PA Kategorial GBKP Tgl. 23 - 29 April 2017

PA MORIA GBKP TGL. 23 - 29 APRIL 2017

Pdt. Larena br. Sinuhadji (Nd. Rey Tarigan)

Terpenalem : Tanda Perbeliten Jabu

Si Man Ogen : Pengerana 11:1-6

Tema : EKONOMI KREATIF

Tujun : Gelah Moria :

1) Niksiki perbahanen kalak pentar i bas ngembangken usaha

2) Pentar ngidah ras makeken “peluang-peluang” usaha guna kiniulin perbeliten jabu

Metode : Testimony

Penjelasan Bahan Ogen & Renungen

Kitab Pengerana (Pengkhotbah) itulis sekalak si enggo lanjut umurna ras berhasil i bas geluhna. Ia ngerenungken kerna kai ertina geluh enda. Erbage-bage pengalamen ialamina, subuk si bagi ukur bage pe si lang. Aminna lit sikap pesimis i bas ndalani geluh enda (sabab usur ikatakenna, “sia-sia geluh enda”) iajarkenna manusia gelah tutus ras ergiah-giah i bas erdahin, janah nggeluh alu dem keriahen ukur ngaloken pemere-pemere Dibata asa bancina. Khususna bas PA sekali enda mabai kita Moria gelah ngidah ras makeken peluang usaha si deban guna kiniulin perbeliten jabu.

Ay. 1-2 i bas bhs. Karo ikataken, “Berekenlah ertandu man kalak si ndauh i kepar lawit”, sedangken TB-LAI nina, “Lemparkanlah rotimu ke air, maka engkau akan mendapatnya kembali lama setelah itu”. Para penafsir ngertikenca roti sebage metafor. Roti (gandum) merupaken barang ekspor si biasa iangkut alu kapal i Palestina nari. I bas paksa si e, usaha-usaha perdagangen ras angkutan maritim i Palestina enggo merupakan hal si semal idalanken. Ertina, enda merupkan saran gelah manusia banci mengembangken usahana, alu ningkatken ekspor. Awalna memang lenga siidah asilna, tapi kedungenna banci inanami. Membangun ekonomi kreatif entah pe usaha sampingen si banci nampati perbeliten jabu. Sabab la sieteh kita kerna wari si pepagi. Bagi nina peribahasa “Hari kemarin tidak dapat ditarik kembali, hari esok tidak dapat diprediksi”. Ertina kegeluhenta enda la banci terantusi kita 100%, siakap mulus, mejile, berhasil tapi banci ka gagal. E maka arus metenget, waspada ras siap sedia katawari paksa pe.

Ay. 3-4, i jenda alam ipake sebage gambaren guna ncidahken bencana si bakal reh, si la banci iolangi adi kin reh atena. Adi enggo mendung, tanda-tanda reh atena udan. Bage pe i bas batang kayu si mbulak, la banci siolangi bahkan la banci sitentuken ku ja perdabuhna. Adi sibandingken ku bas bencana-bencana si mekatep terjadi i bas paksa enda : banjir bandang, erupsi deleng berapi, tsunami, rsd., si terkadang reh tiba-tiba. Walaupe situhuna i bas bencana si terjadi lit tanda-tanda icidahkenna banta guna mpersingeti kita, terkadang musibah e terjadi alu la banci sihindarken. Janah walaupe lit musibah terjadi i bas kegeluhenta, labo e banci ngolangi kita guna berusaha. I bas kerina situasi, subuk bagi ukur la bagi ukur arus tetap kita erdahin, erusaha. Adi soal resiko, pasti nge lit lalap resikona i bas kita erdahin. “Kalak si lalap nimai wari mehuli, lalap la kari ia merdang, la kari ia rani”. Enda kerina soal ketutusen ras berani mengambil peluang.

Ay. 5, dahin Dibata si mada kuasa la ise pe banci ngantusisa, desken la kita ngasup ngantusi pemenan kegeluhen i bas bertin. Alu bage manusia tetaplah ernalem man Dibata.

Ay 6, Pengerana mpersingeti si ngoge kitabna gelah tetap erdahin, “tupung erpagi-pagi arus merdang, bage pe tupung berngi”. Apakah ayat enda mabai kita untuk terus-menerus erdahin, “gila kerja”, piah dungna la lit nari waktu guna pekesahken ras bersosialisasi ras si deban. I bas si enda tetap kita arus bijaksana, makeken waktu-waktu si enggo ibereken Tuhan. Labo arus terus-menerus erdahin, tapi makeken peluang si lit secara efektif ras efisien.

