapatuhen bangsa Israel erkaiten ras erjabu ras diberu-diberu si nembah dibata-dibata si deban, janah melala terjadi perceraian. Perceraian e me sada hal si la sue ras peraten Dibata (bdk. Kuan 2:17; Hos. 2:18-19; rsd.), emaka ay. 14-16 rusur ijadiken palas kesetiaan i bas perjabun. Si jadi penekanen i bas PA-nta sendah e me ay. 15, i je ikataken maka sura-sura Dibata i bas perjabun e me : 1) setia i bas padan perjabun; 2) ipupus anak-anak si tuhu-tuhu kal bangsa Dibata. “Bangsa Dibata” i bas bhs. Ind. nina, “keturunan ilahi” entah pe “menjadi umat Allah yang sejati”.

3. Kai enda antusenna? Sue ras tema bage pe tujun PA-nta sendah, maka erpalasken bahan ogenta si pemena, i bas mpebelin-belin, mendidik entah pe ngajari anak-anak arus lebe lit kiniersadaan arih antara bapa ras nande. Setia i bas padan perjabun banci iertiken, bapa ras nande ersada arih i bas kai pe termasuk i bas membimbing anak-anak nandai Dibata, ngajari alu teladan geluh gelah terbentuk karakteristik bangsa Dibata, keturunen ilahi, entah pe menjadi umat Allah yang sejati, e me generasi si mbiar ras mehamat man Dibata.

4. Ogenta si peduaken nuriken kerna Timotius ras orangtuana (Lois ras Eunike). Timotius tubuh ras mbelin i tengah-tengah keluarga campuren i Listra nari, nandena kalak Yahudi Kristen, bapana sekalak si labo kalak Yahudi (Perb. Rasul 16:1). Pendidiken dasarna bage pe pendidiken kinitekenna idatkenna i bas ninina nari Lois ras nandena Eunike. Lois ras Eunike enda tuhu-tuhu berhasil menerapken pola pendidiken si seimbang antara pemeteh secara umum bage pe erkiniteken man Dibata. Emaka i bas ogenta si peduaken ikataken rasul Paulus nina, “Kuinget tutus atendu erkiniteken bali ras kiniteken nini tudungndu Lois ras nandendu Eunike. Tek aku maka i bas kam pe lit kiniteken si bage”. I bas TB-LAI nina, “Sebab aku teringat akan imanmu yang tulus ikhlas, yaitu iman yang pertama-tama hidup di dalam nenekmu Lois dan di dalam ibumu Eunike dan yang aku yakin hidup juga di dalam dirimu”. Ertina pemeteh kerna kiniteken bage pe geluh erkiniteken si payo enggo tuhu-tuhu isehken Lois ras Eunike man Timotius.

5. Kai si enggo ibahan Lois ras Eunike enda akap kami perlu siusih, i ja Moria tuhu-tuhu berperan penting i bas membentuk karakter anak-anak si erkemalangen man Dibata. Gelah pola pendidikan si seimbang mencakup kecerdasen intelektual, emosional ras spiritual enda banci ka ipesusur anak-anakta ku generasi berikutna. Ertina i bas kita mendidik anak-anak, labo saja soal ngajarken si mehuli man anak-anakta sue ras Kata Dibata, tapi perlu ka isadari kerna metode, cara, entah pe pola pendidikan si mehuli man anak-anakta. Maun-maun ateta nehken pengajaren si mehuli tapi caranta entah pe metodeta kurang pas piah dungna tujunna la tercapai. Umpamana, ngeranai lalap si ilakoken kita, si irananken situhuna mehuli nge, tapi erkiteken la nari lit kesempaten anak-anak guna nuri-nuri piah dungna anak-anak pe enggo kisat megiken kita. Lit kesempaten guna kita ngerana, tapi bereken kesempaten man anak-anakta guna nuriken kai si nialamina, kai penggejapenna, entah pe kai pendapatna, adi lit si kurang mehuli je maka kita ngerana alu sikap si bersahabat. Pola pendidikan jaman si nai i ja orang tua rusur mekpeki anak-anakna akap kami ula nai siterusken sebab hal si bage erbahanca ceda pusuh perukuren anak-anakta, janah piah dungna enggo la nai lit gambaren Dibata si perkeleng i bas kita orangtuana.

