Khotbah GBKP Minggu Tgl. 9 April 2017

KHOTBAH GBKP MINGGU TGL. 9 APRIL 2017

Nrs. Pdt. L. br. Sinuhadji (Bp. Rey Tarigan)

MINGGU PASSION 7 (Palmarum : “Lambe”)

(Warna Stola : Ungu)

Invocatio : “Perban TUHAN si Erdolat penampatku, icekuraki kalak pe labo gulut ukurku. Kupepiher ukurku nahankenca, sabap kueteh labo banci kuakap mela” (Yesaya 50:7)

Ogen : Matius 21:1-11 (Tunggal)

Khotbah : Yesaya 50:4-9a (Responsoria)

Tema : TUHAN SI NAMPATI AKU

Penjelasen Bahan Pustaka Si Badia

I bas bahan khotbahta ituriken Yesaya kerna kesaksin geluhna sebage sekalak nabi entah pe suruh-suruhen Dibata. I bas kesaksin geluhna sebage suruh-suruhen Dibata enda, banci siidah dua hal si penting. Si pemena lebe, sekalak si iutus Dibata iperlengkapi Dibata alu erbage-bage kebeluhen entah pe kepentaren guna nehken si jadi sura-suraNa. I bas ay. 4-5 ituriken Yesaya maka TUHAN si Erdolat enggo ngajari ia ngerana, ipekekeNa ukurna lako ndengkehken pengajarenNa, ibereken TUHAN man bana pengertin e maka la ia surut i bas Dibata nari ras la ilawanna Dibata. Si peduaken, sekalak si iutus Dibata la pernah itadingken Dibata. I bas ay. 6-9 ituriken Yesaya maka amin pe iderpa erbage-bage kiniseran, tapi la pernah ipermelaken Dibata ia, isampati Dibata ia i bas ngalaken kerina kiniseran erkiteken tugas tanggung jawabna nehken si jadi sura-sura Dibata. E maka i bas ay. 10 iajuk nabi Jesaya man kerina kalak si mehamat ras patuh man Dibata gelah tetap ernalem ras tek man baNa. Ay. 10 i bas terj. BIMK - BIS akap kami lebih jelas ikataken, “Hai kamu yang menghormati TUHAN, dan mendengarkan perkataan hambaNya, jalan yang kamu tempuh mungkin gelap, dan tak ada cahaya yang bersinar bagimu; tetapi percayalah pada TUHAN; bertopanglah pada Allahmu”.

Yesaya 50:4-10 termasuk i bas empat “nyanyian hamba TUHAN”, si debanna lit i bas 42:1-4; 49:1-6; ras 52:13-53:12. Ende-enden kerna hamba TUHAN enda nggambarkenca tugas tanggung jawab sekalak hamba si ipilih Dibata guna : 1) Maba kebujuren (keadilan) man kerina bangsa-bangsa (42:1); 2) Negu-negu bangsaNa mulihken ku Dibata (49:5); 3) Jadi terang man bangsa-bangsa gelah keselamaten seh man bangsa doni kerina (49:6); 4) Ngenanami erbage-bage kiniseran (50:6; 52:14; 53:3-5,7) erkiteken ipersanna ukumen (dosa) enterem jelma; 5) Erkiteken si e ibereken Dibata ingan si muliana man bana (53:12). I bas kinitekenta, tek kita maka kai si isuratken nabi Yesaya enda e me nubuaten kerna kerehen sekalak Mesias, Yesus Kristus. I bas kitab Injil Matius isaksiken maka nubuaten i bas Jes. 42:1-4 igenepi i bas kegeluhen ras karya Yesus (Mat. 12:18-21). Pilipus naksikenca man sekalak Etiopia maka si tersurat i bas Yes.53:7-8 e me Yesus Kristus (Perb. Rasul 8:26-35. Yesus sendiri pe ngatakenca maka diriNa e me “Hamba” entah pe Suruh-suruhen si isuruh Dibata guna ngelai ras ngendesken kesahNa guna nebusi nterem jelma (bdk. Mrk. 10:45; rsd.).

Ogenta si pemena nuriken kerna Yesus si ialo-alo alu surak-surak si meriah sanga IA bengket ku kota Yerusalem. Isurakken kalak si nterem nina, “Pujin man Anak Daud! Ipasu-pasu Dibata IA si reh i bas gelar Tuhan! Pujilah Dibata!” Ikimbangken kalak si nterem uisna i dalan, lit ka deba itek-tekna lambe je nari iamparkenna i dalan. Kerehen Yesus i kota Yerusalem e erbahanca guntar belang-belang kota e. Ikataken kalak si nterem e nina, “Enda kap Yesus, Nabi i kuta Nasaret daerah Galilea nari”. Peristiwa enda icatat i bas kerina kitab Injil (Mrk. 11:1-11, Mat. 21:1-11, Luk. 19:28-44; Yoh. 12:12-19) erkiteken peristiwa enda peristiwa penting si terjadi sada minggu sope wari kekekeNa. Lit telu hal si penting i bas peristiwa enda. Si pemena e me simbol kelde si iersak Yesus. Kelde i bas tradisi paksa si e merupaken lambang perdamen, sedangken kuda e me lambang perang. Sekalak raja si menang i bas peperangen nari paksa si e biasana iersakna kuda janah ialo-alo rayatna alu surak meriah sanga mulih ia erperang. Tapi Yesus bengket ku Yerusalem iersakna kelde, ertina IA ialo-alo sebage Raja Dame. Si peduaken e me simbol lambe (palem, palma). Lambe e me simbol kemenangen ras kemulian si enggo semal paksa si e. Perkembangen selanjutna, rikutken Ketangkasen 7, lambe e me simbol kegeluhen si rasa lalap si ialoken kalak si mate erkiteken kinitekenna man Yesus Kristus. E maka sanga ikimbangken kalak si nterem uisna i dalan bage pe itek-tekna lambe je nari iamparkenna i dalan, e me tanda kemenangen, kemulian, ras kegeluhen si rasa lalap i bas kekeken Yesus Kristus amin pe i bas sada minggu e bakal inanamiNa kiniseran si mesangat ras kematen.  