Adi ngerana kita soal erdahin, enda merupaken cirinta manusia, panggilenta. Jansen H. Sinamo i bas bukuna 8 Etos Kerja ngantakenca : “Kerja adalah rahmat, kerja adalah amanah, kerja adalah panggilan, kerja adalah ibadah”. Ertina, erdahin e merupaken pemere Tuhan banta, amanah, tanggung jawab si arus sidahiken kita ras e merupakan ibadahta, pengataken bujurta man Tuhan. Terlebih selaku kita Moria sebage penampat man pasangenta, maka enggo semal suami-istri erdahin guna ncukupi kebutuhen jabu. Tapi terkadang anak-anak menjadi korban erkiteken pertumbuhen ras perkembangenna kurang siperdiateken. E maka, gundari melala Moria si enggo pentar ngidah ras makeken peluang i bas ngelitken ekonomi si kreatif. La perlu erdahin i luar rumah, ertina anak-anak tetap banci siperdiateken, tapi usaha tetap banci sidalanken. Ekonomi kreatif ertina, makeken infomasi si cepat ras mendayagunaken talenta entah pe keterampilen si lit bas kita. Umpamana, usaha on-line, daur ulang sampah menjadi barang-barang si menarik, menanam tanaman i bas polibag walaupe la lit halaman si luas, fashion baju-baju daerah, kuliner makanan daerah si imodifikasi alu rasa si modern (cimpa rasa keju, kacang hijau, coklat), rsd. Alu bage, selain kita banci nampati perbeliten jabu, rumah tangganta pe tetap banci sikepkep alu mehuli.

PA MAMRE GBKP TGL. 23 - 29 APRIL 2017

Nrs. Pdt. L. br. Sinuhadji (Bp. Rey Tarigan)

Muat Bagin I Bas Dahin-dahin Gereja

Ogen : 2 Raja-raja 4:8-10

Tema : TANGGUNG JAWAB MAMRE I BAS GEREJA

Tujun Gelah Mamre ertanggung jawab nikapken kebutuhen pelayanen GBKP

Metode : Diskusi & Aksi

Penjelasen Bahan Ogen & Relevansi

Bahan ogenta sekali enda telu ayat ngenca si nurikenca kerna keluarga kalak bayak i Sunem nari si mehuli perbahanenna man nabi Elisa (Sunem e me salah sada kota i Israel, 40 km i sebelah utara kota Samaria. Sunem e me salah sada wilayah si ibagiken jadi sikerajangen suku Isakar sanga pembagin taneh man 12 suku Israel i bas Josua 19:18). Ituriken i bas bahan ogenta, lawes nabi Elisa ku Sunem. La ituriken guna kai Elisa reh ku Sunem, tapi si pasti guna dahin-dahin pelayanenna sebage sekalak suruh-suruhen Dibata si gantiken nabi Elia. Lit i bas kota e sekalak diberu bayak janah itenahken diberu e Elisa ku rumahna guna radu ras man. Benaken i bas wari e nari, setiap nabi Elisa reh ku Sunem i rumah keluarga kalak bayak e ia rusur man. La ituriken piga kali nabi Elisa ras suruh-suruhenna reh ku Sunem, tapi si pasti labo sekali ngenca nabi Elisa reh ku rumah diberu bayak e. Ertina diberu bayak enda ndai kalak si mehuli janah labo keberaten ia ras keluargana ngalo-ngalo kalak si lenga itandaina kel i rumahna.

I bas ay. 9-10 ituriken maka iteh diberu bayak enda ise Elisa. I bas Alkitab BIS-BIMK ikataken nina, “Saya yakin bapak yang sering mampir di sini itu sungguh-sungguh seorang hamba Allah”. Kenca enggo itehna maka Elisa enda sekalak suruh-suruhen Dibata, runggu ia ras perbulangenna guna erbahan sada bilik kitik i babo tarum, je nari itamaken i je sada ingan medem, sada meja, sada kursi, ras sada lampu, gelah adi reh kenca nabi Elisa ndahi keluarga e banci ia tading i je. Bagem enggo ersada arih keluarga enda guna erbahan sada kamar khusus guna Elisa janah ilaksanakenna. I bas ayat berikutna ituriken maka i bas kunjungen berikutna, enggo banci igunaken nabi Elisa kamar khusus ndai guna ia pekesahken raduken ras Gehasi suruh-suruhenna. I bas turi-turin enda teridah maka diberu bayak si la isebutken gelarna enda labo saja mehuli perbahanenna man nabi Elisa alu nenahken ia ras suruh-suruhenna man i rumahna, tapi iukurkenna ka terdauhen kai si jadi keperlun nabi e. Sanga isungkun nabi Elisa kai si banci ibahanna sebage tanda pengataken bujurna i bas kerina si mehuli si enggo ibahanna, erjabab diberu bayak e i bas ay. 13 nina, “Kerina keperlunku enggo cukup dat aku i tengah-tengah bangsangku”. Adi kalak si deban mungkin enggo imanfaatkenna nabi e, tapi diberu bayak enda lang, tuhu-tuhu la iarapkenna balasen i bas kerina si mehuli si enggo ilakokenna.