6. Mendidik anak-anak memang labo hal si murah, butuh kerja keras, ketutusen, kesabaren, kinigenggengen, rsd. Tapi tek kita adi erpengendes kita man Dibata, iberekenNa kerina si ibutuhken kita i bas kita nehken pendidiken si mehuli man anak-anakta, khususna ipengasupNa kita jadi teladan si mehuli sue ras peratan Dibata man anak-anakta. PA-nta sendah ilaksanaken i bas rangka menyambut HUT KAKR i bas tgl. 18 April (si pe-127 tahun-ken). Selamat HUT KAKR ninta. Mari radu ras sidukung pelayanen man anak-anakta i bas KAKR GBKP. Dibata si masu-masu kita kerina.

PA MAMRE GBKP TGL. 16 - 22 APRIL 2017

Nrs. Pdt. L. br. Sinuhadji (Bp. Rey Tarigan)

HUT KAKR

Ogen : Masmur 127:3-5

Tema : ANAKKU KANDU-KANDUKU

Tujun Gelah Mamre :

1) Banci mereken perhatian ras waktu si cukup man anak-anak

2) Mbangun hubungen emosional si erat antara bapa ras anak

Metode : Sharing (mehuli pe adi reh kam ku PA Mamre ras anak-anak i tengah jabu)

Penjelasen Bahan Ogen & Relevansi

Masmur Salomo enda erjudul “Muji kiniulin Dibata”, i bas Alkitab TB-LAI “Berkat Tuhan pangkal selamat”, i bas Alkitab Bahasa Indonesia sehari-hari (BIS-BIMK) “Memuji kebaikan Tuhan”. Ende-enden ziarah enda termasuk salah sada ende-enden si iendeken kalak Yahudi sanga erdalan nangkih ku Yerusalem i bas ngerayaken 3 perayaan agama Yahudi si penting e me : Paskah, Pondok Daun, ras Pentakosta. I bas ende-enden ziarah enda teridah kiniteken bage pe pengarapen kalak Yahudi kerna jabu si ipasu-pasu Dibata. I bas si e lit telu hal penting i bas jabu kalak Yahudi erpalasken Masmur 127 e me : rumah entah pe ingan tading jabu, pendahin, ras pro-kreasi entah pe generasi penerus jabu. Telu hal enda situhuna saling erkaiten sada ras si debanna. Berikut enda penjelasenna.

Si pemena, tujun jabu ibenaken i bas rumah nari. Rumah labo saja igunaken sebage ingan tading tapi lit tujunna erpalasken kiniteken man Dibata. Emaka i bas ay. 1 ikataken, arus maka Dibata si mantekisa. Ertina Dibata arus jadi tiang si utamana gelah tujun jabu erpalasken kiniteken man Dibata banci terwujud e me : jabu jadi ingan ersembah man Dibata, jabu jadi ingan mbangun kiniteken si paguh man Dibata, janah jabu jabu ingan mbangun relasi si mehuli ras kerina isi jabu. Adi enggo ibenaken i bas jabu-jabu nari kerna Dibata si jadi tiang si utamana maka ise pe si ndarat i bas rumahna nari enggo pasti jadi pasu-pasu man masyarakat sekelewetna.

Si peduaken kerna pendahin. Dibata enggo erdahin nepa doni enda ras kerina isina, janah Dibata tetap erdahin guna ncukupi kebutuhen doni enda. E me si jadi palas kiniteken i bas erdahin. I bas ay. 2 teridah je secara tersirat pemahamen kiniteken kalak Yahudi kerna pendahin. Kai pe si idahiken guna ncukupi kebutuhen jabu arus leben ipalasi alu kiniteken maka Dibata ngenca si mereken rejeki man isi jabu, janah rejeki e ibereken Dibata alu keleng ateNa. Palas enda mabai ise pe si erdahin tuhu-tuhu ertanggung jawab i bas pendahinna, janah mpengasup jabu e menikmati hasil pendahinna.

