PJJ GBKP Tgl. 16 - 22 Oktober 2016

PJJ GBKP TGL. 16 - 22 OKTOBER 2016

Nrs. Pdt. Larena br. Sinuhadji (Bp. Rey Tarigan)

Tema : IDILO GUNA JADI PASU-PASU (1 Petrus 2:9-10)

Penjelasen Bahan Ogen & Renungen

I bas bindu 1 ay. 1 nari iteh kita maka surat rasul Petrus enda itujuken man perpulungen kalak si tek si merap i belang-belang propinsi Pontus, Galati, Kapadokia, Asia ras Bitinia, kerinana lit i bas negara Turki bagin utara jaman gundari enda. Enggo je itekanken rasul Petrus maka perpulungen si merap e me kalak si enggo ipilih Dibata jadi anak-anakNa erkiteken kinitekenna man Yesus Kristus. Penekanen rasul Petrus kerna pilihen Dibata enda iulihi i bas ay. 9, nina, “Tapi kam e me bangsa pilihen, imam-imam Raja (i bas Alkitab Bahasa Indonesia Sehari-hari - BIS, nina “imam-imam yang melayani raja”), bangsa sikerajangen Dibata”. Bangsa pilihen sikerajangen Dibata enggo lanai man kalak Israel, tapi man kerina kalak si tek man Yesus Kristus, janah jabaten imam enggo lanai jadi sikerajangen kalak Israel, tapi jadi sikerajangen kerina kalak si tek. Ay. 10 merupaken penegasen maka kalak si enggo jadi sikerajangen Dibata enggo itehna ras inanamina perkuah ate Dibata.

Tapi labo terjeng seh je saja, bagi tersurat benaken bindu sada nari, rasul Petrus rusur ngataken kerna tugas tanggung jawab kalak si enggo jadi sikerajangen Dibata e. Adi i bas ogenta nina, “guna meritaken perbahanen-perbahanen Dibata si mbelin”. Kai e perbahanen-perbahanen Dibata si mbelin e? Secara etis praktis kristiani umpamana i bas bindu 1:15 nina “badia i bas kerina perbahanen”, i bas bindu 2:22  nina “patuh ras sikeleng-kelengen”, i bas bindu 3:12 nina “mehuli lagu langkahndu i tengah-tengah kalak si lenga nandai Dibata”, rsd. Intina, amin pe lit i bas kiniseran si mberat, kalak si tek paksa si e arus ngasup ncidahken jati dirina sebage kalak si enggo itehna ras inanamina perkuah ate Dibata i bas Yesus Kristus man sekelewetna.

Tema i bas PJJ-nta sendah “Idilo guna jadi pasu-pasu” i bas rangka Minggu Zending. Ngataken bujur kita erkiteken per-Berita si Meriah i bas Belanda nari maka keselamaten i bas Yesus Kristus enggo seh ku taneh Karo. GBKP enggo berkembang pesat erkiteken Berita si Meriah e labo ngadi bage-bage saja kenca per-Berita si Meriah i bas Belanda nari nadingken taneh Karo. Nini bulangta ndube ikut berperan aktif i bas meritaken Berita si Meriah, subuk i bas ersaksi secara verbal bage pe i bas kesaksin nggeluh si erbahanca melala kalak Karo tek man Yesus Kristus. Tek kita maka si e kerina bekas pendahin Kesah si Badia i tengah-tengah masyarakat Karo. Si jadi penungkunen, apakah seh je ngenca? Lang, perpulungen kalak si tek i bas jaman rasul Petrus, i bas jaman Zending, ras i bas jaman gundari enda seri nge tugas tanggung jawabna. Tetap er-Berita si Meriah ras tetap jadi pasu-pasu man sekelewetta.

Erkiteken kita kerina “imamat yang rajani” maka kita kerina kalak si tek man Yesus Kristus enggo la nai bergantung man kalak si deban guna kita banci rembak ras Dibata bagi kalak Israel ndube si bergantung kel man imam-imam. Kita kerina iutus guna meritakan Berita si Meriah ras jadi pasu-pasu man sekelewetta. E me tugas tanggung jawabta kerina labo hanya tugas Serayan ngenca. E maka mari sisungkun dirinta secara pribadi, enggo kin kita er-Berita si Meriah man sekelewetta, subuk ersaksi secara verbal entah pe ersaksi secara non-verbal arah kerina pengkebet geluhta? Enggo kin kita jadi pasu-pasu man sekelewetta, i tengah-tengah keluarganta, i tengah-tengah pendahinta, i tengah-tengah gerejanta, ras i tengah-tengah masyarakatta? Kai-kai saja si banci itingkatken i bas kita ersaksi ras jadi pasu-pasu man sekelewetta? Dibata si mpegegehi kita.