PA Kategorial GBKP Tgl. 2 - 8 April 2017

PA MORIA GBKP TGL. 2 - 8 APRIL 2017

Pdt. Larena br. Sinuhadji (Nd. Rey Tarigan)

Terpenalem : Tanda Ndidik Anak

Ogen : 2 Timotius 3:10-17

Tema : NEHKEN PENGAJAREN SI KUH

Tujun : Gelah Moria :

1) Nggargari pengajaren si ipeseh Paulus man Timotius

2) Terpenalem ngajarken anak alu mereken usihen

Metode : Menginventarisasi Bentuk-bentuk Kecerdasan

Penjelasen Bahan Ogen & Relevansi

1. Timotius (Yun. Τιμόθεος ertina “memuliakan Tuhan”) e me sekalak ajar-ajar rasul Paulus si penting si ipercaya Paulus (1 Kor. 4:17; 16:10; 2 Kor. 1:19). I bas piga-piga surat rasul Paulus gelar Timotius usur isebutken (2 Kor. 1:1; 1 Tes. 1:1; Pilemon 1). Timotius enggo ianggap Paulus bagi anakna sendiri (1 Tim. 2:1). Gelar Timotius masuk jadi salah sada kitab i bas Pustaka si Badianta e me salah sada surat si ipeseh rasul Paulus man ajar-ajarna. Ertina sosok Timotius enda iakui Gereja-gereja Perdana sebage sekalak tokoh si layak iteladani pengkebet geluhna. I bas tradisi kalak Katolik ras Ortodoks, ikataken Timotius itangkuhken rasul Paulus jadi pimpinen Gereja i Epesus i bas tahun 65, ngelai perpulungen Epesus 15 tahun dekahna, janah mate i bas tahun 97 i Epesus i bas usiana 80 tahun. I bas tradisi e ituriken kematen Timotius erkiteken erkhotbah ia gelah perpulungen ula ngikuti prosesi penembahen berhala, erkiteken si e merawa kalak Epesus, ibenteri kalak si merawa e alu batu seh ku kematenna.

2. Ogenta sendah e me surat si peduaken si isehken rasul Paulus man Timotius. Teridah maka Timotius enda e me sekalak ajar-ajar si patuh, iikutkenna kerina si mehuli si iajarken Paulus i bas teladan geluhna ras pelayanenna (ay. 10-13). Ay. 14-17 e me pergegeh man Timotius gelah tetap ndalanken si benar sue ras peraten Dibata, tetap erpenggurun man Dibata arah erlajar Pustaka si Badia gelah semakin iperlengkapi i bas pelayanenna. I bas sada sisi, banci kita erlajar arah rasul Paulus si ngajari Timotius labo saja arah pedah-pedahna tapi arah teladan geluhna. Tapi i bas sisi si deban banci ka kita erlajar arah kegeluhen Timotius. Engkai maka bagi murah kel rasul Paulus ngajari Timotius? Sebab i bas pengalamen geluhta, melala anak-anakta si mesera kel man ajaren. Apai ka i bas kita si profesina sebage pengajar entah pe guru, tentu enggo iteh kita apai karakterisitik murid si murah kel iajari ras murid si mesera kel iajari. Tentu enda lit latar belakangna.