Si peteluken kerna pro-kreasi entah pe nciptaken generasi penerus jabu si erkemalangen man Tuhan. Anak e me anugerah Tuhan si mbelin i bas jabu, emaka kerehen anak-anak i bas sada jabu usur imaknai sebage pasu-pasu Dibata. I bas ay. 3 ikataken, “anak-anak e, pasu-pasu i bas TUHAN nari kap”. I bas tradisi kalak Yahudi anak dilaki ernilai lebih asangken anak diberu. Emaka i bas terjemahen bhs. Indonesia ikataken, “anak-anak lelaki adalah milik pusaka dari pada TUHAN”. Tapi i bas kinitekenta anak dilaki entah diberu seri nilaina duana milik pusaka i bas Dibata nari man banta. I bas ay. 4 ikataken maka anak ipebali ras anak panah i bas tan si mbisa. “Si mbisa” e me gambaren kita orangtuana. Maksudna masa depan anak-anakta bergantung i bas kita nari orangtuana. Ku ja siarahken masa depan anak-anakta, ku si mehuli entah ku si la mehuli? Tentu arapenta gelah anak-anakta memiliki masa depan yang cerah ras jadi kebangganta labo jadi kemalun man banta orangtuana. Emaka i bas ay. 5 ikataken, “Sangap kap kalak si melala anak panahna si bage” nggambarkenca hasil akhir i bas sada proses si gedang nari i bas pebelin-belin bage pe membentuk karakter anak-anakta. Ertina sope datken kesangapen e lit proses si arus idalanken orangtua i bas nciptaken generasi penerus jabu si erkemalangen man Tuhan.

Yesus Kristus i bas pelayanenNa labo mbeda-bedaken pelayanenNa man kalak si dewasa bage pe pelayanen man anak-anak. Kerinana datken pelayanen si seri kualitas ras kuantitasna. Sebab anak-anak i bas pemahamen Yesus labo manusia si lenga lengkap tapi manusia seutuhna si arus datken keselamaten bagi kalak si enggo dewasa (bdk. Mat. 18:3-5,10; Mat. 19:13-15).

Tema si seh man banta i bas rangka menyambut HUT KAKR tahun enda e me “Anakku kandu-kanduku” alu tujun gelah Mamre banci mereken perhatian ras waktu si cukup man anak-anak, bage pe ngasup mbangun hubungen emosional si erat antara bapa ras anak. Kandu-kandu ertina sahabat yang tidak terpisahkan, teman karib, ras teman bermain. Arah tema-nta sendah iajuk kita gelah namaken i bas pola rukurta maka anak-anakta e me kandu-kanduta. Engkai maka bage? Sebab memang i bas tradisinta urusen anak-anak biasana jadi tanggung jawab Moria. Adi tanggung jawabta Mamre hanya memenuhi kebutuhan hidup jabu. Erkiteken si e maka rusur terjadi Mamre si kurang komunikasina ras anak-anak, tempa-tempa bagi la lit ikatan batin ras anak-anak. Adi la lit ikatan batin emaka la iteh kita kai si jadi perukuren, perasaan, bage pe sura-sura anak-anakta. Maun-maun sekalina kita ngerana ras anak-anakta usur sibaba rawanta asangken leben ndengkehken kai si jadi perukuren, perasaan, bage pe sura-sura anak-anakta.

Tapi gundari enggo melala Mamre si tuhu-tuhu erkemalangen man Dibata. Amin pe enggo latih erdahin ibana ka waktuna si khusus guna menjalin relasi si mehuli ras anak-anakna gelah terjalin ikatan batin entah pe ikatan emosional si ndeher. Emaka i bas PA-nta sendah iajuk kita gelah erlajar arah bahan ogenta. Si pemena, mari radu ras kita njadiken rumahta ingan ersembah man Dibata, ingan mbangun kiniteken si paguh man Dibata, ras ingan mbangun relasi si mehuli ras kerina isi jabu. Adi enggo si mehuli sibenaken i bas rumahta nari, ndarat kita i bas rumahta nari jadi pasu-pasu kita man kalak si deban. Si peduaken, tutus kita i bas pendahinta. Si peteluken mari radu ras kita nciptaken generasi penerus si erkemalangen man Dibata alu pengajaren-pengajaren si mehuli sue ras Kata Dibata, baik i bas pengerananta bage pe teladanta.

Selamat HUT ninta man KAKR GBKP, mari radu ras sidukung pelayanen man anak-anakta i bas KAKR, bagi si enggo iteladanken Yesus i bas pelayanenNa, bage ka sibahan dukungenta man KAKR, baik secara moril bage pe materil, gelah reh meningkatna kualitas bage pe kuantitas pelayanenta man generasi penerus Gereja si berhasil i bas geluh kinitekenna, karirna, bage pe perjabunna i bas sada paksa waktu kari. Memang labo hal si murah i bas proses nciptaken generasi penerus si sukses i bas kai pe, tapi teklah kita maka Dibata si mpengasup ras mpegegehi kita.