PJJ GBKP Tgl. 9 - 15 April 2017

PJJ GBKP TGL. 9 - 15 APRIL 2017

Pdt. Larena br. Sinuhadji (Nd. Rey Tarigan)

Tema : NGGELUH I BAS PENGARAPEN (1 Petrus 3:17-20)

Penjelasen Bahan Ogen & Renungen

Bahan ogenta e me sebagin pedah-pedah ras pergegeh rasul Petrus nari man perpulungen kalak Kristen si merap i daerah Pontus, Galatia, Kapadokia, Asia, ras Bitinia (wilayah negara Turki gundari) si sangana lit i bas kiniseran erkiteken kinitekenna man Yesus Kristus. I bas Pustaka si Badia bahan ogenta termasuk i bas perikop alu judul “Ngenanami kiniseran erkiteken perbahanen si mehuli” benaken ay. 8 a nari, i bas Alkitab TB-LAI masuk i bas perikop alu judul “Menderita dengan sabar” benaken ay. 13 nari. Arah dua judul enda nari banci idatken sitik gambaren kerna perpulungen kalak Kristen si paksa si e ngenanami kiniseran erkiteken perbahanenna si mehuli, janah kiniseran e arus ilawan alu saber. Mungkin akap kami lebih lengkap adi sioge benaken ay. 8 nari.

Ay. 8 mindo rasul Petrus man perpulungen gelah ersada i bas penggejapen, sikeleng-kelengen, mesayang, dingen meteruk ukur sada ras si debanna. Adi ersada perpulungen sada ras si debanna maka kiniseran si mberat sekalipe banci ihadapi alu radu ras saling nampati ras mendukung. Ay. 9-10 e me pengajuk gelah masu-masu kalak si erbahan jahat sebab perpulungen pe enggo ngaloken pasu-pasu i bas Dibata nari. Ay. 11-13 e me pengajuk gelah tetap erbahan si mehuli ras bujur nandangi kalak si jahat, sebab Tuhan tetap natap kempak kalak bujur, janah tetap ibegikenNa pertotonna. Ay. 14-16 e me kata-kata pergegeh si memotivasi gelah megenggeng. Amin pe enggo tuhu-tuhu erbahan si mehuli dingen bujur tapi tetap denga ngenanami kiniseran, ola mbiar ras aru ate tapi er-“malem ukur” (terj. Bhs. Ind., nina “kamu akan berbahagia”). Ertina perpulungen iajuk gelah mengubah sudut pandang kerna kiniseran i bas si negatif nari jadi positif gelah pusuh peratenna tetap bersih.

Ay. 17-18 e me sambungen i bas ay. 14-16 nari gelah tetap erbahan si mehuli ras bujur. Ulin ngenanami kiniseran erkiteken perbahanen si mehuli, asangken erkiteken perbahanen si jahat. Sebab si mehuli memang e me sura-sura Dibata, amin kai pe resikona tetap arus silakoken. Janah Yesus Kristus enggo mereken teladan kerna ngenanami kiniseran erkiteken perbahanen si mehuli. Kiniseran Kristus labo saja naluken dosa tapi pe mabai kalak si tek rembak ras Dibata. Ay. 19-22 nuriken kerna Kesah si Badia si lit i bas Kristus enggo erdahin nai-nai nari, ras seh asa gundari pe tetap denga erdahin. Nai Kesah si Badia e erdahin arah nabi-nabiNa, sanga Yesus Kristus geluh denga Kesah si Badia erdahin i bas Yesus Kristus, janah i bas paksa Gereja Perdana Kesah si Badia tetap erdahin i bas perpulungen kalak si tek seh ku kerehen Yesus Kristus si peduakaliken.

Tema si seh man banta i bas PJJ sendah e me “Nggeluh i bas pengarapen”. Tema kerna pengarapen memang lit i bas surat rasul Petrus man perpulungen kalak si tek paksa si e, baik secara tersurat bage pe secara tersirat. Secara tersurat salah sadana banci ioge i bas bindu 1:1-12. Secara tersirat salah sadana i bas bahan ogenta sendah alu kata-kata persinget ras pergegeh man perpulungen si paksa si e sanga ngenanami kiniseran erkiteken kinitekenna man Yesus Kristus. Pengarapen ertina i bas bahasa Indonesia : suatu dambaan atau penantian akan terjadinya sesuatu yang baik. I bas Pustaka si Badia pengarapen biasana ikaitken ras “penantian yang penuh kerinduan” bage pe “percaya dan penuh keyakinan” kerna keselamaten i bas Dibata nari. Secara khusus i bas Padan si Mbaru pengarapen e er-fokus ku Yesus Kristus, sebab i bas Yesus Kristus ngenca Dibata nehken padanNa kerna keselamaten man doni enda. E maka isi pengarapenta i bas Yesus Kristus seri ras pengarapen perpulungen kalak si tek si jadi tujun surat rasul Petrus, e me : pasu-pasu, penemani - pengkawali, pergegeh, penghiburen, kesabaren, kinigenggengen, rsd., seh ku kerehen Yesus Kristus si peduakaliken.

Kinitekenta mabai kita ku bas pengarapen. Sedangken pengarapen belin kel kuasana guna mpeteguhi kinitekenta, janah pengarapen mpeturah kinipangen (keberanian) ras kinigenggengen i bas kita ngadapi kerina perbeben bage pe kiniseran erkiteken kinitekenta man Yesus Kristus (1 Pet. 1:3-9, 3:14-16). I bas si e geluh i bas pengarapen seri ertina ras geluh i bas kiniteken si payo man Yesus Kristus. E maka nina rasul Paulus i bas 1 Kor. 13:13, “lit telu si tetap arus idalanken, e me : erkiniteken man Tuhan, erpengarapen man Dibata, erkeleng ate man kalak si deban”.

PJJ-nta sendah lit i bas Minggu Kiniseran (Minggu Palmarum - Minggu Sengsara) e me sada prosesi i bas penyambuten Yesus i Yerusalem nari (wari Minggu nderbih, Palmarum), Kamis Badia, Jumat si Mbelin, Sabtu Pengarapen, ras Paskah. Enda me sada paksa si tepat guna kita ngerenungken mulihi kerna geluh erkiniteken ras erpengarapen seh ku kedungenna bagi si enggo leben iteladanken Yesus Kristus man banta. Adi lit kita si sedekah enda kurang denga erkiniteken bage pe erpengarapen man Yesus Kristus erkiteken erbage-bage sebab, ogenta sendah ngingetken kita gelah mulihken kita ku kiniteken ras pengarapen si payo i bas Yesus Kristus. Adi lit kita si paksa enda sanga ngenanami perbeben si mberat, tek kita maka Dibata si mpegegehi kita, i bas paksaNa si tepat iberekenNa serpang pulah i bas perbebenta si mberat nari. Man banta si enggo tuhu-tuhu geluh i bas kiniteken ras pengarapen si payo i bas Yesus Kristus, ertoto kita gelah reh paguhna kiniteken bage pe pengarapenta.