Mungkin tersungkun-sungkun kita, uga makana isebutken i bas turi-turin e diberu bayak, labo dilaki bayak si jadi perbulangenna? Adi sioge terdauhen turi-turin enda, diberu bayak e me si jadi fokus turi-turin, sebab i bas turi-turin berikutna ituriken maka ipelemiken Dibata sekalak anak dilaki man diberu bayak enda. Tapi kenca enggo galang maka mate anakna e janah ipegeluh Dibata mulihken erkelangken nabi Elisa. Turi-turin enda labo terjeng nuriken perbahanen si mehuli si ilakoken diberu bayak enda tapi nuriken kerna kinitekenna si paguh i bas ia mindo gelah ipegeluh mulihken anakna si enggo mate (ay. 22-37). Tapi amin bage gia erlajar kita arah inisiatif si mehuli si enggo ilakoken diberu enda ras keluargana i bas ia ngukurken bage pe nampati secara proaktif dahin-dahin pelayanen nabi Elisa bage pe kinitekenna si paguh. Er-inisiatif ras proaktif i bas ngukurken ras nampati dahin-dahin pelayanen erpalasken kiniteken si paguh, e me si jadi fokus i bas PA-nta sendah.

PA-nta sendah lit i teruh judul “Muat bagin i bas dahin-dahin Gereja”, tema-nta sendah e me “Tanggung jawab Mamre i bas Gereja” alu tujun gelah Mamre ertanggung jawab nikapken kebutuhen pelayanen GBKP. Mejile pe program-program si lit, melala pe fasilitas guna dahin-dahin pelayanen, entah melala pe si ersura-sura si mehuli guna kemajun Gereja, si e kerina labo banci terlaksana adi la lit dukungen bage pe dahin si nyata i bas kerina jemaatna nari. Gereja adi terjeng gedungna (fasilitasna) entah pe program-programna ngenca e me labo Gereja si nggeluh. Gereja si nggeluh e me kita. Ertina kerina kita iutus guna muat bagin i bas dahin-dahin pelayanen i bas Gereja. Janah Gereja si nggeluh e me si memfasilitasi kerina jemaatna guna erpartisipasi aktif i bas dahin-dahin pelayanen.

Adi menurut pengamaten kami, enggo melala Mamre si ikut muat bagin i bas dahin-dahin pelayanen i bas GBKP. Enggo melala Mamre si itehna tugas tanggung jawab pelayanenna i bas GBKP. Labo terjeng nikapken kebutuhen pelayanen GBKP tapi enggo melala Mamre si er-inisiatif ras proaktif i bas ngukurken ras ngelaksanaken dahin-dahin pelayanen. Saja ngenca mungkin perlu lebih sitingkatken kualitas ras kuantitasna. Erlajar kita arah ogenta sendah. Er-insiatif ertina labo man suruh-suruhen entah pe man endik-endiken. Ersuruh pusuh perukurenna guna muat bagi i bas dahin-dahin pelayanen. Uga carana maka banci reh teremna Mamre si er-inisiatif? Enda tentuna labo hal si murah. Mungkin ibenaken i bas pembagian peran entah pe tugas pelayenen si merata i bas Mamre. I bas hal enda mungkin awalna pengurus lebe si er-inisiatif ningkatken fungsi-fungsi si lit i bas kepengurusenna. Sebab maun-maun lit pe pengurus i bas bidang-bidang marturia, diakonia, ras koinonia tapi kurang berfungsi alu mehuli. Adi pengurus pe enggo er-inisiatif tentuna enda jadi usihen si mehuli man anggota-anggotana.

Proaktif ertina labo wari-warin, tapi konsisten entah pe konstan i bas ngelaksanaken dahin-dahin pelayanen. I bas si e si nibutuhken e me kebeluhenta guna ngaturken waktu si lit, ertina pendahinta si tep-tep wari labo terbengkalai tapi lit denga waktunta guna dahin-dahin pelayananen i bas Gerejanta. Si debanna si nibutuhken e me ketutusenta (tekun) i bas ngelaksanaken dahin-dahin pelayanen. Adi lit tugas tanggung jawab si ipercayaken man banta, umpamana, sidahikenlah alu tutus ras erkedungen alu mehuli. Erlajar kita arah diberu bayak i Sunem nari, lit bas ia kiniteken si paguh maka ngasup ia nampati pelayanen nabi Elisa. Ertina palasta i bas er-inisiatif bage pe proaktif i bas dahin-dahin pelayanen e me kinitekenta si paguh man Dibata. Emaka pindolah gegeh i bas Dibata nari gelah iberekenNa pusuh perukuren si ersuruh ras ergiah-giah i bas dahiken dahin-dahin pelayanen i bas Gerejanta. Sebab Kesah si Badia ngenca si ngasup erbahanca Mamre ersuruh ras ergiah-giah pusuh perukurenna. Janah pindolah pasu-pasu si simpar i bas Dibata nari gelah ipengasupNa kita nikapken kerina si jadi kebutuhen pelayanen i bas GBKP arah kerina si lit i bas kita. Ertoto kita gelah arah pelayanenta si mehuli reh majuna Gerejanta janah gelar Dibata semakin imuliaken.