Khotbah GBKP Minggu Tgl. 2 April 2017

KHOTBAH GBKP MINGGU TGL. 2 APRIL 2017

Pdt. Larena br. Sinuhadji (Nd. Rey Tarigan)

MINGGU PASSION 6

(Judika : “Cidahkenlah Kerajangku Bujur O Jahwe”)

(Warna Stola : Ungu)

Invocatio : “Adi kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena” (Roma 8:6)

Ogen : Esekiel 37:1-14 (Tunggal)

Khotbah : Roma 8:6-11 (Tunggal)

Tema : NGGELUH I BAS SURA-SURA KESAH SI BADIA

Penjelasen Bahan Pustaka Si Badia

Ogenta nuriken kerna pengenehenen nabi Esekiel si igejapkenna kuasa Tuhan arah KesahNa nusur ku sada baluren si dem alu tulan-tulan si kerah kal. Sue ras si iperentahken Tuhan man bana, maka ernubuat nabi Esekiel, janah terjadi peristiwa si luar biasa. Tulan-tulan e kerina ersada, itutupi urat ras daging, jenari kuling. Tapi kula si nterem e lenga erkesah. Kenca enggo ilakokenna kai si iperentahken Tuhan man nabi Esekiel, bengket me kesah ku kula ndai, e maka nggeluh dingen tedis ia kerina, janah perban teremna, bias jadi sada bala serdadu si mbelin. Ay. 11-14 e me antusen kerna pengenehenen si nialami nabi Esekiel. Tulan-tulan si kerah e ngelambangken bangsa Israel si enggo kerah (bene, peltep) pengarapenna erkiteken lit i bas kiniseran si mesangat i bas pembuangen. Italangi Dibata i bas kuburen nari tulan-tulan e, ertina ipulahi Dibata bangsaNa e i bas kiniseran nari i taneh pembuangen. Itamaken Dibata KesahNa i bas bangsaNa e, maka nggeluh bangsaNa e mulihken. Ertina ipekeke Dibata pengarapen, semangat, optimisme si sempat bene ku bas bangsaNa, e maka erpengarapen, ersemangat, ras optimis mulihken bangsaNa e. Iulihken Dibata bangsaNa e ku negerina. Kerinana ilakoken Dibata gelah iteh bangsaNa e maka Dibata e me TUHAN si mada kuasa si ngasup mpekeke semangat, pengarapen, optimisme si mbaru, Dibata si ngasup mulahi bangsaNa i bas perbeben si mberat ras si la banci lang isehkenNa kataNa e.

Bahan khotbahta e me surat i bas rasul Paulus nari man perpulungen i Roma. Khususna i bas bindu 8 enda, ngerana rasul Paulus kerna kegeluhen si mbaru rikutken Kesah Dibata. I bas bindu 7, rasul Paulus enggo nerangken kerna Undang-undang (Hukum Taurat) si situhuna badia i bas Dibata nari. Tapi erkiteken biak dosa si lit i bas manusia, maka la lit ise pe si ngasup ngelakoken kerina si lit i bas Undang-undang e gelah terkelin, sebab biak dosa e erbahanca pusuh manusia ikuasai sura-sura ukur manusia si la ngasup patuh nandangi Undang-undang e. Emaka si perlu leben imasapken e me biak dosa i bas diri manusia gelah Undang-undang si badia e ngasup idalanken manusia i bas sikap entah pe cara pandang si mbaru. I bas bindu 8:1-5 iterangken rasul Paulus maka Dibata enggo ngutus AnakNa si tonggal guna naluken dosa i tengah-tengah doni enda. Erkiteken dosa enggo italuken Dibata i bas Yesus Kristus maka kerina kalak si tek enggo ersada ras Kristus janah enggo lit bas ia Kesah si biakna mereken kegeluhen. Kesah Dibata si lit i bas kalak si tek mpengasup ia ndalanken perentah si mehuli si lit i bas Undang-undang e. Asumsina tentuna kalak si enggo ersada ras Kristus e me kalak si geluhna ikuasai sura-sura Kesah Dibata.

