PJJ GBKP Tgl. 2 - 8 April 2017

PJJ GBKP TGL. 2 - 8 APRIL 2017

Pdt. Larena br. Sinuhadji (Nd. Rey Tarigan)

Tema : SILANG-NDU KUMULIAKEN (1 Yohanes 2:21-25)

Penjelasen Bahan Ogen & Renungen

“SilangNdu-silangNdu e kumuliaken. Seh ku Surga pe pagin geluhku terkelin”

Enda sada cupliken i bas lagu KEE 328 si mpersingeti kita maka arah silang Tuhan maka dosa-dosanta enggo ielami. Penebusen si ilakoken Kristus secara cuma-cuma (gratis). Silang Tuhan si erbahanca megelut man kalak Jahudi sabab ipindona tanda sengget asum Yesus isalibken ras merupaken sada kebodehen man kalak si deban i luar kalak Yahudi, tapi si banci mereken kemenangen man kalak si tek man baNa (bdk. 1 Kor. 2).

Enda me berita si ilumbaken Yohanes man perpulungen si sangana ngenanami kiniseran erkiteken kinitekenna man Yesus terlebih lit ajaren papak si berkembang, si ngatakenca Yesus e labo Mesias si ipadanken Dibata. E me sababna i bas ay. 22 Yohanes ngatakenca, “kubahan surat enda labo erkiteken la ietehndu ketuhu-tuhun e, tapi erkiteken ietehndu nge”.

I bas jemaat perdana paksa si e, melala kalak si menyangkal kesaksin si asli kerna Kristus, si termasuk i bas ajaren gnostik. Ajaren gnostik (bhs. Yunani gnosis ertina “pengetahuan”) tek maka si ilahi la banci terlibat ras doni materi sabab keterlibaten e erbahanca si ilahi la nari banci badia. Em sababna, Dibata si reh ku doni enda arah Yesus Kristus, rikutken ajaren gnostik, merupaken ajaren si sangat tercela. Ajaren enda erbahan garis pemisah si tajam antara Kristus si ilahi ras manusia i bas doni enda i bas dampar si deban. Alu kata si deban, aliren enda la tek maka Kristus si ilahi banci menyatu ras Yesus si merupaken manusia. Ajaren si benar si ilumbaken Yohanes, maka Yesus e me tuhu-tuhu ilahi ras tuhu-tuhu manusia, tapi la enggo Ia erdosa. E maka surat 1 Yohanes enda berusaha guna menyangkal pemahamen si salah, sabab Yesus e me anak Dibata si enggo reh ku doni enda (2 Joh. 1:7, “Enterem penipu enggo merap i doni enda, si la ngakui maka Yesus Kristus reh jadi manusia. Kalak si bage penipu janah musuh Kristus kap”).

Pengajaren si benar si sekali nari ilumbaken Yohanes maka Yesus Kristus me anak Dibata si tonggal si reh ku doni enda jadi manusia arah sekalak diberu si tergelar Maria ras ngenanami kiniseran seh mate i kayu persilang guna nebusi dosa-dosa manusia ras keke i bas si mate nari i bas wari peteluken. Berita enda me si arus nggeluh dingen njemba kalak si tek tetap setia mersan kayu persilangna masing-masing selaku pengikut Yesus Kristus si setia (Mrk. 8:34). Ertina, kematen ras kiniseran Yesus Kristus njemba kita pengikutNa gelah ula nilahken kiniseran asum kiniseran e reh tapi mindo gegeh guna tetap setia i bas penderitaan si ialamina.

Asum kita ngendekenca, “silangNdu kumuliaken” berarti : 1) Tek maka Kristus enggo mate ras keke i bas si mate nari guna nebusi dosa-dosa. Arah e mabai kita la nari senang nggeluh i bas dosa, amin pe kita nggeluh i tengah-tengah doni si dem alu dosa. I bas si enda rasul Yohanes pe menentang ajaren si berkembang paksa si e si ngatakenca maka kalak si tek la nari perlu mindo pengalemi dosa (bdk. 1 Yoh. 1:10 - I bas jaman gundari lit ajaren hyper grace [anugerah yang berlebihan] si menam seri ras ajaren si papak i bas jaman rasul Yohanes si ngatakenca la nai perlu kita ngakuken dosa). 2) Lit kinigenggengen i bas kita ngalaken erbage-bage kiniseran si nderpa kita. La perlu ndarami jalan pintas si bertentangen ras jalan Tuhan. Tapi pindolah gegeh i bas Dibata nari gelah banci ngalakenca. 3) Lit pengorbanen selaku kita kalak si tek, labo hanya kita fokus guna dirinta tapi pe kiniulin man kalak si deban. 4) Tetap setia i bas ndalani kegeluhen enda, amin uga pe beratna, sabab enggo isikapken Dibata kegeluhen si tuhu-tuhu si la erkeri-kerin.