3. Timotius tubuh ras mbelin i tengah-tengah keluarga campuren i Listra nari, nandena kalak Yahudi Kristen, bapana sekalak si labo kalak Yahudi (Perb. Rasul 16:1). Pendidiken dasarna bage pe pendidiken kinitekenna idatkenna i bas ninina nari Lois ras nandena Eunike. Lois ras Eunike enda tuhu-tuhu berhasil menerapken pola pendidiken si seimbang antara pemeteh secara umum bage pe erkiniteken man Dibata. I bas 2 Tim. 1:5 ikataken rasul Paulus nina, “Kuinget tutus atendu erkiniteken bali ras kiniteken nini tudungndu Lois ras nandendu Eunike. Tek aku maka i bas kam pe lit kiniteken si bage”. I bas TB-LAI nina, “Sebab aku teringat akan imanmu yang tulus ikhlas, yaitu iman yang pertama-tama hidup di dalam nenekmu Lois dan di dalam ibumu Eunike dan yang aku yakin hidup juga di dalam dirimu”. Ertina pemeteh kerna kiniteken bage pe geluh erkiniteken si payo enggo tuhu-tuhu isehken Lois ras Eunike man Timotius. I bas 2 Tim. 3:15 ikataken rasul Paulus nina, “kitik-kitikndu nari enggo ietehndu kerna Pustaka si Badia, si ngasup mereken kepentaren man bandu, e me si mabai kam ku keselamaten arah kiniteken man Kristus Yesus”. Pola pendidiken dasar kalak Yahudi paksa si e termasuk je erlajar ngoge ras hafal Pustaka si Badia kitik-kitik nari. E pe enggo isehken Lois ras Eunike alu mehuli. E maka terbentuk mentalitas pembelajar yang baik i bas diri Timotius, si erbahanca bagi murah kel rasul Paulus ngajari Timotius.

4. Akap kami pola pendidiken si seimbang enda perlu jadi usihenta. Sebab jaman gundari enda melala orangtua si tutussa nekolahken anak-anakna seh ku tingkat doktor, tapi la seimbang kualitas ras kuantitasna i bas pendidiken erkiniteken si payo man Dibata. Melala kuantitas ras kualitas sikeriken guna pendidiken formalna ngenca. Apakah si e la payo? Payo, tapi adi la seimbang antara kecerdasan intelektual, emosional ras spiritual, emaka labo terbentuk mentalitas pembelajar yang baik bagi Timotius. Lit i bas ia kiniteken, kesaberen, kekelengen, ras kinigenggengen (ay. 10). Piah dungna anak-anakta la ia siap ndalani kegeluhenna amin pe meganjang sekolahna, sikap pendahinna, rsd. Sebab geluh enda kompleks sifatna, labo terjeng menguasai sada bidang ilmu seh ku tingkat doktor kenca bage enggo dung. Melala hal si deban i bas geluh si kompleks enda si membutuhken kebeluhen emosional ras spiritual : sabar, tekun, percaya diri, kinigenggengen, kekelengen, sikap hormat, menghargai sesama, rsd. Si e kerina biasana labo idatken anak-anakta i bas pendidiken formal.

5. Ateta min gelah anak-anakta sukses i bas pendidiken formalna seh ku tingkat si meganjangna, sikap pendahinna ras sikap geluh perjabunna i bas paksana kari, melala ertana tapi tutus erkiniteken man Dibata, dem alu kekelengen, sabar, megenggeng, mehamat man orang tua ras kalak si deban, ngasup ia ngergai ras erdiate nandangi kalak si deban, beluh erkomunikasi, beluh bekerja sama, rendah hati, pang menghadapi masalah ras ngasup erbahan jalan keluar si mehuli i bas masalah si nihadapina, rsd. E me arapenta kerina. Tapi si e kerina membutuhken komitmen ras kerja keras i bas kita nari orangtuana. I bas si e mari radu ras kita erlajar memanfaatkan waktu si lit alu payo gelah kerina bidang pendidiken si ateta ikuasai anak-anakta banci tersehi alu maksimal. Sipindo gegeh i bas Dibata nari gelah ipengasupNa kita nehken pengajaren-pengajaren si mehuli sue ras peraten Dibata arah pengkebet geluhta.

PA MAMRE GBKP TGL. 2 - 8 APRIL 2017

Nrs. Pdt. L. br. Sinuhadji (Bp. Rey Tarigan)

