Khotbah GBKP Minggu Tgl. 16 April 2017

KHOTBAH GBKP MINGGU TGL. 16 APRIL 2017

Nrs. Pdt. L. br. Sinuhadji (Bp. Rey Tarigan)

PASKAH

(Warna Stola : Mbentar)

Invocatio : “Janah adi la kin ipekeke Dibata e Kristus i bas si mate nari, sia-sia me kinitekenndu e janah kam tetap denga i bas dosandu” (1 Korinti 15:17)

Ogen : Masmur 118:1,2,14-24 (Responsoria)

Khotbah : Yohanes 20:1-18 (Tunggal)

Tema : ULA MBIAR, YESUS ENGGO KEKE

Penjelasen Bahan Pustaka Si Badia

Kekeken Yesus Kristus icatat i bas kerina kitab Injil (Mat. 28:1-10; Mrk. 16:1-8; Luk. 24:1-12; Yoh. 20:1-18), enda ncidahkenca maka kekeken Yesus iidah ras icatat melala saksi. I bas bahan khotbahta lit je isebutken piga-piga ajar-ajar Yesus e me : Maria Magdalena, Simon Petrus, ras sekalak ajar-ajar si deban si ikelengi Yesus. Rikutken piga-piga tafsiren, sekalak ajar-ajar si ikelengi Yesus e me Yohanes anak Zebedeus sebab ia sendiri si nuliskenca kitab Injil Yohanes. Janah i bas Mat. 17:1 ras Mrk. 5:37;14:33 teridah maka Yohanes, Yakobus ras Petrus lebih ndeher relasina ras Yesus asangken ajar-ajar si debanna. Maria Magdalena e me salah sada ajar-ajar Tuhan Yesus (Luk. 8:1-3) si tedis ndeher kayu persilang Yesus (Mrk. 15:40; Mat. 27:56; Yoh. 19:25), ia si naksiken sanga Yesus ikuburken (Mat. 27:57-61; Mrk. 15:42-47). Janah i bas bahan khotbahta Maria Magdalena jadi saksi si pemenana si ngidah kuburen Yesus enggo kosong ras ngidah Yesus si enggo keke. Enda tentuna sada hal si luar biasa erkiteken diberu paksa si e termasuk pihak si kurang ipercaya kesaksinna (Luk. 24:11). Kiam Maria Magdalena jumpai Petrus ras Yohanes erkiteken memang dua ajar-ajar Yesus enda ndeher ras Yesus. Kenca ituriken Maria Magdalena kejadin si baru denga iidahna, kiam ka Petrus ras Yohanes ku kuburen Yesus. I jenda teridah mehamatna Yohanes si ndauh ngudan asangken Petrus. Amin pe enggo leben ia seh i kuburen Yesus, tapi itimaina Petrus gelah leben Petrus si bengket ku kuburen. Ay. 9 e me keterangen si menarik, sebab leben enggo iangkai musuh-musuh Yesus kerna kekeken Yesus asangken ajar-ajarNa (bdk. Mat. 27:62-66), enda tentuna menjadi perenungen man banta engkai makana lenga tek ajar-ajar Yesus kerna kekekenNa? I bas Perb. Rasul 2:27 je makana iangka Petrus kerna kekeken Yesus bagi si enggo inubuatken i bas Padan si Ndekah (bdk. Mas. 16:10; Jes. 53:10-12; Hos. 6:2; rsd.). Ay. 17 e me kata-kata Yesus si enggo keke man Maria Magdalena nina, “Ola cikep Aku, sabap Aku langa ndahi BapangKu. Laweslah, jumpai senina-seninangKu janah kataken man bana, maka ningKu : Aku lawes ndahi BapangKu dingen Bapandu, ndahi DibataKu dingen Dibatandu”. “Ola cikep Aku” maknana ula nai ngarapken maka banci denga Yesus radu ras ajar-ajarNa bagi semalna, sebab kentisik nari lawes Yesus ndahi BapaNa, tapi lakokenlah kerina si enggo iajarkenNa sebab enggo seh paksana Kesah si Badia si erdahin i tengah-tengah ajar-ajarNa guna nuhi kerina si jadi peratenNa i tengah-tengah doni enda.

Ogenta si pemena e me Ende-enden Pujin pengataken bujur man TUHAN Dibata erkiteken : 1) KiniulinNa ras kekelengenNa tetap rasa lalap (ay. 1-2). 2) KuasaNa Dibata erbahanca megegeh, paguh, ras menang i bas perbeben entah pe kiniseran nari janah kuasaNa mabai kegeluhen si mbaru (ay. 14-18). 3) Ipebujur Tuhan ras idengkehkenNa pertoton kalak si erkemalangen man baNa janah ipengasupNa ngataken bujur (ay. 19-21). 4) Perbahanen Dibata si luar biasa si ngergaken kalak si lit i bas keterpuruken, alu anding-andingen batu si enggo la nai lit gunana ijadikenNa batu palas si penting fungsina guna majekken rumah. “Batu Palas”, i bas bhs. Ind. nina “Batu Penjuru”, tek kita e me anding-andingen Yesus Kristus si enggo nggenepi nubuaten kerna kerehen Mesias i bas Padan si Ndekah (bdk. Mat. 21:42; Mrk. 12:10-11; Luk. 20:17; Perb. Rasul 4:11; 1 Pet. 2:7).

