PA Kategorial GBKP Tgl. 9 - 15 April 2017

PA MAMRE GBKP TGL. 9 - 15 APRIL 2017

Nrs. Pdt. L. br. Sinuhadji (Bp. Rey Tarigan)

Arah Perkuah Ate Kita Terkelin, Emaka Dalankenlah Si Mehuli

Ogen : Epesus 2:1-10

Tema : ENGGO KUALOKEN PERKUAH ATE DIBATA

Tujun : Gelah Mamre ngasup naksiken geluhna selaku pengataken bujur man Dibata

Metode : Diskusi

Penjelasen Bahan Ogen & Relevansi

Erpalasken informasi i bas Perb. Rasul 18:19-20; 19:1-20; 20:17-38, rasul Paulus erdahin ras majekken perpulungen kalak Kristen i Epesus telu tahun dekahna. I bas perpisahenna ras pertua-pertua i Epesus nari rasul Paulus ngatakenca nina, “Jagailah dirindu dingen jagai pe kerina kalak si enggo itetapken Kesah si Badia man kepkepenndu. Permakanilah perpulungen Tuhan si enggo itebusiNa alu engkorbanken diriNa seh mate. Kueteh pe maka kenca aku lawes, reh me serigala si merawa ku tengah-tengahndu si la alang-alangen ncedaken perpulungen e. Bage pe i tengah-tengahndu nari keke me kalak si ngajar alu pengajaren si la tuhu. Atena narik kalak si enggo tek man Jesus jadi pengikutna” (Perb. Rasul 20:28-30). Bage me keadaan perpulungen i Epesus sope rasul Paulus lawes nandingken perpulungen e. Emaka surat rasul Paulus man perpulungen i Epesus tujunna ngingetken mulihi kerna pengajaren-pengajaren kiniteken si enggo pernah iajarken rasul Paulus gelah reh paguhna kiniteken perpulungen e.

Secara khusus i bas ogenta sendah rasul Paulus ngingetken kerna inti kiniteken kalak Kristen nina, erkiteken lias ate Dibata nge maka kita kerina kalak si tek enggo terkelin, erkiteken tek kita man Kristus, labo bekas perbahanenta, labo ulih pendahinta tapi pemere Dibata (ay. 8,9). Akap kami kerna pengajaren rasul Paulus enda enggo semal ibegiken kita, Sola Gratia (hanya karena anugerah) ras Sola Fide (hanya karena iman). Tapi pengajaren inti kerna erkiniteken man Yesus Kristus e mengandung konsekuensi bagi si ikataken rasul Paulus i bas ay. 10 nina, “Tinepa Dibata kap kita; i bas persadanta ras Kristus Yesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e”, i bas Alkitab TB-LAI nina, “Karena kita ini buatan Allah, diciptakan dalam Kristus Yesus untuk melakukan pekerjaan baik, yang dipersiapkan Allah sebelumnya. IA mau, supaya kita hidup di dalamnya”. Ertina i bas erkiniteken kita man Yesus Kristus, lit je kesadaren bas dirinta maka kita enda tinepa Dibata si mbaru i bas Yesus Kristus, janah lit rencana Dibata si mulia i bas dirinta, e me gelah kita ndahiken dahin-dahin si mehuli sue ras peraten Dibata. Em tandana kita enggo ngaloken perkuah ate Dibata.

PA-nta sendah lit i teruh judul “Arah perkuah ate kita terkelin, emaka dalankenlah si mehuli”, janah tema-nta sendah e me “Enggo kualoken perkuah ate Dibata” alu tujun gelah Mamre ngasup naksiken geluhna selaku pengataken bujur man Dibata. Memang adi siukurken, kiniteken kalak Kristen enda bagi si murah kel syaratna, asal tek saja man Yesus Kristus maka enggo terkelin. Seh kel murahna maka melala kalak si ngaku Kristen memanfaatkenca bagi barang si murahan nilaina. Umpamana, kenca enggo sakit mekelek maka je jera, ertobat, mindo gelah itotoken pendeta entah pe pertua diaken ras perpulungen gelah pedas madan. Kenca enggo sehat enggo la nai ingetna Dibata, mulihken ka ku kegeluhen i bas dosa. Kenca ndeher mate maka je ertobat, ngaku Yesus Juruselamatku, iliturgiken Gereja, dung persoalen, bengket ku surga. Bage murahanna kin kinitekenta? Tentuna la lit kita si pang ngakuken maka murahan kel kinitekenta. Adi siinget uga belinna pengorbanen Yesus Kristus, nggit IA ngenanami kiniseran si mesangat ras mate i kayu persilang hanya guna nyelamatken kita manusia si erdosa tentuna kinitekenta e tuhu-tuhu belin kel nilaina, tuhu-tuhu meherga belinen asangken erta kebayaken, jabaten, status sosial, rsd., i bas doni enda, sebab si e kerina la ngasup mereken keselamaten si tuhu-tuhu.

I bas PA-nta sendah mulihi kita isingetken kerna statusta sebage tinepa Dibata si mbaru i bas Yesus Kristus. Lit rencana Dibata si mulia i bas dirinta e me ndahiken dahin-dahin si mehuli sue ras peraten Dibata. E me tandana kita enggo ngaloken perkuah ate Dibata, janah e me bentuk konkrit pengataken bujurta man Dibata. Emaka i bas minggu menjelang Paskah enda ertekad kita guna semakin mpeteguhi kinitekenta alu naksiken orat geluh si sue ras peraten Dibata ku tengah-tengah sekelewetta. Pindolah gegeh i bas pertotonta man Dibata gelah ipengasupNa kita jadi alatNa ngelakoken dahin-dahin si mehuli sue ras peratenNa i bas kegeluhenta si tep-tep wari. Adi Yesus Kristus enggo keke naluken dosa ras kuasa kematen, tek kita maka ipengasupNa kita naluken peraten dagingta. Selamat merayakan Paskah. Dibata si masu-masu kita kerina.