Ay. 6-11 si jadi bahan khotbahta sendah bagi persinget man perpulungen Roma. Penekanen lit i bas ay. 9-11 : 1) Perpulungen kalak si tek i Roma searusna nggeluh rikutken sura-sura Kesah adi tuhu kin Kesah Dibata ringan i bas kam (ay. 9). Engkai maka ikataken “adi tuhu kin Kesah Dibata ringan i bas kam?” Mungkin erkiteken melala perpulungen Roma paksa si e si geluhna la ikuasai Kesah Dibata amin pe ngaku sebage kalak Kristen. E maka nina rasul Paulus, “Kalak si la lit Kesah Kristus i bas ia, la ia sikerajangen Kristus”. 2) I bas ay. 10 rasul Paulus ngingetken maka kalak si tek man Yesus Kristus searusna pertendinna nggeluh kap erkiteken Dibata enggo ngerembakken kalak si tek kempak diriNa. Ertina amin pe arus berjuang ngelawan kuasa dosa, labo jadi kebiaren erkiteken lit Kristus si enggo leben naluken kuasa dosa. 3) Perpulungen kalak si tek i Roma searusna geluh i bas kegeluhen si mbaru rikutken KesahNa si ringan i bas kalak si tek (ay. 11). E maka i bas invocationta enggo itegasken rasul Paulus maka kalak si pusuhna ikuasai Kesah Dibata nggeluh me ia dingen malem atena.

Aplikasi

Tema i bas kebaktinta sendah, i bas Minggu Passion si pe-6-ken enda ngingetken kita mulihi kerna Kesah si Badia si ringan i bas kita kalak si tek man Yesus Kristus. Kesah si Badia, Kesah Dibata, entah Kesah saja, e me terjemahen i bas bahasa Ibrani nari ruakh, si iterjemahken ku bas bahasa Yunani pneuma. I bas ijadikenna doni enda nari seh asa gundari pendahin Kesah Dibata enda la erngadi-ngadi. Janah i bas pengakun kiniteken si usur ibelasken kita i bas kebaktin-kebaktin lit je pengakun kerna Kesah si Badia si jadi sada bagin si la terpisahken i bas Dibata Bapa ras Yesus Kristus. Benaken i bas peristiwa pentakosta nari, Kesah si Badia semakin dominan peranna i bas Gereja ras kerina kalak si tek man Yesus Kristus, seh kari ku maranatha, kerehen Yesus si peduakaliken.

I bas Pustaka si Badianta melala je ituriken kerna pendahin Kesah Dibata enda. I bas ogenta, Kesah Dibata tuhu-tuhu erdahin i bas mpekeke semangat ras pengarapen bangsa Israel si enggo bene erkiteken kiniseran si mesangat i bas pembuangen. Labo terjeng je saja, Kesah Dibata mpengasup bangsa Israel mbangun mulihken Yerusalem kenca enggo mulih i bas pembuangen nari. Enda kerina isaksiken nabi-nabi i bas paksa pembuangen ras kenca pembuangen termasuk je nabi Esekiel. I bas paksa Gereja Perdana i ja rasul-rasul erdahin guna majekken kula ni Kristus, je pe Kesah si Badia erdahin mpegegehi perpulungen kalak si tek. I bas dirinta paksa gundari, sebage kalak si tek man Yesus Kristus, Kesah si Badia pe tuhu-tuhu erdahin i bas kegeluhenta. Saja ngenca bagi perpulungen kalak si tek i Roma, melala denga kalak si tek si ikuasai sura-sura daging entah pe sura-sura ukur manusia amin pe enggo ngakuken Yesus Kristus sebage Tuhan ras Juruselamatna. Engkai maka hal enda banci terjadi?

Rasul Paulus nasikennca maka ia pe lit i bas perjuangen ngelawan kuasa sura-sura manusia ras kuasa dosa i bas dirina. Ertina, nggeluh sebage kalak si enggo ngaloken keselamaten labo berarti bebas i bas kuasa dosa bage pe kuasa sura-sura ukur manusia nari. Tapi erkiteken kuasa Kristus si enggo naluken dosa, perjuangen rasul Paulus guna ngelawan kuasa sura-sura ukur manusia bage pe kuasa dosa labo perjuangen si sia-sia. Ipengasup Kesah Dibata ia i bas perjuangenna guna naluken kuasa dosa ras sura-sura ukurna. Kita pe bage nge, tapi syaratna sedar maka kita enda kalak si tek si enggo ersada ras Kristus, janah tuhu-tuhu lit Kesah si Badia i bas dirinta. Kenca enggo isedari kita maka lit kuasa Kesah si Badia i bas dirinta, berekenlah dirinta ikuasai Kesah si Badia gelah ipengasupNa kita ngelakoken kerina si jadi peraten Dibata. Sebab maun si terjadi, la isedari kita maka lit kuasa Kesah Dibata i bas dirinta, e maka usur siandalken gegeh pentarta i bas kita ngalaken kerina perbeben i bas geluhta. Maun si terjadi, siandalken kita denga gegeh pentarta amin pe enggo isedari kita lit kuasa Kesah Dibata i bas dirinta. Ertina, sendah isingetken mulihi kita gelah tuhu-tuhu kita nggeluh rikutken sura-sura Kesah si Badia, emaka serahkenlah dirinta man Kuasa si Badia gelah ipengasupNa kita ngelakoken kerina si jadi peraten Dibata i bas kegeluhenta.