PJJ GBKP Tgl. 16 - 22 April 2017

PJJ GBKP TGL. 16 - 22 APRIL 2017

Pdt. Larena br. Sinuhadji (Nd. Rey Tarigan)

Tema : RAS KRISTUS KITA MENANG (1 Korinti 15:53-58)

Penjelasen Bahan Ogen & Renungen

1 Korinti 15 e me pengajaren rasul Paulus si penting kerna makna kekeken Yesus Kristus i bas si mate nari. Kekeken Yesus i bas si mate nari e me palas kinitekenta kalak Kristen. Dua kali itegasken rasul Paulus i bas ay. 14 ras 17, adi la lit kekeken Yesus Kristus maka sia-sia berita si isehkenna, sia-sia kinitekenta, janah tetap denga kita geluh i bas kuasa dosa. Kematen ras kekeken Yesus Kristus e me peristiwa si tuhu-tuhu terjadi janah Yesus ncidahken diriNa man melala saksi. Ertina berita keselamaten si iberitaken Yesus Kristus ras si iajarken rasul-rasul e me berita si tuhu-tuhu. Kematen ras kekeken Yesus e me gambaren baptisen si enggo ialoken kita alu kinitekenta. Kerina dosanta enggo igedapken (imateken, imasapken) i bas kematenNa, janah i bas kekekenNa ipegeluhNa kita i bas kegeluhen si mbaru e me kegeluhen i bas keselamaten si enggo terjadi i bas paksa gundari bage pe keselamaten si isempurnakenNa i bas kerehenNa si peduakaliken.

Bahan ogenta sendah e me kesimpulen i bas penjelasen si cukup gedang si ijelasken rasul Paulus i bas suratna man perpulungen i Korinti. Erkiteken persadanta ras Yesus Kristus i bas kinitekenta man baNa, maka kita enggo makeken si la ermasap-masap ras si la banci mate. I bas bhs. Ind. nina, “mengenakan yang tidak dapat binasa”, entah pe “diganti dengan tubuh yang tidak dapat mati”. I bas si e kai si tersurat i bas kitab Jes. 25:8 ras Hos. 13;14 enggo igenepi i bas kematen ras kekeken Yesus Kristus. Kuasa kematen ras dosa enggo lanai lit kuasana i bas kita kalak si tek (ay. 53-56). Antusenna, kalak si tek e me kalak si lanai mbiar kerna kematen kula i bas doni enda erkiteken jaminen geluh si rasa lalap enggo ialoken kita. Janah kiniseran si kugana pe beratna lanai jadi kebiaren sebab kedungenna e me kemenangen bagi si enggo ibentasi Yesus Kristus. IpengasupNa kita ngalaken kerina kiniseran si mberatna sekali pe i bas doni enda erkiteken kinitekenta man Yesus Kristus. Em pengarapenta si tuhu-tuhu, ipegegehiNa kita i bas paksa gundari janah iberekenNa kegeluhen si rasa lalap i bas kerehenNa si peduakaliken.

Erkiteken si e, sangat wajar adi iajuk rasul Paulus kita guna ngataken bujur man Dibata erkiteken kemenangen si enggo iberekenNa man banta kalak si tek man Yesus Kristus (ay. 57). I bas si e tugasta e me ndalani kegeluhen enda alu : semangat si mbaru, pola rukur si positif ras optimis, kinigenggengen (tekun), ketutusen, erpenggurun man Dibata gelah iberekenNa kepentaren man banta, rsd. Gelah kualitas ras kuantitas geluhta pe tuhu-tuhu ncidahken geluh i bas keselamaten. Tema si seh man banta i bas PJJ sendah e me “Ras Kristus kita menang”. Menang i jenda labo menang rikutken ukuren doni enda, adi rikutken ukuren doni enda menang e ertina naluken kalak si deban si la bagi ukurta, balas dendam, erbalas tersakiten man kalak si erbahanca sakit ukurta, rsd. Menang i jenda maksudna menang i bas ngelawan kuasa dosa, menang i bas kita naluken kedagingenta, menang i bas kita ngelakoken kerina si jadi peraten Dibata i bas kegeluhenta.