Mamre Erdiate Ras Ertanggung Jabab Nandangi Kesejahteran Masyarakat

Ogen : Jeremia 29:7

Tema : TANGGUNG JABAB MAMRE I BAS MASYARAKAT

Tujun : Gelah Mamre ikut ertanggung jabab ngukurken kiniulin masyarakat

Metode : Diskusi

Penjelasen Bahan Ogen & Relevansi

Bahan ogenta usur ijadiken dasar teologis i bas tanggung jawab sosialta i tengah-tengah doni enda. Ogenta e me pergegeh si isehken nabi Jeremia arah suratna man bangsa Israel si sangana lit i bas taneh pembuangen i Babel. Sope si e, enggo inubuatken nabi Jeremia maka 70 tahun ndekahna masa pembuangen i Babel (Jer. 25:11), tapi i bas ay. 10 ogenta sendah, ikataken nina, “Kenca bage nina TUHAN, “Adi enggo genep pitu puluh tahun kam i Babilon, Kuperdiateken me kam dingen padanKu pe Kusehken, maka Kubaba kam mulih ku tanehndu”. Kai si arus ilakoken bangsa Israel i taneh pembuangen Babel? Nimai-nimai bage-bage saja seh keri 70 tahun? Lang, ogenta sendah ngatakenca, “Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap”. I bas Alkitab TB-LAI nina, “Usahakanlah kesejahteraan kota ke mana kamu Aku buang, dan berdoalah untuk kota itu kepada TUHAN, sebab kesejahteraannya adalah kesejahteraanmu”. I bas Alkitab BIMK - BIS nina, “Bekerjalah untuk kesejahteraan kota-kota tempat kamu Kubuang. Berdoalah kepada-Ku untuk kepentingan kota-kota itu, sebab kalau kota-kota itu makmur, kamu pun akan makmur”. Ertina, keadaan si dem alu kiniulin, sikap, sejahtera, entah pe makmur i tengah-tengah bangsa e tading e me sura-sura Dibata.

Lit dua hal si penting i bas ogenta sendah : 1) Erdahin guna kiniulin kuta. 2) Ertoto guna keperlun kuta. Erdahin leben tujunna guna kiniulin kuta. Bage pe ertoto leben tujunna guna keperlun kuta. Kenca bage maka si idahiken ras itotoken bangsa e ersimulih man bana, “adi sikap ia kam pe ikut sikap”. Ertina lit kaiten si la terpisahken antara pendahinta bage pe pertotonta ras kalak si deban bage pe lingkungen sekitarta. Erdahin ras ertoto labo hanya guna kiniulin diri sendiri tapi lit je tanggung jawab sosialta. Tanggung jawab sosial enda labo terjeng sekedar kewajiben si sifatna umum i bas kita bermasyarakat, tapi palas kinitekenna jelas i bas ogenta sendah, e me perentah Dibata erpalasken sura-suraNa gelah lit keadaan si dem alu kiniulin, sikap, sejahtera entah pe makmur i japa pe kita ringan. Adi bangsa Israel iperentahken Dibata gelah erdahin ras ertoto guna keperlun ras kiniulin kuta-kuta i negeri Babel, e me ertina bangsa e arus nggit jadi alatNa nehken peraten Dibata. Kita pe iutus Dibata guna erdahin ras ertoto guna keperlun ras kiniulin masyarakat i sekelewetta.

PA-nta sendah lit i teruh judul “Mamre erdiate ras ertanggung jabab nandangi kesejahteran masyarakat”, tema-nta sendah “Tanggung jabab Mamre i bas masyarakat”, alu tujun gelah Mamre ikut ertanggung jabab ngukurken kiniulin masyarakat. Akap kami enggo melala Mamre si erdiate ras ertanggung jawab nandangi kesejahteraan masyarakat i sekelewetna alu umpamana : nggalari pajak, nggalari kerina iuren-iuren si lit i lingkungenna, ikut muat bagin i bas kerja-kerja bakti, njagai keamanen ras kebersihen lingkungen, adi lit sitik lebih penghasilena i bas pendahinna nari ipergunakenna guna nampati jiran-jiranna si membutuhken, mengkoordinir kegiaten-kegiaten si mehuli si tujunna guna nampati masyarakat i sekelewetna. Mungkin melala bentuk-bentuk si deban tandana Mamre enggo erdiate ras ertanggung jawab nandangi kesejahteraan masyarakat i sekelewetna si labo saja iukurken tapi tuhu-tuhu enggo ilaksanaken. Adi e kerina enggo ilaksanaken, ingetlah maka kita enggo ngelakoken kai si iperentahken Dibata man banta, janah e me bentuk konkrit kinitekenta man Dibata i bas Yesus Kristus.