Invocationta e me sada pernyataan si penting kel i bas rasul Paulus nari man perpulungen i Korinti bage pe man banta kalak si tek, erkiteken kekeken Yesus Kristus e me jaminen kinitekenta si erbahanca layak denga kita erkiniteken man Yesus Kristus gundari nari seh ku kerehenNa si peduakaliken. Erkiteken kematen ras kekeken Yesus Kristus janji kerna pengalemi dosa ras keselamaten enggo tuhu-tuhu seh man banta kalak si tek man baNa.    

Aplikasi

Minggu enda e me puncak i bas rangkaian pra-Paskah ras Paskah. Yesus enggo keke i bas kematen nari, kuasa dosa enggo italukenNa janah janji keselamaten enggo igenepi. Kekeken Yesus Kristus iberitaken kerina kitab Injil janah mewarnai kerina kitab-kitab si deban i bas Padan si Mbaru. E me jaminen si tuhu-tuhu maka labo sia-sia kita erkiniteken man Yesus Kristus bagi si ikataken rasul Paulus i bas invocationta. Kekeken Yesus enggo inubuatken nai-nai nari i bas Padan si Ndekah janah enggo tuhu-tuhu terjadi isaksiken ajar-ajar Yesus. Kai enda maknana man banta i bas tahun enda, erkiteken enggo setiap tahun irayaken kita kekeken Yesus Kristus?

Si pemena lebe, ogenta ngajuk kita gelah la erngadi-ngadi ngataken bujur man Dibata erkiteken kiniulin ras kekelengenNa tetap rasa lalap man banta. Kita manusia erdosa si situhuna labo layak ipebujur Dibata, tapi ipebujurNa kita. Kita si situhuna labo layak ipegegehi Dibata, tapi ipegegehiNa kita. Kita si situhuna layak datken ukumen, tapi imenangkenNa kita, iergakenNa kita. I bas Yesus Kristus kita ngaloken keselamaten si holistik (lengkap, utuh) : jasmani & rohani, selamat kita seh asa gundari i doni enda bage pe selamat kita i bas kerehen Yesus Kristus si peduakaliken.

Si peduaken, erlajar kita arah Maria Magdalena. Ia labo saja pang ersaksi kerna kekeken Yesus Kristus tapi i bas proses kiniseran si nialami Yesus lit ia i je. Ia sekalak diberu si lemah, la iperhitungken kerehenna i tengah-tengah ajar-ajar Yesus si debanna. E nggambarkenca kita si lemah, la iperhitungken doni enda, tapi ipetunggung Dibata jadi saksiNa. Kata-kata Yesus man Maria Magdalena pe isehkenNa man banta i bas wari sendah. Yesus enggo lawes nadingken kita tapi Kesah si Badia lit bas kita guna nehken sura-suraNa i tenga-tengah doni enda. Emaka er-Berita-lah kita kerna peraten Dibata arah pengkebet geluhta.

Si peteluken erlajar kita arah Petrus ras Yohanes. Duana e me ajar-ajar si ndeherna ras Yesus, tapi lenga iangkana kerna penggenepen janji Dibata i bas Yesus Kristus. Mungkin kita pe enggo ndekah tek man Yesus Kristus tapi melala denga lenga iangka kita kai si jadi sura-sura Yesus Kristus man banta kalak si tek man baNa. I bas si e tentuna perlu kita semakin tekun erlajar kerna Kata Dibata bage pe erlajar kita ngelakoken kerina si Kata Dibata i bas geluhta.

Tema si seh man banta i bas Minggu Paskah tahun 2017 enda e me “Ula mbiar, Yesus enggo keke”. Kekeken Yesus ertina, Dibata enggo naluken dua kuasa si jadi kebiaren manusia i doni enda, e me kuasa kiniseran ras kuasa kematen. Kuasa dosa bage pe kuasa kiniseran enggo italukenNa, janah keselamaten si tuhu-tuhu enggo isehkenNa man banta kalak si tek man baNa. Sedekah kita geluh i doni enda, melala tantangen, perbeben, kiniseran si man hadapen. Tapi tek kita maka kuasa Kesah si Badia mpengasup kita ngalaken kerinana. Pindolah gegeh i bas Dibata nari arah pertotonta gelah tetap ipegegehiNa kita. Selamat merayakan Paskah i bas tahun enda.