PA Kategorial GBKP Tgl. 7 - 13 Mei 2017

PA MORIA GBKP TGL. 7 - 13 MEI 2017

Pdt. Larena br. Sinuhadji (Nd. Rey Tarigan)

Terpenalem : Tanda Ngalaken Tantangen Hidup

Si Man Ogen : Perbahanen Rasul 27:21-26

Tema : TETAPKENLAH UKUR AMIN LIT PERBEBEN

Tujun : Gelah Moria :

1) Ngasup niksiki cara-cara Paulus “mengelola perbeben”

2) Pentar ngalaken kiniseran dingen ngasup mpegegehi kalak si deban i bas kiniseranna

Metode : Studi Kasus & Simulasi

Penjelasan Bahan Ogen & Renungen

Paulus erlayar ku Roma-Italia erkiteken rikutken keputusen hakim Pestus ia arus ngadap man Kaisar Roma alu dakwaan menghina agama Yahudi (Ps. 23:29, Persoalen Undang-undang Agama kalak Yahudi. Labo lit kesalahenna si erbahanca ia patut ibunuh entah pe ipenjaraken. Ertina, kesalahen idabuhken man Paulus hanya iban-ban saja). Paulus idampingi Perwira Julius berkat ku Roma alu nangkih kapal pengangkut gandum.

Tapi erkiteken angin si meter erbahanca manjar-anjar perdalinen kapal e. Janah erkiteken si e Paulus mereken usul gelah ula iterusken perdalanen e, sabab bahaya labo saja man kapal ras barang-barang si lit, tapi penumpang pe banci bene (ay. 10). Perwira Julis lebih tek man Kapten Kapal asangken Paulus, maka pelayaren e tetap iterusken. Ras memang terbukti erkiteken angin si meter erbahanca kapal si itumpangi Paulus nungsang (kandas). Enggo pe iambekken pegawai muaten kapal tetap la lit arapen nggeluh (ay. 20). Mbuena penumpang si bas kapal e 276 kalak ras enggo ndekah kalak enda la man. Cara kai si banci siidah kita i bas perikop enda, i bas Paulus “mengelola perbeben”?

1. La iperuncingna persoalen alu saling menyalahkan. Memang lit bahasa Paulus mpersingeti nasehatna ndube man Perwira ras Kapten Kapal, tapi labo lalap e ionggar-onggarna (ay. 21).

2. Paulus hadir guna mpetetap ukur. Nina, “aminna gia kita lit i bas kiniseran tetapkenlah ukurndu, labo kam sekalak pe bene. Kapal enda ngenca pagi bene”. Lit dua kali kata e ibelasken Paulus (ay. 25). Janah isaksikenna, maka Malekat Tuhan sendiri si reh guna mpetetap ukur Paulus, maka kerina kalak bas kapal enda selamat, janah Paulus la banci lang seh ku lebe-lebe Kaisar.

3. Paulus ncidahken kinitekenna si tetap man Tuhan Dibata si banci jadi pergegeh ras usihen man kalak si deban (Sabab tek aku man Dibata maka kai pe siikatakenNa man bangku jadi kap). Ras enda terbuki maka kinitekenna man Tuhan jadi pasu-pasu (berkat) man kalak si nijumpaina i Pulau Malta (Ps. 28:7-10).

Perbeben e me ayam-ayam nggeluh. Arah perbeben dalanna kita menguji kinitekenna, enggo tuhu-tuhu paguh entah lang. Adi paguh berarti naik kelas kita, i ja enggo teruji kinitekenna. E maka perlu kel “mengelola perbeben si lit”. Cara si arus ilakoken kita :

1. Ula panik tapi tetap tenang sabab arah ketenangen ngasup kita rukur ras bertindak alu mehuli ras bijaksana.

2. Tetap ukur, tek nandangi kuasa Dibata si mbelin. Uga pe belinna persoalenta pasti beliden denga kuasa Tuhan. E maka tetap kita ernalem man Tuhan, gelah IA si mereken gegeh ras dalan pulah man banta.

3. La perlu saling menyalahkan sabab labo ndungi persoalen. Walaupe perlu sieteh kai sebabna lit kita i bas perbeben. Adi memang e salahta, jadi persinget (koreksi) gelah ula nari siulihi kesalahen si seri.

4. Ula kita hanya bergumul ras masalah (fokus) terus ras masalahta piah dungna la nari siidah kuasa Tuhan si mbelin. Akhirna erbanca kita kelsehen, numpahi padan, jungut-jungut ras la nari ngasup ngataken bujur man Tuhan.

Arah tujun si peduaken, ipindoken gelah Moria pentar ngalaken kiniseran janah ngasup ka kita mpegegehi kalak si deban i bas kiniseranna. Paling tidak kehadirenta, ikut nampati ertoto ras mereken pandangen (usul) si mehuli. Walaupe tetap keputusen lit i bas temanta ndai, tapi kehadirenta enggo jadi pasu-pasu (berkat).