Aplikasi

Minggu enda igelari Minggu Palmarum entah pe Lambe i bas rangka mpersingeti kerehen Yesus Kristus i kota Yerusalem janah ialo-alo kalak si nterem alu ersurak meriah. Kita pe i bas paksa sendah ngalo-ngalo Yesus Kristus i bas pusuh perukurenta labo sebage nabi bagi nina kalak Yahudi, tapi sebage Tuhan ras Juruselamatta si enggo menang naluken kuasa dosa i bas kekekeNa. Tek kita maka Yesus Kristus e me Raja Dame si reh ku tengah-tengah doni enda guna mperdameken kita ras Dibata. Minggu enda pe igelari Minggu Sengsara erkiteken i bas minggu enda bengket Yesus ku bas Via Dolorosa, e me dalan kiniseran si mesangat. I bas dalani kiniseran si mesangat e labo ipakeNa kuasaNa guna nilahken kiniseran e, tapi ihadapiNa kiniseran si mesangat e i bas gegehNa si terbatas sebage manusia biasa bagi kita. Ipengasup Dibata Yesus guna ndalanisa. Ertina, kiniseran si mesangat enggo leben inanami Yesus Kristus e me tanda erdiate (keberpihakkan) Dibata nandangi kiniseran erkiteken dosa si nialami kita manusia. Janah kedungenna menang IA ngelawan kuasa kiniseran bahkan kuasa kematen. Ertina i bas paksa sendah tek kita maka isampati ras ipengasup Dibata kita i bas ngalaken perbeben ras kiniseranta erkiteken kinitekenta man Yesus Kristus.

Salib i bas bulung lambe nari guna mpersingeti Minggu Palmarum
(Sumber : https://en.wikipedia.org/wiki/Palm_Sunday)

  

Penampat i bas Dibata nari enggo leben inubuatken nabi Yesaya i bas kerehen Mesias si i bas kinitekenta tek kita maka Mesias e me Yesus Kristus. Erpalasken 1 Pet. 2:9, kita enggo ipilih Dibata jadi suruh-suruhenNa janah iutus kita guna nehken kerina si jadi sura-sura Dibata i bas kegeluhenta. Kesaksin nabi Yesaya i bas bahan khotbahta sendah ngingetken kita kerna dua hal si penting : 1) Tek kita maka iperlengkapi Dibata kita alu erbage-bage kebeluhen entah pe kepentaren guna ngelakoken kerina si jadi sura-suraNa. 2) Tek kita maka Dibata la pernah nadingken kita. I bas kerina perbeben ras kiniseran si nialami kita isampati Dibata kita, ibelaNa kita maka ula sempat kita ipermelaken i bas kita ngelakoken kerina si jadi sura-suraNa. E maka pengajuk nabi Yesaya pe itujuken man banta, “Hai kamu yang menghormati TUHAN, dan mendengarkan perkataan hambaNya, jalan yang kamu tempuh mungkin gelap, dan tak ada cahaya yang bersinar bagimu; tetapi percayalah pada TUHAN; bertopanglah pada Allahmu”. Perbeben ras kiniseran lalap lit kidekah kita geluh i doni enda, tapi teklah kita maka penampat i bas Dibata nari pe la erkeri-kerin asalken tetap kita patuh ras erpengendes man baNa.

Tema si seh man banta i bas Minggu Passion pe-7-ken enda “Tuhan si nampati aku”, enda me pengakun kinitekenta erpalasken pengalamen geluhta sedekah enda bage pe tek kita Dibata tetap nampati kita sedekah geluhta i doni enda. I bas Minggu Passion pe-7-ken enda mulihi kita isingetken kerna kemulian i bas perbeben entah pe kiniseran si nialami kita erkiteken kinitekenta man Yesus Kristus Juruselamatta. I bas pengorbanen Yesus Kristus i kayu persilang teridah maka kiniseran e me sada bagin si la terpisahken i bas kemulianNa. E maka megenggenglah kita i bas kita ngalaken kerina kiniseran entah pe perbeben si nialami kita erkiteken kinitekenta, janah meriahlah kita erkiteken ipersadakenNa kita ras kiniseranNa. Dibata i bas Yesus Kristus enggo naluken kerina kuasa dosa ras kuasa kiniseran i doni enda, teklah kita maka kita pe ipengasupNa ngalaken kerina perbeben entah pe kiniseran i bas perdalanenta bengketi Yerusalem si mbaru.