PJJ GBKP Tgl. 30 Okt. - 5 Nov. 2016

PJJ GBKP TGL. 30 OKT. - 5 NOV. 2016

Pdt. Larena br. Sinuhadji (Nd. Rey Tarigan)

Tema : ERGAKEN ANAK JABUNTA (2 Sam. 13:1-22; Mas. 127:3)

Penjelasen Bahan Ogen & Renungen

Lit dua ogenta sendah, si pemena nuriken kerna Amnon ras Tamar. Amnon e me anak dilaki Daud si ntua i bas ndeharana si tergelar Ahinoam, sedangken Tamar e me turang Absalom. Absalom anak dilaki Daud si peteluken i bas ndeharana si peteluken nari si tergelar Maakha (1 Kron. 3:1-3). Jadi Tamar e me turang Amnon beda nande. Ituriken maka seh kel ngenana ate Amnon man turangna Tamar. Erkiteken akapna lanai lit dalan si deban guna banci ia ersada ras turangna ndai maka ibegikenna kai si ikataken Jonadap ras iperkosana turangna ndai. Situhuna lit dalan si deban si banci ilakoken Amnon, i bas ay. 13 ikataken Tamar nina : “Ercakaplah kam ras raja, ugapa pe iberena nge aku man bandu”. Tapi la ibegiken Amnon kai si ikataken Tamar, ilakoken Amnon nafsu bejatna man turangna. Kai si ilakoken Daud kenca enggo ibegina berita kerna pengelako Amnon man turangna ndai? I bas ay. 21 ikataken merawa kel Daud, seh je ngenca? I bas Alkitab LAI Edisi Studi (LAI, 2010, hlm. 501) ikataken, “Gulungan Laut Mati dan satu terjemahan kuno menambahkan, “Akan tetapi, Amnon adalah anak laki-laki yang tertua dan juga kesayangannya, dan Daud tidak akan berbuat apa pun yang membuat Amnon bersedih”. Adi tuhu bage, maka sebage orangtua la ilakoken Daud kai pe guna ngajari anakna si erbahan kejahaten. Emaka kenca kejadin e, turah dendam i bas Absalom turang Tamar. Dua tahun ndekahna dendam e isimpanna seh i bas sada paksa ibunuhna Amnon (2 Sam. 13:28-29). Mungkin erkiteken dendam Absalom man bapana maka ibahana ka pemberontaken man bapana (2 Sam. 15-18) si kedungenna kematen Absalom. Ceda kel ate Daud ras tangis ia erkiteken kematen Absalom (2 Sam. 18:33).

Lit si penafsiren si ngatakenca kekerasen si terjadi i bas jabu Daud erkiteken dosa si enggo ilakokenna (2 Sam. 11). I bas 2 Sam. 12:10 ikataken, “Erkiteken si e i bas tiap tingkat kesusurenndu tetap lit piga-piga kalak si mate ibunuh sabap ihinandu Aku janah enggo ibuatndu ndehara Uria”. Lit perpayona erkiteken sura-sura Dibata la ise pe si metehsa ras la ise pe banci ngalangisa amin pe Daud enggo ertobat mindo pengalemi dosa i bas Dibata nari. Tapi i bas kasus Amnon ndai, la ilakoken Daud kai pe guna menghukum anakna si enggo erbahan kejahaten. Erkiteken la ngasup Daud mendidik anakna ndai maka turah kekerasen demi kekerasen i bas rumah tanggana. Pengogenta si peduaken e me ende-enden Salomo, enggo jelas maka anak e pemere ras pasu-pasu i bas Dibata nari. Si menarik akap kami lit i bas ay. 1a, nina, “Adi rumah la bekas TUHAN mantekisa, sia-sia me pendahin tukang”. Ertina rumah tangga si payo e me rumah tangga si palasna Kata Dibata. Kata Dibata nge si mpengasup isi jabu sikelengen, sihamaten sada ras si debanna. Kata Dibata nge si ngajari orangtua mendidik anak-anakna alu payo. Kata Dibata nge si erbahanca maka anak-anak mehamat man orangtuana, rsd.

Tema i bas PJJ-nta sendah “Ergaken Anak Jabunta”. Ngergaken i jenda labo seri ras memanjakan. Persoalenna i bas jaman gundari enda, enggo melala orangtua si talu ibahan anakna. Anak-anak, kitik-kitik denga pe enggo pang ngaturi orangtuana. Kai pe sura-sura anak-anak iikutken orangtuana. Piah dungna enggo la nai lit otoritas orang tua nandangi anak-anakna. Salah sada akibatna terjadi kekerasen anak-anak nandangi orangtuana erkiteken lit batas kengasupen orangtua i bas ngelitken kerina pemindon anak-anakna. Ngergaken i jenda ertina orangtua tuhu-tuhu berotoritas nandangi anak-anakna. Otoritas i jenda labo berarti mendidik alu cara otoriter, tangan besi, disiplinsa, rsd. Otoritas i jenda ertina, kuasa si ibereken Dibata man banta guna mabai anak-anakta ku si mehuli sue ras Kata Dibata (bdk. Kuan. 22:6; 29:17; Ep. 6:4; rsd.). Adi salah anakta, persingetilah ras ajari ia. I bas ngajari anak-anak ku si mehuli la banci lang enggo pasti lit je disiplin ras ukumen, saja ngenca i bas kita nehken ukumen perlu ibahan cara-cara si membangun karakter si mehuli, labo alu cara-cara kekerasen, sebab kekerasen fisik entah pe psikis mpeturah benih-benih kekerasen i bas pusuh perukuren anak-anakta. Labo hal si murah i bas kita ngajari anak-anakta, emaka rusur totokenlah anak-anakta, pindolah kepentaren i bas Dibata nari i bas kita ngajari anak-anakta, janah marilah kita jadi orangtua idola si jadi usihen anak-anakta, i bas cara rukurta, i bas pengerananta, i bas perbahanenta, i bas erkiniteken man Dibata, erpalasken keleng ate Dibata. Kekerasan dalam rumah tangga (KDRT) : perbulangen man ndeharana, ndehara man perbulangenna, orangtua man anak-anakna, anak-anak man orangtuana, baik secara fisik bage pe secara psikis, perlu siantisipasi sejak dini. Dibata si mpegegehi kita.