PA MAMRE GBKP TGL. 7 - 13 MEI 2017

Nrs. Pdt. L. br. Sinuhadji (Bp. Rey Tarigan)

Tanggung Jabab Mamre Nandangi Pemilu

Ogen : 1 Samuel 16:6-13

Tema : JATI DIRI MAMRE I BAS PEMILU (Menghadapi Tahun Pelayanan 2018)

Tujun Gelah Mamre :

1) Jadi teladan i bas Pemilu

2) Mamre ngasup milih peminpin erpalasken kiniteken Kristus

Metode : Diskusi (Ceramah)

Penjelasen Bahan Ogen & Relevansi

Bahan ogenta nuriken kerna proses pilihen Dibata man Daud anak Isai si bakal gantiken Saul jadi raja Israel. Lit 10 anak Isai rikutken 1 Kron. 2:13-16, si dilaki e me Eliap, Abinadap, Sammah, Natanael, Radai, Osem, teruhen Osem si la isebutken gelarna, ras Daud. Si diberu e me Seruya ras Abigail. Sue ras si enggo iperentahken Dibata man bana, berkat Samuel ku Betlehem guna ndahi Isai sebab enggo ipilih Dibata sekalak anak Isai guna jadi raja Israel. Singkat cerita, Isai ras anak-anakna si dilaki (kecuali Daud) itenahken ku bas lakon persembahen. Mungkin tersungkun-sungkun Samuel i bas pusuhna, anak si apai si ipilih Dibata e? Erkiteken melala kepeken anak Isai si dilaki. I bas pengakap ras pengidah Samuel anak Isai si ntua si bakal ipilih Dibata. Mungkin erkiteken Eliap (ras dua teruhenna) termasuk i bas anggota pasuken raja Saul (bdk. 1 Sam. 17:13). Janah adi sioge ay. 7 banci sibayangken uga tampilen fisik Eliap enda, gedang ras mejile rupana. Tapi seh ku anak Isai si pepituken, “Labo ia si Kupilih”, nina Dibata. Emaka nungkun Samuel man Isai, “Lit denga tole anakndu?” Lit denga kepeken anakna si nguda si tergelar Daud sangana ermakan biri-biri. E maka isuruh Isai kalak ngelegisa. Daud sekalak anak perana si mejile, sehat, janah matana pe mejile. Nina TUHAN man Samuel, “Enda me kalakna, tangkuhkenlah ia!” Ibuat Samuel minak saitun je nari iminakina Daud. Rempet Daud ikuasai Kesah TUHAN janah mulai i bas wari e nari Kesah e tetap ras ia.

I bas proses pemilihen Daud jadi raja gantiken Saul enda teridah perbedan palas i bas milih sekalak peminpin. I bas ay. 7 nina TUHAN, “Ola nehen kuga gedangna ras kuga jilena rupana ... sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna”. Manusia milih erpalasken si teridah arah darat, sedangken palas Dibata i bas IA milih e me leben inehenNa pusuhna. Pusuh si uga, pusuh si erkemalangen man baNa. Hal si deban si banci sipelajari i bas proses pemilihen enda, Samuel erpengendes man Dibata, iikutkenna kai si jadi peraten Dibata i bas pemilihen enda, amin pe la bagi ukurna, tapi Kata Dibata si iikutkenna.

PA-nta sendah lit i teruh judul “Tanggung jabab Mamre nandangi Pemilu”, tema “Jati diri Mamre i bas Pemilu (menghadapi Tahun Pelayanan 2018)”, alu tujun gelah Mamre jadi teladan i bas Pemilu ras ngasup milih peminpin erpalasken kiniteken Kristus. I bas tahun 2018 irencanaken ilaksanaken Pilkada serentak i 171 daerah i Indonesia, e me 17 provinsi, 115 kabupaten, ras 39 kota. Termasuk i bas proses pemilihen kepala daerah si buena asangken Pilkada sebelumna. Pilkada serentak enda irencanaken ilakoken i bas 27 Juni 2018. Rikutken judul tema ras tujun PA-nta sendah akap kami enggo melala Mamre si ikut muat bagin i bas pemilihan kepala daerah, bage pe pemilihen-pemilihen si deban si ilaksanaken i bas negaranta enda. Labo terjeng cakap saja bas kede kopi kerna situasi politik i bas negaranta, tapi enggo tuhu-tuhu ikut muat bagin i bas Pemilu i bas negaranta enda. Benaken pemilihan Gubernur DKI tahun 2012, iumputi pemilihen Presiden RI tahun 2014, enggo semakin melala masyarakat si sebelumna golput, entah pe la igunakenna hak pilihna, ikut muat bagin i bas Pemilu. Janah labo hal si mustahil lit ka Mamre GBKP si jadi calon peminpin daerah. Kai enda palasta i bas kita ikut muat bagin i bas Pemilu?

Si pemena, i bas bahan ogenta sendah jelas maka Dibata milih sekalak peminpin si erkemalangen man baNa. Secara konkrit peminpin si erkemalangen man Dibata e me peminpin si labo saja teridah arah darat maka ia sekalak si religius, tapi si pentingna teridah maka ia sekalak peminpin si pro-rakyat, membela rakyat kecil, ilawanna ketidakadilan, pang ia dalanken si benar, labo mbiar ia man kalak jahat si atena nangko sen rakyat, anti korupsi, anti politik sen, rsd. Si peduaken, teridah maka Samuel ngikutken Kata Dibata i bas ia ipake Tuhan milih Daud. Ertina i bas kita milih sekalak peminpin si arus ilakoken kita e me ertoto, mindo petunjuk i bas Dibata nari i bas kita nentuken sekalak peminpin si erkemalangen man Dibata. Memang adi rikutken situasi negaranta si mayoritas labo seri kinitekenna ras kita rusur kita arus milih peminpin si la sada kiniteken ras kita. Tapi amin pe lit sekalak peminpin si sada kiniteken ras kita tapi labo tentu ia sekalak si erkemalangen man Dibata. Ertina, amin pe labo sada kiniteken ras kita sekalak peminpin si ipilih kita, tapi adi enggo sibaba i bas pertotonta gundari nari, teklah kita maka Dibata ikut erdahin i bas kita nentuken sekalak peminpin i daerahta masing-masing. Hal si deban tentuna perlu ka sidarami informasi si berkaiten ras track record (rekam jejak) peminpin si ateta ipilih kita, janah ula kita terlibat i bas politik sen, transaksional, rsd., sebab e la sue ras peraten Dibata. Tentuna jadi sada keprihatinen adi lit iidah kita Gereja-gereja si nggit ngaloken sen alu syarat milih salah sada calon kepala daerah.

Si peteluken, kai si ikataken Yesus i bas Mat. 22:21 teridah secara tersirat maka kita arus patuh nandangi peminpin negaranta. I bas Roma 13 (bdk. Titus 3:1; rsd.) Rasul Paulus ngajuk gelah kita patuh man pemerentah si erkuasa sebab Dibata si netapkenca. Ertina i bas kita ikut muat bagin i bas Pemilu palasta jelas e me ngikutken Kata Dibata. Adi la kita perduli nandangi peminpin-peminpin daerahta, banci ikataken la kita patuh nandangi Kata Dibata si tertulis i bas Pustaka si Badia. Uga adi i bas kinatana melala peminpin-peminpin daerahta si la erkemalangen man Dibata, si erbahanca kita kisat guna milih peminpin daerahta? Umpamana : sewenang-wenang ia, korupsi, la adil, la benar, rsd. I bas si e tentuna arus kita lebih patuh man Dibata (bdk. Perb. Rasul 5:29), janah kita pe arus pang ngelawan peminpin si la erkemalangen man Dibata alu cara-cara si sue ras Kata Dibata ras aturen-aturen si berlaku i bas negaranta.

Si terakhir kerna menghadapi Tahun Pelayanan 2018, bagi si tertulis i bas tema-nta sendah, e me lit i bas Garis-garis Besar Pelayanan (GBP) GBKP 2016 - 2020 : “Menumbuhkan dan meningkatkan kesadaran warga GBKP dalam bidang politik, hubungan dengan masyarakat dan pemerintah”. Harus iakui maka politik i bas negaranta melala si sifatna negatif, hanya sekedar cara si igunaken guna meraih entah pe mpertahanken kekuasaan, baik secara konstitusional bage pe secara la konstitusional, tapi kekuasaan si enggo idatken e la igunaken secara benar. Lalan kekuasaan e igunaken guna tujun kepentingen pribadi entah pe golongen tertentu, guna mpebayak diri sendiri labo guna kesejahteraan rakyat. Padahal situhuna politik e netral sifatna janah tujunna guna kiniulin masyarakat. I bas si e tentuna Gereja arus ikut muat bagin i bas ncidahken politik si benar sue ras Kata Dibata. Yesus Kristus i bas paksa geluhNa i doni enda, igunakenNa kuasa si ibereken BapaNa guna ncidahken kekelengen, keadilen, kebenaren, ras kepedulian man kalak si kurang beruntung i bas geluhna (musil, marginal, rsd.). E maka erlajar kita er-politik si benar sue ras Kata Dibata alu patuh man aturen-aturen si berlaku i bas negaranta. Lit kuan-kuan si ngatakenca, “sebelum menjadi pemimpin yang baik, jadilah pengikut yang baik”.